ເມື່ອວັນທີ 29 ກໍລະກົດ 2018 ສຳນັກຂ່າວສານປະເທດລາວລາຍງານວ່າ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ຢ້ຽມຢາມສູນບໍລິຈາກເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມ 2018 ທີ່ກະຊວງແຮງງານ ແລະ ສະຫວັດດີການສັງຄົມ ທ່ານນາຍົກລັດຖະມົນຕີໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນຢ່າງໃຫຍ່ຫລວງ, ຈິງໃຈ ແລະ ສຸດຊຶ້ງ ຕໍ່ນ້ຳໃຈ, ຄວາມເປັນຫ່ວງເປັນໃຍ ແລະ ການຊ່ວຍເຫລືອຕ່າງໆ ຂອງພີ່ນ້ອງຊາວລາວໃນທົ່ວປະເທດ ທີ່ບໍ່ປະບໍ່ຖີ້ມກັນໃນຍາມລຳບາກ ຕໍ່ກັບໂສກນາດຕະກຳເຂື່ອນເຊປຽນ-ເຊນ້ຳນ້ອຍໃນຄັ້ງນີ້ ຊຶ່ງໄດ້ເຮັດຊີວິດ ແລະ ສັບສິນຂອງປະຊາຊົນໃນເມືອງ ສະໜາມໄຊ, ແຂວງ ອັດຕະປື ເສຍຫາຍຈົນປະເມີນຄ່ານັບບໍ່ຖ້ວນ.
ທ່ານ ນາຍົກລັດຖະມົນຕີ ກ່າວໃນໂອກາດຢ້ຽມຢາມສູນຮັບບໍລິຈາກ ຢູ່ກະຊວງແຮງງານ ແລະ ສະຫວັດດີການສັງຄົມ ໃນວັນທີ 29 ກໍລະກົດ 2018 ນີ້ວ່າ: ໝົດອາທິດທີ່ຜ່ານມາປະຊາຊົນລາວຕົກຢູ່ໃນຄວາມກັງວົນທາງດ້ານຈິດໃຈ ແລະ ຄວາມຫຍຸ້ງຍາກນາໆປະການ, ແຕ່ວ່າຄວາມສະທ້ານໃຈດັ່ງກ່າວນັ້ນ ກໍໄດ້ເຈືອປົນໄປດ້ວຍຄວາມຊາບຊຶ້ງເຖິງຄວາມມີນ້ຳໃຈ, ຄວາມໂອບເອື້ອອາລີ ຂອງປະຊາຊົນລາວບັນດາເຜົ່າໃນທົ່ວປະເທດ.
ຂ້າພະເຈົ້າໄດ້ຕິດຕາມຢ່າງໃກ້ຊິດຕໍ່ການຊ່ວຍເຫລືອຂອງພໍ່ແມ່ປະຊາຊົນລາວ ທີ່ໄດ້ຊ່ວຍກັນຄົນລະໄມ້ລະມື ທາງດ້ານວັດຖຸ, ເງິນ-ຄຳ, ເຄື່ອງອຸປະໂພກ-ບໍລິໂພກ ແລະ ອື່ນໆ, ລວມທັງການໃຫ້ກຳລັງໃຈ ທີ່ໄດ້ບິແບ່ງມາໃຫ້ຜູ້ປະສົບໄພ ໂດຍຜ່ານບັນດາສູນຮັບບໍລິຈາກຕ່າງໆ ເພື່ອສົ່ງຕໍ່ໃຫ້ປະຊາຊົນຜູ້ທີ່ໄດ້ຮັບຜົນກະທົບຢ່າງຮ້າຍແຮງຂອງໄພພິບັດໃນຄັ້ງນີ້ ເພື່ອເປັນການບັນເທົາທຸກໃນເບື້ອງຕົ້ນ. ນີ້ສະແດງເຖິງຄວາມເປັນຫ່ວງເປັນໃຍຂອງປະຊາຊົນລາວຕໍ່ພີ່ນ້ອງອັດຕະປື ຊຶ່ງໄດ້ກາຍເປັນສິ່ງທີ່ດີທີ່ສຸດ, ເປັນມູນເຊື້ອອັນດີງາມຂອງປະຊາຊົນລາວເຮົາ, ເປັນວັດທຳອັນດີງາມຂອງຊາດເຮົາ ແລະ ຈະຢູ່ຄຽງຄູ່ປະຊາຊົນລາວເຮົາໄປຊົ່ວກາລະນານ.
ຂ້າພະເຈົ້າຄິດວ່າ ມະຫັນຕະໄພຄັ້ງນີ້ ເປັນຜົນກະທົບຢ່າງຮ້າຍແຮງຕໍ່ປະຊາຊົນ ເມືອງ ສະໜາມໄຊ, ແຂວງ ອັດຕະປື ຊຶ່ງເຮັດໃຫ້ປະຊາຊົນບໍ່ມີທີ່ຢູ່ອາໃສ, ຫາຍສາບສູນເປັນຈຳນວນຫລາຍ, ລວມທັງກະທົບຕໍ່ໄຮ່ນາ, ເຮືອນຊານ ແລະ ອື່ນໆ ຂອງປະຊາຊົນ. ເຫດການນີ້ແມ່ນເກີດຂຶ້ນໂດຍບໍ່ມີໃຜປາຖະໜາ ແຕ່ເມື່ອເກີດແລ້ວ ພວກເຮົາທຸກຕ້ອງໄດ້ຮ່ວມແຮງຮ່ວມໃຈກັນ ແລະ ຊ່ວຍເຫລືອກັນ. ນ້ຳໃຈທີ່ໄດ້ມາຈາກການຊ່ວຍເຫລືອ, ສະຫນັບສະໜູນ, ການແບ່ງປັນຂອງປະຊາຊົນລາວທົ່ວປະເທດ ນັ້ນມີຈຳນວນຫລວງຫລາຍທີ່ສຸດ.
ໂອກາດດຽວກັນ, ທ່ານ ນາຍົກ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ລັດຖະບານຂອງບັນດາປະເທດເພື່ອມິດ, ອົງການຈັດຕັ້ງສາກົນ ແລະ ພາກສ່ວນຕ່າງໆ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອ ວັດຖຸສິ່ງຂອງ, ເງິນຄຳ ແລະ ອື່ນໆ ມາໃຫ້ປະຊາຊົນລາວ ຢ່າງບໍ່ຂາດສາຍ ແລະ ເປັນຈຳນວນທີ່ໃຫຍ່ຫລວງທີ່ສຸດ. ການຊ່ວຍເຫລືອດັ່ງກ່າວ ລວມທັງການໃຫ້ກຳລັງໃຈ ຕໍ່ຜູ້ທີ່ໄດ້ຮັບຜົນກະທົບນັ້ນ ແມ່ນບໍ່ສາມາດປະເມີນຄ່າໄດ້ ແລະ ເປັນຄຸນຄ່າອັນສູງສົ່ງທີ່ສຸດ ທັງເປັນການຊ່ວຍເຫລືອຢ່າງທັນການ ແລະ ຖືກກັບຄວາມຕ້ອງການຂອງປະຊາຊົນ.
ແຫລ່ງຂ່າວ: ສິງຄຳ, ພາບ: ອ່າຍຄຳ (ສຳນັກຂ່າວສານປະເທດລາວ)