ໃນວັນທີ 26 ມິຖຸນາ 2018, ລັດຖະບານແຫ່ງລັດມາຫະຣາສຣະ ປະເທດອິນເດຍ ໄດ້ສົ່ງເຈົ້າໜ້າທີ່ໜ່ວຍ “ຕໍ່ຕ້ານປລາສຕິກ“ ປະມານ 250 ຄົນ ລົງມະຫານະຄອນ ມຸມໄບ ເພື່ອກວດສອບຮ້ານຄ້າຕ່າງໆວ່າໄດ້ປະຕິບັດຕາມກຳນົດຂອງກົດໝາຍສະບັບໃໝ່ວ່າດ້ວຍການຫ້າມປລາສຕິກໃຊ້ຄັ້ງດຽວທີ່ມີຜົນບັງຄັບໃຊ້ໃນວັນເສົາທີ່ຜ່ານມາຫຼືບໍ່.
ກົດໝາຍດັ່ງກ່າວຫ້າມບໍ່ໃຫ້ມີການໃຊ້ປລາສຕິກປະເພດໃຊ້ຄັ້ງດຽວແລ້ວຖິ້ມ ເຊັ່ນ ຖົງຢາງ, ຕຸກຢາງ, ແກ້ວຢາງ ລວມເຖິງບ່ວງ ແລະ ສ້ອມຢາງ ທັງໃນສ່ວນຂອງຜູ້ປະກອບການ ແລະ ປະຊາຊົນທົ່ວໄປ. ຜູ້ຝ່າຝືນມີໂທດປັບ 5.000 ຣູປີ (ປະມານ 613.000 ກີບ) ສຳລັບຄວາມຜິດຄັ້ງທຳອິດ ແລະ ກໍລະນີທີ່ມີການເຮັດຜິດຊໍ້າໆມີໂທດປັບສູງສຸດ 25.000 ຣູປີ (ປະມານ 3.065.000 ກີບ) ຫຼື ຈໍາຄຸກ 3 ເດືອນ.
ເຈົ້າໜ້າທີ່ເຜີຍວ່າ ໃນໄລຍະເວລາ 3 ມື້ທີ່ຜ່ານມາ ໄດ້ມີການກວດສອບຮ້ານຄ້າຫຼາຍກວ່າ 8.000 ຮ້ານໃນມຸມໄບ, ປັບເງິນຜູ້ຝ່າຝືນໄດ້ແລ້ວ 660.000 ຣູປີ (ປະມານ 80.900.000 ກີບ) ແລະ ຍຶດປລາສຕິກໄດ້ຢ່າງຕໍ່າ 700 ກິໂລກຣາມ. ກົດໝາຍນີ້ຖືກປະກາດໃຫ້ປະຕິບັດຕັ້ງແຕ່ 3 ເດືອນກ່ອນ ເພື່ອໃຫ້ປະຊາຊົນ ແລະ ພາກທຸລະກິດໃນລັດມະຫາຣາສຣະກຽມຕົວ.
ບັນດາຜູ້ຄ້າລາຍຍ່ອຍກ່າວວ່າ ມາດຕະການນີ້ກະທົບຕໍ່ວິຖີຊີວິດຂອງພວກເຂົາ. ຄວາມສັບສົນເລື່ອງປະເພດຂອງປລາສຕິກທີ່ໄດ້ຮັບ ຫຼື ບໍ່ໄດ້ຮັບອະນຸຍາດໃຫ້ໃຊ້ ເຮັດໃຫ້ຮ້ານຂາຍເຄື່ອງແຫ້ງຈໍານວນຫຼາຍເລືອກທີ່ຈະປິດຮ້ານ ລະງັບການຂາຍຊົ່ວຄາວ ເນື່ອງຈາກວ່າຢ້ານຈະຖືກປັບໄໝ. ທາງດ້ານສະມາຄົມຜູ້ຜະລິດຖົງຢາງແຫ່ງອິນເດຍກ່າວວ່າ ກົດໝາຍລັກສະນະນີ້ຈະເຮັດໃຫ້ພະນັກງານໃນອຸດສະຫະກຳການຜະລິດປລາສຕິກຖຶກຖອດຖອນອອກຈາກວຽກປະມານ 300.000 ຄົນ.
ລັດສ່ວນໃຫຍ່ໃນອິນເດຍຈາກທັງໝົດ 29 ລັດ ມີກົດໝາຍວ່າດ້ວຍການຫ້າມໃຊ້ປລາສຕິກປະເພດໃຊ້ເທື່ອດຽວແລ້ວຖິ້ມ ບໍ່ວ່າຈະເປັນການຫ້າມໂດຍສິ້ນເຊີງ ຫຼື ຫ້າມພຽງບາງສ່ວນ ແຕ່ກໍມັກມີຊ່ອງວ່າງໃນການບັງຄັບໃຊ້ກົດໝາຍ. ທ່ານ ນະເຣນທຣາ ໂມດີ, ນາຍົກລັດຖະມົນຕີແຫ່ງອິນເດຍໄດ້ໃຫ້ຄໍາຍືນຍັນວ່າ ອິນເດຍຈະຕ້ອງປາສະຈາກການໃຊ້ປລາສຕິກແບບໃຊ້ເທື່ອດຽວແລ້ວຖິ້ມພາຍໃນປີ 2022.
ແຫຼ່ງຂ່າວ: ສຳນັກຂ່າວເອເອັບຊີ ແລະ ໄທຣັດ