ລັດຖະບານລາວໄດ້ອອກແຈ້ງການໂຕ້ຕອບກ່ຽວກັບການງົດອອກວີຊາໃຫ້ແກ່ບຸກຄົນທີ່ມີສັນຊາດລາວຈຳນວນໜຶ່ງ ເຊິ່ງໄດ້ສ້າງຄວາມສັບສົນໃຫ້ແກ່ສັງຄົມ ຫຼັງຈາກທີ່ລັດຖະບານສະຫະລັດກໍຄືກະຊວງຄວາມໝັ້ນຄົງພາຍໃນຂອງສະຫະລັດ ໄດ້ສັ່ງໃຫ້ກະຊວງການຕ່າງປະເທດຂອງຕົນ ງົດອອກວີຊາໃຫ້ແກ່ພະນັກງານລັດຂອງລາວຈຳນວນໜຶ່ງ ໂດຍອ້າງວ່າຝ່າຍລາວປະຕິເສດທີ່ຈະຮັບເອົາບຸກຄົນທີ່ໜີເຂົ້າເມືອງຢ່າງຜິດກົດໝາຍຈາກສະຫະລັດກັບຄືນປະເທດ.
ໂດຍແຈ້ງການດັ່ງກ່າວໄດ້ປະກາດອອກມາໃນວັນທີ 10 ກໍລະກົດທີ່ຜ່ານມາ ໃນເວັບໄຊຂອງກະຊວງການຕ່າງປະເທດຂອງ ສປປ ລາວ ໂດຍມີເນື້ອໃນສະແດງຄວາມຜິດຫວັງຕໍ່ມາດຕະການດັ່ງກ່າວ ລະບຸວ່າ:
“ເພື່ອເປັນການຕອບສະໜອງຕາມໜັງສືແຈ້ງການຈາກທາງສະຫະລັດອາເມລິກາເລກທີ 18-720/CONS, ລົງວັນທີ 9 ກໍລະກົດ 2018, ກ່ຽວກັບກໍລະນີການງົດອອກວີຊາແກ່ພົນລະເມືອງລາວຈຳນວນໜຶ່ງ, ທາງລັດຖະບານລາວຂໍສະແດງຄວາມຜິດຫວັງຕໍ່ກັບມາດຕະການຂວໍ້າບາດວີຊາດັ່ງກ່າວຂອງລັດຖະບານສະຫະລັດຕໍ່ກັບປະເທດລາວ ໂດຍອ້າງວ່າ “ບໍ່ໄດ້ຮັບການຮ່ວມມືຢ່າງເໝາະສົມຈາກທາງລັດຖະບານລາວໃນການອອກເອກະສານ ແລະ ອຳນວຍຄວາມສະດວກໃຫ້ແກ່ບຸກຄົນທີ່ທາງສະຫະລັດອ້າງວ່າເປັນພົນລະເມືອງຂອງລາວ ເພື່ອມໃຫ້ເດີນທາງກັບປະເທດ ເຊິ່ງລະເມີດກົດໝາຍຂອງສະຫະລັດ ແລະ ບໍ່ມີສິດຢູ່ໃນສະຫະລັດອີກຕໍ່ໄປ”. ການດຳເນີນການທີ່ບໍ່ຕັ້ງຢູ່ໃນຫຼັກຂອງເຫດຜົນ ແລະ ບໍ່ຍຸຕິທຳນີ້ ນອກຈາກຈະເປັນສິ່ງທີ່ຮັບບໍ່ໄດ້ ແລະ ບໍ່ສ້າງສັນແລ້ວ, ຍັງອາດຈະພາໃຫ້ເກີດຜົນກະທົບທາງລົບຕໍ່ກັບການເຕີບໃຫຍ່ຂະຫຍາຍຕົວຂອງການພົວພັນຮ່ວມມືລະຫວ່າງສະຫະລັດ ແລະ ລາວອີກດ້ວຍ.
