ບັນດາໜ່ວຍກູ້ໄພທີ່ມາຈາກຫຼາຍພາກສ່ວນຍັງເຮັດໜ້າທີ່ເດີນໜ້າຄົ້ນຫາສົບຜູ້ເສຍຊີວິດກັນແບບບໍ່ຖອຍ ນັບຕັ້ງແຕ່ມື້ເກີດເຫດຄືວັນທີ 23 ກໍລະກົດ 2018 ຈົນຮອດປັດຈຸບັນເປັນເວລາ 15 ວັນແລ້ວ
ຄະນະກຳມະການກູ້ໄພ ແຂວງ ອັດຕະປື ໃຫ້ຮູ້ວ່າປັດຈຸບັນສາມາດ ພົບສົບຜູ້ເສຍຊີວິດແລ້ວ 31 ສົບ ເຊິ່ງໃນວັນທີ 5 ສິງຫາ 2018ນີ້ ເຈົ້າຫນ້າທີ່ຫນ່ວຍກູ້ໄພ ສາມາດນຳສົບທີ່ເສຍຊີວິດ ເພດຍິງ ອາຍຸ 3 ເດືອນ ຢູ່ບ້ານທ່າຫີນ ພາຍຫລັງທີ່ເຈົ້າຫນ້າທີ່ ກູ້ໄພໄດ້ນຳເອົາຜູ້ປະສົບໄພອອກຈາກພື້ນທີ່ນຳ້ຖ້ວມ ມາປິ່ນປົວຢູ່ໂຮງຫມໍແຂວງ ປັດຈຸບັນມີຜູ້ເສຍຊີວິດ 3 ຄົນຍ້ອນ ຖືກຜົນກະທົບຈາກນຳ້ຊຸທັ່ງເຮັດໃຫ້ຮ່າງກາຍໄປຕຳກັບຫີນ ແລະ ຕົ້ນໄມ້ ຈຶ່ງເຈັບຊຳ້ ໂດຍພາຍຫລັງປິ່ນປົວສຸດຄວາມສາມາດຂອງແພດຫມໍ ເຮັດໃຫ້ທັງສາມເສຍຊີວິດ ແລະ ລວມປັດຈຸບັນມີຜູ້ເສຍຊີວິດຈາກນຳ້ຖ້ວມແລ້ວ 34 ສົບ ແລະ ອີກ 97 ຄົນຍັງສູນຫາຍ.
ການຄົ້ນຫາສົບຜູ້ສູນຫາຍນັ້ນແມ່ນຕ້ອງພົບກັບອຸປະສັກໃຫຍ່ຫຼວງນັ້ນຄືປະລິມານຂອງຂີ້ຕົມທີ່ມີມະຫາາສານ ແລະ ເລິກຈົນເຖິງແອວ, ພຽງຄໍໃນບາງພື້ນທີ່ ສົບສ່ວນຫຼາຍຄາດວ່າຈະຖືກຝັງຢູ່ພື້ນຕົມນັ້ນ ລົດບໍ່ສາມາດເຂົ້າໄປໃນພື້ນທີ່ນັ້ນໄດ້ ທາງເຈົ້າໜ້າທີ່ກູ້ໄພຈິ່ງປະຕິບັດໜ້າທີ່ດ້ວຍຄວາມລຳບາກ
