ເມື່ອວັນທີ 28 ກໍລະກົດ 2018 ເວັບໄຊຂ່າວສະຖານທູດອາເມລິກາປະຈຳ ສປປ ລາວ ໄດ້ລາຍງານວ່າ ທ່ານນາງ ຣີນາ ບິດເຕີ ເອກອັກຄະລັດຖະທູດສະຫະລັດອາເມລິກາ ໄດ້ປະກາດ ການຈັດຕັ້ງປະຕິບັດທີມຊ່ວຍເຫຼືອບັນເທົາທາງດ້ານໄພພິບັດ Disaster Assistance Relief Team (DART) ພ້ອມທັງໄດ້ໃຫ້ການຊ່ວຍເຫຼືອເປັນເງິນທຶນຈຳນວນ 100,000 ໂດລາ ເພື່ອຊ່ວຍເຫຼືອສຸກເສີນທີ່ແຂວງອັດຕະປື ແລະ ພື້ນທີ່ໃກ້ຄຽງທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ພາກໃຕ້ຂອງ ສປປ ລາວ ໃນວັນທີ 27 ກໍລະກົດ 2018ທີ່ຜ່ານມາ.

ໂດຍອົງການພັດພັດທະນາສາກົນສະຫະລັດອາເມລິກາ , ລັດຖະບານສະຫະລັດອາເມລິກາ (USAID) ໄດ້ຈັດຕັ້ງທີມຜູ້ຊ່ຽວຊານໃນການປະສານງານ ແລະ ບໍລິຫານງານໃນການຕອບສະໜອງຈາກລັດຖະບານສະຫະລັດ ແລະ ຍັງໄດ້ຮ່ວມມືກັບອົງການ UNICEF ລາວ ເພື່ອຊ່ວຍປະຊາຊົນຜູ້ທີ່ດ້ຮັບຜົນກະທົບໄດ້ເຂົ້າເຖິງນ້ຳສະອາດ, ອຸປະກອນສຸຂະອານາໄມຂັ້ນພື້ນຖານ ແລະ ບໍລິການສຸກເສີນອື່ນໆ, ເງິນຈຳນວນດັ່ງກ່າວຍັງໄດ້ສະໜັບສະໜູນຄວາມພະຍາຍາມຂອງອົງກອນ UNICEF ໂດຍກົງໃນການຈັດຫານ້ຳດື່ມສະອາດ ແລະ ວິທີການບຳບັດນ້ຳ ຟື້ນຟູແຫຼ່ງນ້ຳສະອາດ ແລະ ສິ່ງອຳນວຍຄວາມສະດວກທາງດ້ານສຸຂະອານາໄມ ທີ່ສູນສຸຂະພາບ ແລະ ໂຮງຮຽນທີ່ໄດ້ຮັບຜົນກະທົບ. ພ້ອມດຽວກັນຍັງໄດ້ສະໜັບສະໜູນຄວາມພະຍາຍາມໃນການສົ່ງເສີມຄວາມເຂົ້າໃຈກ່ຽວກັບສຸຂະອານາໄມ ເພື່ອເປັນການປ້ອງກັນພະຍາດທີ່ຈະເກີດຂຶ້ນໃນນ້ຳ ແລະ ຊ່ວຍເຫຼືອຄົ້ນຫາເດັກນ້ອຍທີ່ພັດພາກ ແລະ ຖືກແຍກອອກຈາກຄອບຄົວ

ແຫລ່ງຂ່າວ: www.la.usembassy.gov