ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ແລະ ອຳນາດການປົກຄອງເມືອງປາກງື່ມ ສົມທົບກັບ
ກົມສົ່ງເສີມ ແລະ ພັດທະນາສິນຄ້າກະຊວງອຸດສາຫະກຳ ແລະ ການຄ້າ ຈັດພິທີມອບປ້າຍກາໝາຍໜຶ່ງເມືອງໜຶ່ງ
ຜະລິດຕະພັນແຫ່ງຊາດ (ODOP) ໃຫ້ກຸ່ມກະສິກຳອິນຊີບ້ານທ່າຊ້າງ ເມືອງປາກງື່ມ ນະຄອນຫຼວງ ເປັນຫົວໜ່ວຍ
ທີ 2 ຂອງເມືອງປາກງື່ມ ແລະ ສາມາດປະກາດນຳໃຊ້ກາໝາຍໂອດ໋ອບແຫ່ງຊາດ ເປັນຜະລິດຕະພັນທີ 13 ຂອງນະ
ຄອນຫຼວງ.
ກຸ່ມກະສິກຳອິນຊີ ບ້ານທ່າຊ້າງ ສ້າງຕັ້ງຂຶ້ນໃນວັນທີ 25/9/2010 ພາຍໃຕ້ການຊີ້ນຳຂອງອຳນາດການປົກຄອງບ້ານ
ມີສະມາຊິກທັງໝົດ 20 ຄອບຄົວ ແຮງງານຕົ້ນຕໍ 50 ຄົນ ມີເນື້ອທີ່ທັງໝົດ 20 ເຮັກຕາ ໃນນັ້ນ ປູກພືດຜັກ 5 ເຮັກ
ຕາ ກ້ວຍ 7 ເຮັກຕາ ອ້ອຍ 2 ເຮັກຕາ ໝາກຮຸ່ງ 3 ເຮັກຕາ ແລະອື່ນໆ 3 ເຮັກຕາ ມີເຮືອນຮົ່ມຂະໜາດ 20×6 ແມັດ
ຈຳນວນ 95 ຫຼັງ ສາມາດປູກພືດຜັກຫຼາຍກວ່າ 20 ຊະນິດ ປູກໄດ້ທັງລະດູແລ້ງ ແລະ ຝົນ ໄດ້ສົ່ງພືດຜັກສົ່ງຂາຍຕະ
ຫຼາດກະສິກຳອິນຊີນະຄອນຫຼວງ 80% ແລະ 20% ແມ່ນຂາຍໃຫ້ຜູ້ບໍລິໂພກພາຍໃນບ້ານ ໃນນັ້ນ ໄດ້ນຳເອົາພືດຜັກ
ສົ່ງຂາຍຢູ່ຕະຫຼາດນະຄອນຫຼວງ 5 ມື້ຕໍ່ອາທິດ ວັນຈັນຢູ່ສວນເຈົ້າຟ້າງຸ່ມ ວັນອັງຄານຂາຍຢູ່ສູນການຄ້າລາວ-ໄອເຕັກ
ວັນພຸດຢູ່ເດີ່ນທາດຫຼວງ ວັນພະຫັດຂາຍຢູ່ສູນການຄ້າລາວ-ໄອເຕັກ ແລະ ວັນເສົາຢູ່ເດີ່ນທາດຫຼວງ ຜົນຜະລິດທັງ
ໝົດ 2-2,5 ໂຕນຕໍ່ອາທິດ ສະເລ່ຍລາຄາແມ່ນ 9.000 ກີບຕໍ່ກິໂລ ມີລາຍຮັບທັງໝົດ 22 ລ້ານກວ່າກີບຕໍ່ອາທິດ
ສະເລ່ຍລາຍຮັບຄອບຄົວໜຶ່ງໄດ້ 1.500.000 ຫາ 2.000.000 ກີບຕໍ່ອາທິດ ທັງນີ້ເພື່ອເປັນການປົກປ້ອງຜູ້ຜະລິດ
ເຈົ້າຂອງສິນຄ້າ ຫຼື ຮູບແບບການບໍລິການທີ່ເປັນເອກະລັກ ໜຶ່ງເມືອງໜຶ່ງຜະລິດຕະພັນ ບໍ່ໃຫ້ຜູ້ອື່ນຮຽນແບບ ຫຼື
ປອມແປງ ພ້ອມທັງປົກປ້ອງຜູ້ຊື້ຜູ້ຊົມໃຊ້ສິນຄ້າດັ່ງກ່າວ ບໍ່ໃຫ້ຖືກຫຼອກລວງ.
ພິທີມອບກາໝາຍໄດ້ຈັດຂຶ້ນວັນທີ 5 ກັນຍາ 2014 ທີ່ຜ່ານມາ ຢູ່ທີ່ຫ້ອງການປົກຄອງບ້ານທ່າຊ້າງ ໂດຍໃຫ້ກຽດມອບ
ຂອງທ່ານ ເບີລິນ ເພັດຈັນທະຣາດ ຫົວໜ້າພະແນກອຸດສາຫະກຳ ແລະ ການຄ້ານະຄອນຫຼວງ ແລະ ກ່າວຮັບແມ່ນ
ທ່ານ ຫວາດ ສຸວັນນະກຸມມານ ຫົວໜ້າກຸ່ມກະສິກຳອິນຊີ ບ້ານທ່າຊ້າງ ໂດຍຊ້ອງໜ້າທ່ານ ວົງເດືອນ ບຸນຍະແສງ
ເຈົ້າເມືອງປາກງື່ມ ມີບັນດາຕາງໜ້າກົມສົ່ງເສີມພັດທະນາສິນຄ້າ ກະຊວງ ຕາງໜ້າພະແນກການ ພະນັກງານວິຊາ
ການ ແຂກຖືກເຊີນ ແລະ ສະມາຊິກກຸ່ມກະສິກຳອິນຊີເຂົ້າຮ່ວມເປັນສັກຂີພິຍານ.
ແຫຼ່ງຂ່າວ: ວຽງຈັນໃໝ່