ສູນຮ່ວມການເຕືອນໄພໃຕ້ຝຸ່ນ ພາກພື້ນອາຊີປາຊີຟິກ ເປີດເຜີຍວ່າ ພົບການກໍ່ຕົວຂອງພາຍຸເຂດຮ້ອນພ້ອມໆກັນເຖິງ 5 ລູກ ຄາດການວ່າພາຍຸຢ່າງໜ້ອຍ 2 ລູກ ຈະພັດທະນາກາຍເປັນພາຍຸໃຕ້ຝຸ່ນໃນອີກບໍ່ພໍເທົ່າໃດມື້ຕໍ່ໜ້າ ຂະນະນີ້ພາຍຸເຊິກເຕິນຍັງບໍ່ສິ້ນສຸດ ແລະ ໄດ້ທະວີຄູນກາຍເປັນພາຍຸໂຊນຮ້ອນອີກຄັ້ງ
ສະພາບອາກາດຝົນຕົກໜັກຕິດຕໍ່ກັນຫຼາຍມື້ໃນພື້ນທີ່ປະເທດໄທ, ລາວ ແລະ ຫວຽດນາມ ເປັນຜົນມາຈາກອິດທິພົນຂອງພາຍຸເຊິນເຕິນ ຫຼັງຈາກພັດຜ່ານປະເທດຫວຽດນາມເມື່ອອາທິດທີ່ຜ່ານມາ ກ່ອນຈະອ່ອນກຳລັງລົງ ແລະ ເຄື່ອນຕົວລົງໄປຫວຽດນາມ ແລະ ລົງສູ່ທະເລຈີນໃຕ້ອີກຄັ້ງ ໂດຍປັດຈຸບັນພາຍຸເຊິກເຕິນໄດ້ເພີ່ມກຳລັງກາຍເປັນພາຍຸໂຊນຮ້ອນອີກຄັ້ງ ແລະ ພັດຂຶ້ນເກາະໄຫລຳ ຄາດວ່າຈະເຄື່ອນສູ່ປະເທດຈີນ ແລະ ຫວຽດນາມຕອນເໜືອ.
ຂະນະດຽວກັນບໍລິເວນມະຫາສະໝຸດປາຊີຟິກຝັ່ງຕະເວັນຕົກຍັງພົບພາຍຸອີກ 4 ລູກໄດ້ແກ່: ພາຍຸໂຊນຮ້ອນ ອ໊ອມປີລ ພັດຂຶ້ນປະເທດຈີນ ອີກທັງຍັງມີພາຍຸ ດີເປຣສຊັ່ນ 3 ລູກ ໄດ້ແກ່: ພາຍຸດີເປຣສຊັ່ນ Thirteen ທີ່ກຳລັງມຸ່ງໜ້າໄປທະເລເຫຼືອງຂອງຈີນ, ພາຍຸດີເປຣສຊັ່ນ Fourteen ຍັງບໍ່ມີແນວໂນ້ມວ່າຈະພັດຂຶ້ນປະເທດໃດ ແລະ Fifteen ກຳລັງພັດທະນາເປັນພາຍຸໂຊນຮ້ອນ ແລະ ໃຕ້ຝຸ່ນຕາມລຳດັບ ຄາດວ່າຈະເຄື່ອນຕົວເຂົ້າເກາະໂອກິນາວາ ປະເທດຍີປຸ່ນ ໃນຊ່ວງທ້າຍອາທິດນີ້
ຂະນະທີ່ກົມອຸຕຸນິຍົມວິທະຍາ ໄດ້ອອກປະກາດເຕືອນ “ພາຍຸດີເປຣສຊັ່ນບໍລິເວຍອ່ານຕັງເກ໋ຍ” ເຊິ່ງພາຍຸລູກນີ້ກຳລັງເຄື່ອນຕົວໄປທາງທິດຕະເວັນອອກດ້ວຍຄວາມໄວ 12 ກິໂລແມັດຕໍ່ຊົ່ວໂມງ ມີຄວາມໄວສູງສຸດໃກ້ສູນກາງປະມານ 55 ກິໂລແມັດຕໍ່ຊົ່ວໂມງ ຄາດວ່າຈະເຄື່ອນເຂົ້າມາປົກຄຸມບໍລິເວນພາກໃຕ້ຂອງປະເທດຈີນ ໃນໄລຍະວັນທີ 23-24 ກໍລະກົດ 2018 ໂດຍຈະສົ່ງຜົນກະທົບໃຫ້ພາກຕະເວັນຕົກ ແລະ ພາກເໜືອຂອງລາວມີຝົນຕົກປະມານ 40%ຂອງພື້ນທີ່.