ສຳນັກງານທໍລະນີວິທະຍາສາດສະຫະລັດ ແຈ້ງໄພພິບັດທາງທຳມະຊາດແຜ່ນດິນໄຫວຂະຫນາດການສັ່ນສະເທືອນຄວາມແຮງ 5,3 ໃນເມືອງໂອຊາກາ, ປະເທດຍີ່ປຸ່ນ ຂະນະທີ່ສຳນັກງານທໍລະນີວິທະຍາຂອງຍີ່ປຸ່ນກວດວັດຄວາມແຮງສັ່ນສະເທືອນໄດ້ຂະຫນາດ 5,9 ເບື້ອງຕົ້ນ ພົບຄວາມເສຍຫາຍເລັກນ້ອຍຕາມສະຖານີລົດໄຟ ລົດໄຟທີ່ແລ່ນຢູ່ຕ້ອງໄດ້ຢຸດໃຫ້ບໍລິການຊົ່ວຄາວ ເຮັດໃຫ້ເກີດຄວາມລ່າຊ້າໃນການສັນຈອນ ນອກຈາກນີ້ແຮງສັ່ນສະເທືອນຍັງເຮັດໃຫ້ທໍ່ນໍ້າປະປາແຕກ ໃນເຂດທາຄາສຶກິ ເຈົ້າຫນ້າທີ່ແມ່ນເລັ່ງຕິດຕາມແກ້ໄຂຢ່າງໃກ້ຊິດ.
ສ່ວນສຳນັກອຸຕຸນິຍົມວິທະຍາຍີ່ປຸ່ນປັບຕົວເລກແຜ່ນດິນໄຫວຈາກ 5,9 ເປັນ 6,1 ຂະນະທີ່ສຳນັກສຳຫລວດທໍລະນີວິທະຍາສະຫະລັດລາຍງານຕົວເລກແຜ່ນດິນໄຫວທີ່ 5.3 ເກີດຂື້ນເມື່ອເວລາ 7:58 ນາທີ ມື້ນີ້ຕາມເວລາຍີ່ປຸ່ນ ເຊີ່ງກົງກັບເວລາ 05:58 ນາທີໃນລາວ. ສູນກາງແຜ່ນດິນໄຫວແມ່ນເລິກລົງໄປ 15,3 ແມັດ ຫ່າງຈາກເມືອງທາຄັດສືກິ ແຂວງໂອຊາກາໄປທາງໃຕ້ຄ່ອນຕາເວັນຕົກສຽງໃຕ້ພຽງ 1 ກິໂລແມັດ.
ດ້ານບໍລິສັດໄຟຟ້າຄັນໄຊແຈ້ງວ່າ ບໍ່ພົບຄວາມຜິດປົກກະຕິທີ່ໂຮງງານໄຟຟ້ານິວເຄຣຍທັງ 3 ແຫ່ງ ໃນແຂວງຟູຄູອິ ແຕ່ມີລາຍງານວ່າບ້ານເຮືອນກວ່າ 170,000 ຫລັງ ໃນແຂວງໂອຊາກາ ແລະ ແຂວງຮຽວໂງ ບໍ່ມີໄຟຟ້າໃຊ້, ງົດການໃຊ້ບໍລິການທາງລົດໄຟຊົ່ວຄາວ ເພື່ອຄວາມປອດໄພ.
ສື່ຍີ່ປຸ່ນ ASK ແລະ ສະຖານີໂທລະທັດອາຊາຮິ ຂອງເອກະຊົນລາຍງານວ່າມີຜູ້ເສຍຊີວິດແລ້ວ 2 ຄົນ ແລະ ມີຜູ້ບາດເຈັບ 5 ຄົນ ຂະນະທີ່ສຳນັກຂ່າວກຽວໂດ ລາຍງານວ່າມີເດັກຜູ້ຍິງ ອາຍຸ 9 ປີ ເສຍຊີວິດຍ້ອນຕິດຢູ່ໃນກຳແພງສະລອຍນໍ້າ ທີ່ໄດ້ຮັບແຮງສັ່ນສະເທືອນຂອງແຜ່ນດິນໄຫວເຮັດໃຫ້ກຳແພງລົ້ມລົງມາທັບ.
ແຫລ່ງຂ່າວຕ່າງປະເທດ : TNA