ທ່ານ ພົນຕີ ຄຳລຽງ ອຸທະໄກສອນ ຮອງຫົວຫນ້າກົມໃຫຍ່ເສນາທິການກອງທັບປະຊາຊົນລາວ ໄດ້ຖະແຫຼງຂ່າວຕໍ່ສື່ມວນຊົນເມື່ອວັນທີ 1 ສິງຫານີ້ ທີ່ເມືອງສະຫນາມໄຊວ່າ: ມາຮອດວັນທີ 1 ສິງຫາ 2018 ວ່າ ຖືເປັນມື້ທີ 9 ຂອງການຊອກຄົ້ນຫາຜູ້ສູນຫາຍຈາກເຫດການນໍ້າຖ້ວມ ເມືອງສະຫນາມໄຊ ເຊິ່ງໃນວັນທີ 31 ກລະກົດ ແລະ ວັນທີ 1 ສິງຫາ 2018 ພວກເຮົາໄດ້ຫັນມາສຸມໃສ່ຄົ້ນຫາທາງບົກເປັນຕົ້ນຕໍ ເນື່ອງຈາກວ່າລະດັບນໍ້າໄດ້ຫຼຸດລົງຫຼາຍ ປັດຈຸບັນການໃຊ້ເຮືອແມ່ນໃຊ້ສະເພາະຕາມລຳນໍ້າເຊປຽນເທົ່ານັ້ນ ແຕ່ວ່າ ເບິ່ງແລວກະແສນໍ້າ ສ່ວນຫຼາຍບໍ່ໄດ້ໄປຕາມແລວຂອງແມ່ນໍ້າເຊປຽນ, ແຕ່ແລວນໍ້າສ່ວນໃຫຍ່ໄປຕາມປ່າຕາມດົງ ເຊິ່ງກະແສນໍ້າພັດເອົາບ້ານເຮືອນປະຊາຊົນແລ້ວກໍລັດຊື່ໃສ່ທົ່ງໄຮ່ທົ່ງນາຂອງປະຊາຊົນ, ດັ່ງນັ້ນເປົ້າຫມາຍຂອງການຊອກຄົ້ນຈຶ່ງສຸມໃສ່ເຂດບ້ານ, ຕາມປ່າ, ແຈຮົ້ວ, ໄຮ່ນາຂອງປະຊາຊົນ.
ທ່ານ ຄໍາລຽງກ່າວອີກວ່າ: ສຳລັບໃນວັນທີ 31 ກໍລະກົດຫາວັນທີ 1 ສິງຫາ ໄດ້ສຸມໃສ່ຄົ້ນຫາ 6 ບ້ານທີ່ໄດ້ຮັບຜົນກະທົບຮ້າຍແຮງ ໂດຍນຳໃຊ້ລົດໄຖຈຳນວນ 10 ຄັນເຂົ້າຊ່ວຍແຮງງານຄົນ, ເຊິ່ງນຳໃຊ້ລົດໄຖຮື້ບັນດາກອງຂີ້ເຫຍື້ອ ແລະ ຊາກຕະຫຼັກຫັກພັງ, ກອງດິນ, ກອງຊາຍທີ່ສົງໄສ, ມາຮອດເວລາ 17:00 ໂມງຂອງວັນທີ 1 ສິງຫາສາມາດຊອກຄົ້ນຕາມບ້ານຕ່າງໆໄດ້ 100% ແລະ ຫມັ້ນໃຈວ່າຄື ຊິບໍ່ມີສົບຕົກຄ້າງຢູ່, ພ້ອມດຽວກັນນັ້ນ ກໍໄດ້ຫັນໄປຊອກຄົ້ນຕາມທົ່ງນາຂອງປະຊາຊົນທີ່ຢູ່ໃກ້ບ້ານຂອງປະຊາຊົນ ໂດຍໃນວັນທີ 1 ສິງຫາໄດ້ສຸມໃສ່ຄົ້ນຫາ ຢູ່ທົ່ງນາ 2 ບ້ານຄື: ທົ່ງນາຂອງບ້ານຫີນລາດ ແລະ ອວ່າຍໃສ່ບ້ານປິ່ນດົງ, ກຳລັງທີສອງຄົ້ນຫາຕາມທົ່ງໄຮ່ທົ່ງນາ ແລະ ແຈຮົ້ວ ຂອງບ້ານໃຫມ່ບ່ອນທີ່ຄາດວ່າຈະພົບສົບ, ຜ່ານການຊອກຄົ້ນໃນ 2 ວັນທີ່ຜ່ານມາ ສາມາດພົບເຫັນຕື່ມອີກ 3 ສົບ ຜູ້ໃຫຍ່ 1 ສົບ ແລະ ເດັກ 2 ສົບ ອາຍຸປະມານ 1-2 ປີ 1 ສົບລວມເປັນ 14 ສົບ, ແຕ່ໂຕເລກຖະແຫຼງຂ່າວຢ່າງເປັນທາງການແມ່ນ 13 ສົບ ເນື່ອງຈາກວ່າອີກສົບໜຶ່ງ ທີ່ເປັນເດັນນ້ອຍອາຍຸປະມານ 5 ປີ ແມ່ນພົບພໍ້ຕອນຫົວຄໍ່າຂອງວັນທີ 1 ສິງຫາ ກໍ່ເລີຍບໍ່ສາມາດເກັບກູ້ອອກມາໄດ້ເທື່ອ ເພາະສະຖານທີ່ທີ່ພົບສົບແມ່ນເປັນເບື່ອມເປັນຕົມເລິກຫຼາຍ ບວກກັບເວລາທີໃກ້ຈະຄໍ່າແລ້ວ ຈຶ່ງໝາຍໄວ້ກ່ອນ ຄາດວ່າຕອນເຊົ້າຂອງມື້ນີ້ 2 ສິງຫາ ຈະນຳກຳລັງເຂົ້າໄປກູ້ສົບດັ່ງກ່າວນັ້ນຂຶ້ນມາ.
ສຳລັບມື້ນີ້ຈະເລັ່ງໃສ່ຊອກຄົ້ນຕາມທົ່ງນາຂອງ 6 ບ້ານ ໂດຍສະເພາະແມ່ນບ້ານຫີນລາດ ແລະ ບ້ານໃຫມ່ ເນື່ອງຈາກເບິ່ງແລວນໍ້າ, ເຫັນວ່າ ແລວກະແສນໍ້າອອກຈາກບ້ານທ່າແສງຈັນແລ້ວໄປຫາບ້ານທ່າຫີນ ຕໍ່ໃສ່ບ້ານໃຫມ່ ອອກສູ່ທິດໃຕ້, ດັ່ງນັ້ນຈຶ່ງສຸມກຳລັງຊອກຄົ້ນບໍລິເວນທົ່ງນາບ້ານໃຫມ່, ຖ້າຫາກບໍ່ສຳເລັດມື້ຕໍ່ໄປຈະສືບຕໍ່ ໂດຍປະຕິບັດການຄົ້ນຫາຕາມແລວນໍ້າຕໍ່ໄປ.
ທ່ານ ພົນຕີ ຄໍາລຽງ ອຸທະໄກສອນ ຮອງຫົວໜ້າກົມໃຫຍ່ເສນາທິການກອງທັບ, ຫົວໜ້າກອງບັນຊາການພາກສະໜາມ ບອກຕື່ມວ່າ: ຍອດຜູ້ເສຍຊີວິດຢ່າງເປັນທາງການແມ່ນ 13 ສົບ ແລະ ຍັງສາບສູນ 118 ຄົນ ແຕ່ການປະຕິບັດໜ້າທີ່ຍັງສືບຕໍ່ຊອກຄົ້ນ ແລະ ກອບກູ້ຕໍ່ໄປຈົນກວ່າຈະສໍາເລັດ ບໍ່ວ່າຈະໃຊ້ເວລາດົນປານໃດ.
ແຫລ່ງຂ່າວ: ໜສພ ເສດຖະກິດ-ການຄ້າ, ຂ່າວສານປະເທດລາວ.