ສຳນັກຂ່າວຊິນຫົວຂອງຈີນລາຍງານວ່າ ອຸບັດຕິເຫດລົດນຳທ່ຽວຕົກຂົວໃນແຂວງ ຮະວັງແຮເໜືອ ປະເທດເກົາຫຼີເໜືອ ເມື່ອຊ່ວງເດິກຂອງວັນອາທິດ (22 ເມສາ 2018) ທີ່ຜ່ານມາ ເຮັດໃຫ້ນັກທ່ອງທ່ຽວຈີນ 32 ຄົນ ແລະ ຊາວເກົາຫຼີເໜືອ 4 ຄົນເສຍຊີວິດ ຮວມເຖິງນັກທ່ອງທ່ຽວຈີນອີກ 2 ຄົນໄດ້ຮັບບາດເຈັບສາຫັດ
ສື່ທາງການຂອງເກົາຫຼີເໜືອລາຍງານວ່າວານນີ້ ທ່ານ ຄິມ ຈອງ ອຶນ ຜູ້ນຳສູງສຸດຂອງເກົາຫຼີເໜືອໄດ້ເດີນທາງໄປທີ່ສະຖານທູດຈີນປະຈຳນະຄອນຫຼວງປຽງຢາງ ເພື່ອສະແດງຄວາມເສຍໃຈຢ່າງສຸດຊຶ້ງ ຕໍ່ການສູນເສຍຄັ້ງນີ້
ລາຍງານລະບຸວ່າ ທ່ານ ຄິມ ກ່າວວ່າມັນເປັນອຸບັດຕິເຫດທີ່ບໍ່ມີໃຜຄາດຄິດໃນເທື່ອນີ້ ນຳຄວາມເຈັບປວດ ແລະ ຄວາມໂສກເສົ້າມາສູ່ຫົວໃຈຂອງຕົນ ແລະ ເຂົາຮູ້ສຶກເສຍໃຈຫຼາຍເມື່ອນຶກເຖິງຍາດພີ່ນ້ອງຜູ້ເຄາະຮ້າຍທີ່ຕ້ອງສູນເສຍຄົນໃນຄອບຄົວໄປ
ໃນຂະນະທີ່ທ່ານ ຫຼີ່ ຈິ້ນຈວິນ ເອອັກຄະຣາຊທູດຈີນປະຈຳເກົາຫຼີເໜືອ ກ່າວວ່າ ປະທານາທິບໍດີ ສີຈິ້ນຜິງ ແລະ ຄອບຄົວຂອງຜູ້ປະສົບເຄາະຮ້າຍໄດ້ຮັບຊາບເຖິງການຢຽມຢາມຂອງທ່ານຄິມ ແລະ ໃຫ້ຄຳໝັ້ນວ່າຈະໃຫ້ຄວາມຮ່ວມມືຢ່າງໃກ້ຊິດກັບເຈົ້າໜ້າທີ່ຂອງເກົາຫຼີເໜືອໃນເລື່ອງອຸບັດຕິເຫດດັ່ງກ່າວນີ້ຕໍ່ໄປ