ເມື່ອວັນທີ 21 ມີນາ 2018 ບີບີຊີລາຍງານວ່າ ສຳນັກປະທານາທິບໍດີມຽນມາ ອອກຖະແຫຼງການວ່າ ທ່ານ ຕິນ ຈໍ ອາຍຸ 71 ປີ ປະທານາທິບໍດີມຽນມາລາອອກຈາກຕຳແໜ່ງ
ລາຍງານລະບຸວ່າ ການຖະແຫຼງການບໍ່ໄດ້ລະບຸເຖິງເຫດຜົນໃນການລາອອກ ແຕ່ລະບຸວ່າ ທ່ານ ຕິນ ຈໍ ຕ້ອງການພັກຜ່ອນ ໂດຍຊ່ວງບໍ່ພໍເທົ່າໃດເດືອນທີ່ຜ່ານມາມີກະແສຄວາມວິຕົກກັງວົນກ່ຽວກັບສຸຂະພາບຂອງທ່ານ ຕິນ ຈໍ ຫຼັງຈາກທີ່ທ່ານ ຕິນ ຈໍ ມີຄວາມອິດເໝື່ອຍຫຼາຍໃນຊ່ວງຂະນະທີ່ອອກປະຕິບັດໜ້າທີ່
ທັງນີ້ ທ່ານ ຕິນຈໍ ສາບານຕົນເປັນປະທານາທິບໍດີມຽນມາ ໃນປີ 2016 ຫຼັງພັກສັນຕິບານແຫ່ງຊາດເພື່ອປະຊາທິປະໄຕຂອງທ່ານນາງ ອອງຊານ ຊູຈີ ຊະນະການເລືອກຕັ້ງ
ຖະແຫຼງການຂອງສຳນັກປະທານາທິບໍດີລະບຸວ່າ ນາຍພົນ ມິນ ສ່ວຍ ຮອງປະທານາທິບໍດີ ຈະເຮັດໜ້າທີ່ຮັກສາການປະທານາທິບໍດີມຽນມາ ຈົນກວ່າຈະມີການເລືອກປະທານາທິບໍດີຄົນໃໝ່ພາຍໃນ 7 ວັນ