ສຳນັກຂ່າວ CNN ລາຍງານວ່າ ທ່ານ ບາຣັກ ໂອບາມາ ອະດີດປະທານາທິບໍດີ ສະຫະລັດ ແລະ ທ່ານ ນາງ ມິເຊລ ໂອບາມາ ປະກາດຮ່ວມງານຜະລິດຮູບເງົາກັບບໍລິສັດ ເນັດຟລິກ ຜູ້ໃຫ້ບໍລິການການຮັບຊົມຮູບເງົາ ແລະ ຊີຣີອອນໄລນ໌ໃຫຍ່ທີ່ສຸດໃນໂລກ ໂດຍການລົງນາມໃນສັນຍາຄັ້ງນີ້ເປັນການປະກາດຮ່ວມມືກັນໄລຍະຍາວຫຼາຍປີ ເຊິ່ງຄາດວ່າຈະໄດ້ເຫັນຜົນງານທຳອິດຂອງພວກເຂົາພາຍໃນປີ 2019
ສື່ສະຫະລັດ ລະບຸວ່ານີ້ຖືເປັນບາດກ້າວໃໝ່ທີ່ຍິ່ງໃຫຍ່ກວ່າເກົ່າໃນການລົງນາມໃນວົງການບັນເທີງຂອງທັງຄູ່ ໂດຍກ່ອນໜ້ານີ້ຄອບຄົວໂອບາມາໄດ້ກໍ່ຕັ້ງບໍລິສັດຜະລິດເນື້ອຫາໂທລະທັດພາຍໃຕ້ຊື່ Higher Ground Productions ເຊິ່ງຕໍ່ຈາກນີ້ໄປບໍລິສັດຂອງທ່ານ ໂອບາມາຈະຜະລິດເນື້ອຫາໂທລະທັດທີ່ຫຼາກຫຼາຍໃຫ້ກັບເນັດຟລິກເຊັ່ນ: ຊີຣີທີ່ມີບົດລະຄອນ ຊີຣີປະເພດຣຽວລິຕີໂຊ, ຮູບເງົາສາລະຄະດີ ແລະ ເລື່ອງລາວພິເສດຕ່າງໆ
ຢ່າງໃດກໍ່ຕາມ ຂະນະນີ້ທາງຜູ້ບໍລິຫານຂອງເນັດຟລິກຍັງບໍ່ໄດ້ເປີດເຜີຍວ່າເນື້ອຫາສ່ວນໃຫຍ່ຈະອອກມາໃນທິດທາງແນວໃດ ແຕ່ແຫຼ່ງຂ່າວວົງໃນລະບຸວ່ານອກຈາກການທຳງານເບື້ອງຫຼັງເປັນໂປຣດິວເຊີແລ້ວ ມີໂອກາດສູງທີ່ທັງທ່ານ ບາຣັກ ໂອບາມາ ແລະ ທ່ານ ນາງ ມິເຊລ ໂອບາມາ ຈະມີບົດບາດທາງໜ້າຈໍໃຫ້ຜູ້ຊົມໄດ້ເຫັນອີກດ້ວຍ