ກົງສຸນໃຫຍ່ແຫ່ງ ສປປ ລາວ ແຈ້ງວ່າ ປະຈຸບັນ ມີພົນລະເມືອງລາວ ຊື່ນາງ ປ່ຽນ ຈະເລີນສີ ເກີດວັນທີ 5 ກໍລະກົດ 1996 ຖືໜັງສືຜ່ານແດນເລກທີ P1860258 ຢູ່ບ້ານຫ້ວຍເຄື່ອງ ເມືອງນາແລ ແຂວງຫຼວງນ້ຳທາ ຜູ້ກ່ຽວໄດ້ຖືກນາຍໜ້າຕົວະຍົວະຫຼອກລວງມາແຕ່ງງານກັບຄົນຈີນຢູ່ແຂວງຫູນານແບບບໍ່ຖືກຕ້ອງຕາມລະບຽບກົດໝາຍ ເຂົ້າເມືອງຜິດກົດໝາຍ ແລະ ຢູ່ເກີນກຳນົດ. ເຈົ້າໜ້າທີ່ກວດກາຕົວຈິງ ພົບວ່າຜູ້ກ່ຽວເຂົ້າມາ ສປ ຈີນ ແຕ່ວັນທີ 17 ກໍລະກົດ 2017 ໂດຍຜ່ານດ່ານປາງໄຮ ໄດ້ 220 ວັນແລ້ວ ປະຈຸບັນຜູ້ກ່ຽວຢູ່ໃນການຄຸ້ມຄອງຂອງຕຳຫຼວດເມືອງ ຫຼີຫຼິງ ເຂດປົກຄອງ ຈູໂຈວ ແຂວງຫູນານ ແລະ ເຈົ້າໜ້າທີ່ຂອງຈີນມີຈຸດປະສົງຢາກສົ່ງຜູ້ກ່ຽວກັບຄືນສປປ.ລາວ ໃນວັນທີ 22 ມີນາ 2018 ໂດຍຜ່ານດ່ານບໍ່ຫານ ບໍ່ແຕນ. ຢ່າງໃດກໍຕາມ ຕໍ່ກັບເລື່ອງດັ່ງກ່າວ ທາງເຈົ້າໜ້າທີ່ກົງສູນໃຫຍ່ຂອງລາວ ກໍກຳລັງປະສານງານກັບເຈົ້າໜ້າທີ່ກ່ຽວຂ້ອງຂອງຈີນເພື່ອນຳຕົວ ນາງ ປ່ຽນ ຈະເລີນສີ ກັບຄືນປະເທດຢ່າງປອດໄພ ແລະ ຖືກຕ້ອງຕາມລະບຽບກົດໝາຍ.
ແຫລ່ງຂ່າວ: ສຳນັກຂ່າວສານປະເທດລາວ