ໃນວັນທີ 13 ກໍລະກົດ, ບໍລິສັດ ອາດີເຄ ກຣຸບ, ບໍລິສັດຊ່ຽວຊານດ້ານແປພາສາ ແລະ ທີ່ປຶກສາດ້ານການຕະຫຼາດ, ຮ່ວມກັນກັບລັດວິສາຫະກິດການບິນລາວໄດ້ຈັດງານຄົບຮອບໜຶ່ງປີຂອງວາລະສວານຈໍາປາເມືອງລາວຂຶ້ນ ເພື່ອສະຫຼອງຄວາມສຳເລັດໃນໄລຍະປີທີ່ຜ່ານມາ ໃຫ້ກຽດເຂົ້າຮ່ວມງານໂດຍທ່ານ ສະເຫຼີມ ໄຕຍະລາດ, ທີມງານບໍລິສັດ ອາດີເຄ ກຣຸບ, ເອກອັກຄະຣາຊະທູດ ແລະ ຜູ້ບໍລິຫານຈາກບໍໍລິສັດຕ່າງໆ.. ສະຖານທີ່ຈັດງານແມ່ນທີ່ຫ້ອງຈັດລ້ຽງ ກິນນະຣີ, ຮ້ານອາຫານຄົວລາວ.

ທ່ານ ຄາແມຣອນ ດາຣກ, ຜູ້ບໍລິຫານບໍລິສັດ ອາດີເຄ ກຣຸບ ໄດ້ກ່າວວ່າ: “ວາລະສານຈໍາປາເມືອງລາວຖືໄດ້ວ່າເປັນວາລະສານທີ່ໄດ້ຮັບຄວາມສົນໃຈ ແລະ ເປັນທີ່ຕ້ອງຕາຕ້ອງໃຈຂອງຜູ້ໂດຍສານຂອງການບິນລາວ ທັງຜູ້ໂດຍສານທີ່ເປັນນັກທ່ອງທ່ຽວ ແລະ ນັກທຸລະກິດ ທັງໃນປະເທດ ແລະ ໃນພາກພື້ນ”.

ທ່ານ ແຄມເມຣອນ ໄດ້ເສີມຕື່ມວ່າ: “ໃນຂະນະທີ່ແນວໂນ້ມຂອງສື່ສິ່ງພິມໃນທົ່ວໂລກກຳລັງຫຼຸດລົງ, ວາລະສານໃນເຮືອບິນຍັງສາມາດທີ່ຈະຄອງສ່ວນແບ່ງການຕະຫຼາດຂອງມັນໄວ້ໄດ້. ໃນວາລະສານຈໍາປເາເມືອງລາວ ທ່ານຈະໄດ້ເຫັນສະຖານທີ່ທ່ອງທ່ຽວຕ່າງໆໃນລາວ ແລະ ພາກພື້ນ, ຄວາມງົດງາມຂອງວັດທະນະທຳ ແລະ ອາຫານຈາກຫຼາຍໆທ້ອງຖິ່ນ ຜ່ານການເຮັດວຽກຢ່າງຈິງຈັງຂອງທີມບັນນາທິການ”.

ທ່ານ ເຈສັນ ໂຣເລິນ, ບັນນາທິການຂອງວາລະສານຈໍາປາເມືອງລາວໄດ້ກ່າວວ່າ: “ພວກເຮົາໄດ້ເອົາໃຈໃສ່ໃນການຄັດເລືອກຮູບພາບທີ່ງາມທີ່ສຸດ ແລະ ສ້າງສັນບົດຄວາມໂດຍນັກຂຽນຜູ້ຊ່ຽວຊານທັງຄົນລາວ ແລະ ຕ່າງປະເທດ ເພື່ອໃຫ້ຜູ້ອ່ານ ເຊິ່ງຫຼັກໆກໍຄື ຜູ້ໂດຍສານຂອງສາຍການບິນລາວ ທີ່ມີທັງນັກທຸລະກິດ ແລະ ນັກທ່ອງທ່ຽວຄົນລາວ ແລະ ຕ່າງປະເທດ ປະທັບໃຈທີ່ສຸດ”.

ໃນໂອກາດນີ້, ວາລະສານຈໍາປາເມືອງລາວໄດ້ມອບລາງວັນໃຫ້ຜູ້ຊະນະການປະກວດຮູບພາບໃນຫົວຂໍ້ “ເມືອງລາວຂອງຂ້ອຍ” ເຊິ່ງໄດ້ເປີດໂອກາດໃຫ້ຊ່າງພາບມືໃໝ່ ແລະ ມືອາຊີບທຸກທ່ານສົ່ງຮູບພາບສະຖານທີ່ທີ່ເຂົາເຈົ້າມັກທີ່ສຸດໃນລາວເຂົ້າຮ່ວມ. ຜູ້ຊະນະໄດ້ຮັບປີ້ເຮືອບິນເດີນທາງໄປຮ່າໂນ້ຍ, ຊຽງໃໝ່, ແລະ ຫຼວງພະບາງ.

ທ່ານ ເຈສັນ ໄດ້ກ່າວເພີ່ມວ່າ: “ພວກເຮົາຂໍສະແດງຄວາມຂອບໃຈເປັນຢ່າງຍິ່ງມາຍັງລູກຄ້າທຸກທ່ານ ແລະ ບັນດາທ່ານ ທີ່ໃຫ້ການສະໜັບສະໜູນວາລະສານເຮົາຕັ້ງແຕ່ເລີ່ມຕົ້ນ, ພວກເຮົາຈະສືບຕໍ່ພັດທະນາ ແລະ ຄົງມາດຕະຖານຂອງວາລະສານເຮົາ ທັງດ້ານຮູບພາບ ແລະ ບົດຄວາມ ເພື່ອຕອບຮັບຄວາມຄາດຫວັງຂອງຜູ້ອ່ານທຸກທ່ານໃຫ້ດີທີ່ສຸດ”.

ບັນຍາກາດງານສະຫຼອງເປັນໄປດ້ວຍຄວາມມ່ວນຊື່ນຈາກສຽງເພງຂອງດີເຈ ແລະ ອາຫານຈາກຮ້ານອາຫານຄົວລາວ, ມີຊຸ້ມຖ່າຍຮູບໃຫ້ບັນດາແຂກທີ່ເຂົ້າຮ່ວມງານຖ່າຍເປັນທີ່ລະນຶກ, ແລະ ຍັງມີການຈັດສະແດງຮູບພາບທັງ 9 ພາບ ຈາກຜູ້ທີ່ຊະນະການແຂ່ງຂັນ.

ກ່ຽວກັບວາລະສານຈໍາປາເມືອງລາວ:

ວາລະສານຈໍາປາເມືອງລາວ ເປັນວາລະສານເທິງເຮືອບິນຂອງສາຍການບິນລາວ, ເປັນວາລະສານລາຍສອງເດືອນ; ປະກອບມີທັງບົດຄວາມທີ່ຫຼາກຫຼາຍ ບໍ່ວ່າຈະເປັນບົດຄວາມກ່ຽວກັບສະຖານທີ່ທ່ອງທ່ຽວຕ່າງໆທີ່ໄດ້ຮັບຄວາມນິຍົມສູງ, ຮູບແບບການໃຊ້ຊີວິດທີ່ທັນສະໄໝ, ວັດທະນະທຳປະເພນີ ແລະ ເປົ້າໝາຍໃນການສົ່ງເສີມການທ່ອງທ່ຽວພາຍໃນລາວ ແລະ ພາກພື້ນ.