ເມື່ອວັນທີ 31 ກໍລະກົດ 2018 ທ່ານ ນາງ ໃບຄຳ ຂັດທິຍະ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ສຳພາດວ່າ ຈຳນວນເງິນທັງໝົດທີ່ໄດ້ຮັບຈາກການບໍລິຈາກໃນແຕ່ລະມື້ນັ້ນ ແມ່ນໄດ້ສົ່ງເຂົ້າບັນຊີທີ່ໄດ້ແຈ້ງໄວ້ຢູ່ທະນາຄານການຄ້າຕ່າງປະເທດລາວ ມະຫາຊົນ ທັງໝົດເລີຍ ແລະ ໄດ້ຢືນຢັນຢ່າງໜັກແໜ້ນວ່າ: ເງິນທຸກກີບ ທຸກບາດ ແລະ ທຸກໂດລາ ທີ່ໄດ້ຮັບຈາກການຊ່ວຍເຫລືອຈາກສັງຄົມທັງພາຍໃນ ແລະ ຕ່າງປະເທດນັ້ນ ແມ່ນບໍ່ໄດ້ນຳເອົາໄປໃຊ້ເຂົ້າໃນບ້ວງບໍລິຫານຈັດການໃດໆທັງນັ້ນ, ເຊິ່ງເງິນທັງໝົດ ຈະໄດ້ນຳໃຊ້ ເຂົ້າຢູ່ໃນການຊ່ວຍເຫລືອສຸກເສີນຕົວຈິງໃຫ້ແກ່ປະຊາຊົນ ແລະ ນຳໃຊ້ເຂົ້າຢູ່ໃນໄລຍະ ການຟື້ນຟູໃຫ້ມີປະສິດທິພາບທີ່ສຸດ. ໂດຍໃນເບື້ອງຕົ້ນ ໄດ້ມອບໃຫ້ບັນດາຄອບຄົວຜູ້ປະສົບໄພຢູ່ເມືອງ ສະໜາມໄຊ, ແຂວງ ອັດຕະປື ຈຳນວນ 500.000 ກີບຕໍ່ຄອບຄົວ
ສຳລັບຍອດເງິນບໍລິຈາກນັບຕັ້ງແຕ່ວັນທີ 24 – 31 ກໍລະກົດ 2018 ຍອດເງິນສົດຂອງການບໍລິຈາກເພື່ອຊ່ວຍເຫລືອຜູ້ປະສົບໄພຢູ່ສູນຮັບບໍລິຈາກ ກະຊວງສະຫວັດດີການ ແລະ ສັງຄົມ ໄດ້ບັນລຸ 14,8 ຕື້ກວ່າກີບ, ໃນນັ້ນສະກຸນເງິນໂດລາຈຳນວນ 155.000 ກວ່າໂດລາ ສະຫະລັດ ແລະ ສະກຸນເງິນບາດໄທ ປະມານ 4,6 ລ້ານບາດ.