ຄວາມຈິງທີ່ປະຕິເສດບໍ່ໄດ້ກໍຄື ນອກຈາກຄວາມຍາກລຳບາກນານາປະການ ແລະ ຂໍ້ຈຳກັດໃນການປະເຊີນໜ້າກັບບັນຫາດັ່ງກາວແລ້ວ, ລັດຖະບານລາວໄດ້ໃຫ້ຄວາມສຳຄັນ ແລະ ເສີມຂະຫຍາຍຄວາມຮ່ວມມືທີ່ເປັນໄປໄດ້ຫຼາຍທີ່ສຸດອີງຕາມຄວາມຮຽກຮ້ອງຂອງລັດຖະບານສະຫະລັດ ໂດຍວິທີການ ແລະ ຮູບການ ເຊິ່ງໄດ້ຕົກລົງຮ່ວມກັນບົນພື້ນຖານຂອງກົດໝາຍ ແລະ ຂໍ້ກຳນົດທີ່ກ່ຽວຂ້ອງຂອງ ສປປ ລາວ ພ້ອມທັງອີງໃສ່ເງື່ອນໄຂ ແລະ ຄວາມອາດສາມາດສະເພາະ. ສະນັ້ນ ລັດຖະບານລາວຈຶ່ງໄດ້ສ້າງຕັ້ງຄະນະສະເພາະກິດ ເຊິ່ງນຳໂດຍຮອງລັດຖະມົນຕີກະຊວງປ້ອງກັນຄວາມສະຫງົບ ເພື່ອຮັບຜິດຊອບປະສານງານກັບຝ່າຍສະຫະລັດໂດຍກົງ ເພື່ອແກ້ໄຂບັນຫາການສົ່ງພົນລະເມືອງກັບປະເທດ. ປັດຈຸບັນ ມີການປຶກສາຫາລືສອງຝ່າຍໃນຫຼາຍລະດັບເພື່ອຫາລືແກ້ໄຂບັນກາກ່ຽວກັບການສົ່ງພົນລະເມືອງກັບປະເທດ. ມີການສຳພາດທາງໄກບຸກຄົນທີ່ຈະຖືກສົ່ງກັບປະເທດລາວ 10 ຄັ້ງ ໂດຍໜ່ວຍງານທີ່ກ່ຽວຂ້ອງຂອງລາວ. ຜົນທີ່ໄດ້ຮັບຈາກການຮ່ວມມືດັ່ງກ່າວກໍຄື, ມີ 3 ກໍລະນີທີ່ລັດຖະບານລາວໄດ້ຍອມຮັບເອົາ ເຊິ່ງໃນນັ້ນ 2 ຄົນໄດ້ກັບຄືນມາລາວເປັນທີ່ຮຽບຮ້ອຍແລ້ວ ແລະ ໃນຕອນນີ້ກໍມີອີກ 9 ກໍລະນີທີ່ກຳລັງພິຈາລະນາ ແລະ ຈະມີການສຳພາດເຊິ່ງຈະຈັດຂຶ້ນໃນວັນທີ 27 ກໍລະກົດ 2018 ນີ້.
ຕໍ່ກັບບັນຫາຂ້າງເທິງ, ມາດຕະການທີ່ບໍ່ມີເຫດຜົນຂອງລັດຖະບານສະຫະລັດດັ່ງກ່າວຈະບໍ່ເປັນປະໂຫຍດຕໍ່ການພົວພັນຮ່ວມມືຂອງສອງຝ່າຍເຊິ່ງຈະມີການຍົກລະດັບໃນອະນາຄົດ. ກົງກັນຂ້າມ, ມາດຕະການນີ້ອາດສ້າງຜົນເສຍເຖິງການພົວພັນຮ່ວມມືສອງຝ່າຍທີ່ມີຢູ່ແລ້ວລະຫວ່າງລາວ ແລະ ສະຫະລັດ ໃນຂະແໜງການອື່ນໆ. ດ້ວຍເຫດນີ້, ລັດຖະບານສະຫະລັດຄວນເລັ່ງພິຈາລະນາລຶບລ້າງມາດຕະການດັ່ງກ່າວທີ່ມີຕໍ່ ສປປ ລາວ ໃຫ້ໄວທີ່ສຸດເທົ່າທີ່ຈະເປັນໄປໄດ້ ເພື່ອຜົນປະໂຫຍດຮ່ວມກັນຂອງທັງສອງຝ່າຍ ແລະ ປະຊາຊົນຂອງສອງປະເທດ.
ລັດຖະບານລາວ ເຊິ່ງຍຶດໝັ້ນຕໍ່ນະໂຍບາຍສ້າງຄວາມສາມັກຄີ ແລະ ສົ່ງເສີມສາຍພົວພັນມິດຕະພາບ ແລະ ການພົວພັນຮ່ວມມືທີ່ໄດ້ຮັບໝາກຜົນກັບສະຫະລັດມາໂດຍຕະຫຼອດ ພ້ອມທີ່ຈະສືບຕໍ່ດຳເນີນງານກັບລັດຖະບານສະຫະລັດ ເພື່ອເປົ້າໝາຍທີ່ມີຮ່ວມກັນ ລວມທັງບັນຫາດັ່ງກ່າວ. ໃນຂະນະດຽວກັນ, ລັດຖະບານລາວກໍຫວັງວ່າຈະມີການເຄື່ອນໄຫວໃນທາງບວກ ແລະ ສ້າງສັນຈາກທາງລັດຖະບານສະຫະລັດ ຕໍ່ກັບມາດຕະການພຽງຝ່າຍດຽວຕໍ່ກັບບັນຫາດັ່ງກ່າວນີ້.”
ຂໍ້ມູນ : ກະຊວງການຕ່າງປະເທດ ແລະ Sengaloun Sayalath