spot_img
Homeຂ່າວທ້ອງຖິ່ນລັດຖະບານ ປັບລາຄາຄັງແຮນໍ້າມັນເຊື້ອໄຟລົງ ເພື່ອປະຄອງລາຄານໍ້າມັນບໍ່ໃຫ້ສູງຂຶ້ນ

ລັດຖະບານ ປັບລາຄາຄັງແຮນໍ້າມັນເຊື້ອໄຟລົງ ເພື່ອປະຄອງລາຄານໍ້າມັນບໍ່ໃຫ້ສູງຂຶ້ນ

Published on

ກະຊວງ​ອຸດສາຫະກຳ ແລະ ການ​ຄ້າ ໄດ້​ອອກ​ແຈ້ງ​ການ​ລາຄາ​ຂາຍຍ່ອຍ​ນໍ້າມັນ​ເຊື້ອ​ໄຟ ໃນ​ຂອບ​ເຂດ​ທົ່ວ​ປະເທດ ສະບັບ​ເລກ​ທີ 0582/​ອຄ.​ກຄພນ ລົງ​ວັນ​ທີ 17 ພຶດສະພາ 2018 ເຖິງ​ສະມາຄົມ​ນໍ້າມັນ​ເຊື້ອ​ໄຟ ແລະ ອາຍ​ແກ໊ດ​ບັນດາ​ບໍລິສັດ​ນໍ້າມັນ​ເຊື້ອ​ໄຟ ເລື່ອງ​ແຈ້ງ​ລາຄາ​ຂາຍຍ່ອຍ​ນໍ້າມັນ​ເຊື້ອ​ໄຟ​ໃນ​ຂອບ​ເຂດ​ທົ່ວ​ປະເທດ ການ​ປັບ​ລາຄາ​ຄັ້ງ​ນີ້​ແມ່ນ​ຫຼຸດ​ຄັງ​ແຮ​ລົງ 200 ກີບ​ຕໍ່​ລິດ ເພື່ອ​ປະຄອງ​ບໍ່​ໃຫ້​ລາຄາ​ນໍ້າມັນ​ເຊື້ອ​ໄຟ​ຂອງ​ປະເທດ​ປັບ​ຕົວ​ສູງ​ຂຶ້ນ ສ່ວນ​ລາຄາ​ຂາຍຍ່ອຍ​ນໍ້າມັນ​ເຊື້ອ​ໄຟ​ຍັງ​ຄົງ​ລາຄາ​ເກົ່າ​ຈາກ​ການ​ປັບ​ຄັ້ງ​ກ່ອນ.

ການ​ປັບ​ຄັ້ງ​ນີ້ ເນື່ອງ​ຈາ​ກວ່າ​ນໍ້າມັນ​ເຊື້ອ​ໄຟ ແມ່ນ​ສິນຄ້າ​ຍຸດ​ທະ​ສາດ​ໜຶ່ງ​ທີ່​ລັດ​ຄຸ້ມ​ຄອງ ແມ່ນ​ສິນຄ້າ​ທີ່​ນອນ​ຢູ່​ໃນ​ບັນຊີ​ຄວບ​ຄຸມ​ຂອງ​ຂະແໜງ​ອຸດສາຫະກຳ ແລະ ການ​ຄ້າ ຕາມ​ດຳລັດ 474/​ນຍ ລົງ​ວັນ​ທີ 18/11/2010 ແມ່ນ​ສິນຄ້າ​ທີ່​ສ້າງ​ລາຍ​ຮັບ​ຕົ້ນຕໍ​ເຂົ້າ​ງົບປະມານ​ຂອງ​ລັດ​ດ້ວຍ​ການ​ເກັບ​ພາສີ ແລະ ອາກອນ.

ຈາກ​ການ​ເໜັງ​ຕີງ​ລາຄາ​ນໍ້າມັນ​ເຊື້ອ​ໄຟ​ໃນ​ຕະຫຼາດ​ໂລກ ໂດຍ​ສະເລ່ຍ ລະຫວ່າງວັນ​ທີ 30/4-15/5/2018 ກັບ​ລາຄາ​ປະຕິບັດ​ຄັ້ງ​ວັນ​ທີ 27/4/2018 ເຫັນ​ວ່າ: ລາຄາ​ນໍ້າມັນ​ແອັດ​ຊັງ (95) +0.0310 ໂດ​ລາ/ລິດ ຫຼື ຄິດ​ເປັນ 5,4% ຈາກ​ລາຄາ 0.5792 ໂດ​ລາ/ລິດ ປັບ​ເພີ່ມ​ຂຶ້ນ​ເປັນ 0.6102 ໂດ​ລາ/ລິດ ນໍ້າມັນ​ແອັດ​ຊັງ (92)+0.0375 ໂດ​ລາ/ລິດ ຫຼື ຄິດ​ເປັນ 6,8% ຈາກ​ລາຄາ 0.5536 ໂດ​ລາ/ລິດ ປັບ​ເພີ່ມ​ຂຶ້ນ​ເປັນ 0.5911ໂດ​ລາ/ລິດ ແລະ ກາ​ຊວນ (0,05) + 0.0153 ໂດ​ລາ/ລິດ ຫຼື 7,9% ຈາກ 0.5732 ໂດ​ລາ/ລິດ ປັບ​ເພີ່ມ​ຂຶ້ນ​ເປັນ 0.6188 ໂດ​ລາ/ລິດ.

