ສຳນັກຂ່າວຕ່າງປະເທດລາຍງານຈາກນະຄອນຫຼວງພະນົມເປນ ປະເທດກຳປູເຈຍ ເມື່ອວັນທີ 27 ກໍລະກົດ 2018 ວ່າ ທາງການແຂວງ ສະຕິງແຕຣງ ທີ່ຢູ່ທາງພາກເໜືອຂອງກຳປູເຈຍປະກາດອົບພະຍົບປະຊາຊົນປະມານ 25,000ຄົນ ອອກຈາກພື້ນທີ່ ຫຼັງພົບວ່າລະດັບນໍ້າໃນນໍ້າຂອງທີ່ໄຫລຜ່ານຕົວເມືອງເພີ່ມຂຶ້ນສູງເກີນ 12 ແມັດ ແລະ ຍັງບໍ່ມີແນວໂນ້ມຈະຄົງທີ່ ຫຼື ຫຼຸດລະດັບລົງ ສົ່ງຜົນໃຫ້ລະດັບນໍ້າລົ້ນເຂົ້າຖ້ວມຊຸມຊົນທີ່ຢູ່ຕາມແຄມແມ່ນໍ້າຂອງແລ້ວ ໂດຍສຳນັກງານອຸຕຸນິຍົມວິທະຍາຂອງກຳປູເຈຍຄາດວ່າລະດັບນໍ້າທີ່ເພີ່ມຂຶ້ນເປັນຜົນມາຈາກມວນນໍ້າມະຫາສານທີ່ໄຫລມາຈາກລາວເຊິ່ງເກີດຈາກເຂື່ອນກັ້ນນໍ້າເຊປຽນ-ເຊນໍ້ານ້ອຍແຕກ ໃນແຂວງອັດຕະປືທີ່ຢູ່ທາງພາກໃຕ້ຂອງປະເທດລາວ.