ຈາກກໍລະນີທີ່ມີຜູ້ໃຊ້ເຟສບຸກຊື່ວ່າ ໄພບູນ ທຳມະວົງ ໂພສຮູບພາບໂຕຄຸ່ງ ຫຼື ທະນີແກ້ມຂາວ ເປັນໜຶ່ງໃນສັດປ່າບັນຊີຫວງຫ້າມທີ່ໃກ້ສູນພັນ ໂດຍການເຮັດເປັນເມນູອາຫານ ແລ້ວໂພສລົງສື່ສັງຄົມອອນລາຍໃນວັນທີ 12 ພຶດສະພາ 2024 ຜ່ານມາພ້ອມເນື້ອໃນລະບຸວ່າ: ບຸນປາກແລ້ວມື້ນີ້ ສ່ຽວໄດ້ໂຕຄຸ່ງ ຫຼັງຈາກທີ່ໄດ້ໂພສໄປໃນສື່ສັງຄົມອອນລາຍກໍເກີດກະແສວິພາກວິຈານ ແລະ ຄົນເຂົ້າໄປສະແດງຄວາມຄິດເຫັນເປັນຈຳນວນຫຼາຍ.
ທ່ານ ອິນທີ ເດືອນສະຫວັນ ຜູ້ບຸກເບີກການທ່ອງທ່ຽວແບບຜະຈົນໄພ ,ການທ່ອງທ່ຽວອະນຸລັກ ແລະ ປຸກລະດົມການປົກປັກຮັກສາສິ່ງແວດລ້ອມ ໄດ້ອອກມາໂພສ ສະແດງຄວາມຄິດເຫັນຕໍ່ເຫດການດັ່ງກ່າວວ່າ: ເປັນພາບທີ່ຜິດຫວັງທີ່ສຸດແຫ່ງປີ, ພວກເຮົາທີມງານພູຜາມ່ານ, ຫ້ອງການກະສິກຳເມືອງຄູນຄຳ, ອາສາສະມັກຈາກສີ່ບ້ານ (ບ້ານຄູນເງິນ, ບ້ານ ພູໝາກແໜ່ງ, ບ້ານຄູນແກ້ວ, ບ້ານຄູນຄຳ) ເຮັດວຽກອະນຸລັກ (ລາດຕາເວນ, ເຜີຍແຜ່ກົດໝາຍ, ປູກຈິດສຳນຶກ… ສ້າງກິດຈະກຳເພື່ອສົ່ງເສີມຄວາມເຂັ້ມແຂງໃນການສ້າງເສດທະກິດບ້ານ) ການຊ່ວຍດຶງດູດນັກທ່ອງທ່ຽວ, ບໍ່ວ່າຈະເປັນການໃຫ້ວຽກເຮັດງານທຳແກ່ລູກຫຼານ, ການອຸດໜູນຜະລິດທະພັນຈາກບ້ານ, ການສ້າງໂອກາດທາງສ້າງເສດຖະກິດ ແລະ ທີ່ແນ່ໆ ການທີ່ພວກເຮົາຊ່ວຍກັນອະນຸລັກ ແມ່ນຈະສາມາດສ້າງຜົນປະໂຫຍດໄລຍະຍາວໃຫ້ແກ່ລູກຫຼານ).ແຕ່ມີຄົນກຸ່ມໜຶ່ງທີ່ບໍ່ໄດ້ສົນໃຈໃນການທີ່ຈະລະເມີດກົດຫມາຍໃນການລ່າ, ຂ້າ, ຂາຍ, ບໍລິໂພກ… ເຫັນແລ້ວທໍ້ໃຈອີ່ຫຼີ.
ຫຼ້າສຸດ, ອີງຕາມເພຈ ວິທະຍາຄານຕໍາຫຼວດປະຊາຊົນ ລາຍງານໃນວັນທີ 15 ພຶດສະພາ 2024 ຜ່ານມານີ້ວ່າ: ຫນ່ວຍງານປ່າໄມ້ ເມືອງຄູນຄຳ ຮ່ວມກັບອຳນາດການປົກຄອງບ້ານ ( ຄູນຄຳ, ຄູນເງີນ, ຄູນແກ້ວ, ພູຫມາກແຫນ່ງ) ລົງຕິດຕາມຈັບຕົວທ້າວໄພບູນ ທຳມະວົງ ໄດ້ແລ້ວໂດຍຜູ້ກ່ຽວເປັນປະຊາຊົນບ້ານພູຫມາກແຫນ່ງທີ່ລັກລອບລ່າ, ສັດປ່າຫວງຫ້າມ ທີ່ໄດ້ໂພສລົງເຟສບຸກສ່ວນຕົວແບບທ້າທາຍ ເຊີ່ງເປັນຄວາມຜິດອັນຮ້າຍແຮງ.
ຕໍ່ກັບຂໍ້ຜິດພາດນີ້ຈະເປັນບົດຮຽນໃຫ້ແກ່ຜູ້ທີ່ເຄີຍລ່າຜ່ານມາກ່ອນ ຫຼື ຄິດທີ່ຈະລ່າໃຫ້ຢຸດເຊົາ ປ່ຽນແນວຄິດໃຫມ່ຈະດ້ວຍເຫດຜົນໃດກໍ່ຕາມ ສຸດທ້າຍນີ້, ຂໍໃຫ້ພວກເຮົາທຸກຄົນຊ່ວຍກັນປົກປັກຮັກສາສັດປ່າທີ່ໃກ້ຈະສູນພັນ, ເພື່ອຜົນປະໂຫຍດໂດຍລວມບໍ່ວ່າຈະແມ່ນທາງຕົງຫຼື ທາງອ້ອມ ເພາະປະເທດລາວອຸດົມສົມບູນໄປດ້ວຍອາຫານທີ່ເຮົາສາມາດລ້ຽງ, ປູກ, ເພາະພັນເອງໄດ້ໂດຍທີ່ບໍ່ຕ້ອງເຂົ້າໄປລ່າສັດປ່າທີ່ຫວງຫ້າມ.