ຕໍ່​ສະພາບ​ການ​ດັ່ງກ່າວ ຖ້າ​ນຳ​ໃຊ້​ລາຄາ​ສະເລ່ຍ​ລະຫວ່າງ 30/4-15/5/2018 ມາ​ຄິດໄລ່​ໂຄງ​ສ້າງ​ລາຄາ​ນໍ້າມັນ​ເຊື້ອ​ໄຟ​ ຈະ​ເຮັດ​ໃຫ້​ລາຄາ​ຂາຍຍ່ອຍ​ແອັດ​ຊັງ​ພິເສດ​ເພີ່ມ​ຂຶ້ນ 310 ກີບ/ລິດ ນໍ້າມັນ​ແອັດ​ຊັງ​ທຳ​ມະ​ດາ ເພີ່ມ​ຂຶ້ນ 370 ກີບ/ລິດ ແລະ ນໍ້າມັນ​ກາ​ຊວນ ເພີ່ມ​ຂຶ້ນ 410 ກີບ/ລິດ ສະນັ້ນ ເພື່ອ​ບໍ່​ໃຫ້​ມີ​ຜົນ​ກະທົບ​ຕໍ່​ພື້ນຖານ​ເສດຖະກິດ ກໍ່​ຄືຜູ້​ຊົມໃຊ້ໃນ​ກອງ​ປະຊຸມ​ນາຍົກ-ຮອງ​ນາຍົກ ຄັ້ງ​ວັນ​ທີ 16/5/2018 ຜ່ານ​ມາ ຈຶ່ງ​ໄດ້​ຕົກລົງ​ເຫັນ​ດີ​ໃຫ້​ຫຼຸດ​ຄັງ​ແຮ​ລົງ 200 ກີບ/ລິດ (ຈາກ 300 ເຫຼືອ 100 ກີບ/ລິດ) ເຊິ່ງ​ໄດ້​ຈັດ​ຕັ້ງ​ປະຕິບັດ​ຄັ້ງ​ວັນ​ທີ 18/5/2018 ເຮັດ​ໃຫ້​ລາຄາ​ຂາຍຍ່ອຍ​ນໍ້າມັນ​ເຊື້ອ​ໄຟ​ຢູ່​ໃນ​ລາຄາ​ເກົ່າ (ຢູ່​ນະຄອນຫຼວງ​ວຽງ​ຈັນ ແອັດ​ຊັງ​ພິເສດ 10.310 ກີບ/ລິດ ແອັດ​ຊັງ​ທຳ​ມະ​ດາ 9.270 ກີບ/ລິດ ແລະ ກາ​ຊວນ 8.300 ກີບ/ລິດ).

ໃນຕໍ່ໜ້າ ສະພາບ​ລາຄາ​ນໍ້າມັນ​ຕະຫຼາດ​ໂລກ ​ຫາກ​ມີ​ທ່າ​ອ່ຽງ​ສູງ​ຂຶ້ນ​ເລື້ອຍໆ​ຄື​ແນວ​ນັ້ນ ຈຶ່ງ​ຮຽກຮ້ອງ​ມາ​ຍັງ​ປວງ​ຊົນ​ລາວ​ບັນດາເຜົ່າ ຜູ້ນຳ​ໃຊ້​ຍານ​ພະ​ຫະ​ນະ​ຕ່າງໆ ຈົ່ງ​ຊ່ວຍ​ກັນ​ປະຢັດ​ໃຊ້​ຈ່າຍ​ໃນ​ສິ່ງ​ທີ່​ຈຳເປັນບໍ່​ຄວນ​ຟຸມ​ເຟືອຍ ເພາະ​ຕື່ມ​ນໍ້າ​ມັນທຸກ​ຄັ້ງ​ແມ່ນ​ເງິນ​ທັງ​ນັ້ນ ຫາກ​ຊ່ວຍ​ກັນ​ປະຢັດ​ໄດ້​ກໍ່​ເປັນ​ການ​ປະຢັດ​ເງິນຕາ ແລະ ເປັນ​ການ​ຊ່ວຍ​ພັດທະນາ​ປະເທດ​ຊາດ​ອີກ​ດ້ວຍ.

