ກົມໃຫຍ່ສັນຕິບານ, ກະຊວງປ້ອງກັນຄວາມສະຫງົບ ໄດ້ອອກແຈ້ງການເມື່ອວັນທີ 26 ເມສາ 2018 ທີ່ຜ່ານມາວ່າ ໃຫ້ຍົກເລີກການຂຽນແບບຟອມແຈ້ງເຂົ້າ-ອອກເມືອງ ສຳລັບພົນລະເມືອງລາວ ແລະ ຄົນຕ່າງດ້າວເຊິ່ງອາໄສຢູ່ໃນລາວ ທີ່ເດີນທາງຜ່ານດ່ານສາກົນສະໜາມບິນ 4 ແຫ່ງ.
ແຈ້ງການດັ່ງກ່າວມີເນື້ອໃນລະບຸວ່າ ໃຫ້ຍົກເລີກການຂຽນແບບຟອມແຈ້ງເຂົ້າ-ອອກເມືອງຂອງພົນລະເມືອງລາວ ແລະ ຄົນຕ່າງດ້າວທີ່ອາໄສຢູ່ໃນ ສປປ ລາວ ທີ່ເດີນທາງຜ່ານດ່ານສາກົນສະໜາມບິນ ເຊິ່ງປະກອບດ້ວຍ 4 ແຫ່ງຄື: ສະໜາມບິນສາກົນວັດໄຕ, ສະໜາມບິນສາກົນຫຼວງພະບາງ, ສະໜາມບິນສາກົນສະຫວັນນະເຂດ ແລະ ສະໜາມບິນສາກົນປາກເຊ.
ຕາມແຈ້ງການ, ຄົນຕ່າງດ້າວໃນທີ່ນີ້ໝາຍເຖິງບຸກຄົນທີ່ມີສັນຊາດອື່ນ ແຕ່ເຂົ້າມາຕັ້ງຖິ່ນຖານ ແລະ ອາໄສຢູ່ໃນ ສປປ ລາວ ເປັນໄລຍະເວລາຍາວນານ ໂດຍຖືບັດຕ່າງດ້າວ ແລະ ລັດຖະບານຂອງຄົນຕ່າງດ້າວນັ້ນ ກໍຍັງຮັບຮູ້ສະຖານະພົນລະເມືອງຂອງພວກເຂົາຢູ່.
ທັງນີ້ ແຈ້ງການດັ່ງກ່າວນີ້ ປະກາດອອກມາກໍເພື່ອອຳນວຍຄວາມສະດວກໃນການເດີນທາງແຈ້ງເຂົ້າ-ອອກ ສປປ ລາວ ແລະ ທັງເປັນການຕ້ອນຮັບປີທ່ອງທ່ຽວລາວ 2018.
ແນວໃດກໍຕາມ ສຳລັບຄົນຕ່າງປະເທດ ແລະ ຄົນບໍ່ມີສັນຊາດ, ທາງກົມໃຫຍ່ສັນຕິບານ ຍັງຄົງໃຫ້ຂຽນແບບຟອມແຈ້ງເຂົ້າ-ອອກເມືອງຕາມປົກກະຕິ ຈົນກວ່າຈະມີແຈ້ງການເພີ່ມເຕີມ.
ຂ່າວຈາກ: @ມ່ວນ.