 

ແຫລ່ງຂ່າວ: @ມ່ວນ.

ບົດຄວາມຫຼ້າສຸດ

ການຈັດການຂີ້ເຫຍື້ອທີ່ດີ ຄືຄວາມປອດໄພຕໍ່ສະພາບແວດລ້ອມ ແລະ ສັງຄົມ

ການຈັດການຂີ້ເຫຍື້ອ ຍັງເປັນສິ່ງທີ່ທ້າທ້າຍໃນແຕ່ລະຂົງເຂດ ຕັ້ງແຕ່ເຮືອນຊານ, ຫ້າງຮ້ານ, ບໍລິສັດ ຈົນໄປເຖິງບັນດາໂຮງງານຜະລິດຕ່າງໆ. ເນື່ອງຈາກເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ມີການສ້າງຂີ້ເຫຍື້ອເລີຍ. ເຊິ່ງບາງຄັ້ງຍັງພົບເຫັນການທຳລາຍ ແລະ ຈັດການຂີ້ເຫຍື້ອຢ່າງບໍ່ຖືກວິທີ ທີ່ສົ່ງຜົນເສຍຕໍ່ສິ່ງແວດລ້ອມ ແລະ ສ້າງຄວາມເປີເປື້ອນໃຫ້ສັງຄົມ ເຊັ່ນ:...

ຮູ້ຫຼືບໍ່? ທີ່ໄປທີ່ມາຂອງຊື່ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່

ພາຍຸແຕ່ລະລູກ ໃຜເປັນຄົນຕັ້ງ ແລະ ໃຜເປັນຄົນຄິດຊື່ ມາຮູ້ຄຳຕອບມື້ນີ້ ພາຍຸວິພາ, ພາຍຸຄາຈິກິ ໄດ້ມາຈາກໃສ ໃນໄລຍະນີ້ເຫັນວ່າມີພາຍຸກໍ່ໂຕຂຶ້ນມາຕະຫຼອດ ແລະມີຫຼາຍຄົນອາດຈະສົງໃສວ່າ ໃນການຕັ້ງຊື່ພາຍຸແຕ່ລະລູກ ແມ່ນໃຜເປັນຄົນຕັ້ງ ແລະຄໍາຕອບກໍຄື ຊື່ຂອງພາຍຸແມ່ນໄດ້ຖືກຕັ້ງຂຶ້ນຈາກປະເທດຕ່າງໆໃນທົ່ວໂລກ. ສຳລັບພາຍຸທີ່ສາມາດຕັ້ງຊື່ໄດ້ນັ້ນ ຕ້ອງແມ່ນພາຍຸລະດັບໂຊນຮ້ອນຂຶ້ນໄປ...

ແຈ້ງເຕືອນພາຍຸລູກໃໝ່ ທີ່ອາດຈະສົ່ງຜົນກະທົບຕໍ່ປະເທດລາວ ໃນວັນທີ 30/08/2025 – 02/09/2025

ກຽມຮັບມືພາຍຸລູກໃໝ່ ຫວຽດນາມອອກແຈ້ງເຕືອນພາຍຸລູກໃໝ່ ອາດສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ ຫວຽດນາມອອກແຈ້ງເຕືອນພາຍຸລູກໃໝ່ ທີ່ຄາດວ່າຈະໃຊ້ຊື່ວ່າພາຍຸໜອງຟ້າ ຫຼື ຟ້າໃສ ທີ່ຕັ້ງຊື່ໂດຍປະເທດລາວ ຄາດອິດທິພົນຂອງພາຍຸລູກນີ້ຈະສົ່ງຜົນກະທົບຕໍ່ປະເທດລາວ, ປະເທດໄທ ແລະ ປະເທດຫວຽດນາມ...

ຜົນສໍາເລັດ ກອງປະຊຸມໃຫຍ່ ຜູ້ແທນສະມາຊິກພັກ ຄັ້ງທີ III ຂອງ ອົງຄະນະພັກ ກະຊວງເຕັກໂນໂລຊີ ແລະ ການສື່ສານ

ເອກະສັນຮັບເລືອກ ສະຫາຍ ປອ. ສັນຕິສຸກ ສິມມາລາວົງ ເປັນເລຂາຄະນະພັກ ກະຊວງເຕັກໂນໂລຊີ ແລະ ການສື່ສານ (ຊຸດໃໝ່) ກະຊວງເຕັກໂນໂລຊີ ແລະ ການສື່ສານລາຍງານຜົນ ກອງປະຊຸມໃຫຍ່ ຜູ້ແທນສະມາຊິກພັກ...