ເນື່ອງໃນໂອກາດສະເຫຼີມສະຫຼອງ ສົ່ງທ້າຍປີເກົ່າຕ້ອນຮັບປີໃໝ່ 2018 ຕາມ ການສະຫຼຸບຂອງເຈົ້າໜ້າທີ່ໃນ5 ວັນທົ່ວປະເທດມີອຸບັດເຫດເກີດຂຶ້ນທັງໝົດ 179 ຄັ້ງ ແລະເສຍຊີວິດ 27 ຄົນ ທຽບໃສ່ປີຜ່ານ ມາເພີ່ມຂຶ້ນ 9 ຄົນ ໂດຍສາເຫດສ່ວນໃຫຍ່ ເກີດຈາກດື່ມສິ່ງມຶນເມົາແລ້ວຂັບຂີ່ ແລະ ແຊງບໍ່ຮັບປະກັນ.

ອີງຕາມຂໍ້ມູນສະຖິຕິອຸບັດເຫດສົ່ງ ທ້າຍປີເກົ່າຕ້ອນຮັບປີໃໝ່ຈາກກະຊວງປ້ອງກັນຄວາມສະຫງົບກົມຕຳຫຼວດຈະ ລາຈອນໃຫ້ຮູ້ວ່າ: ໃນລະຫວ່າງວັນທີ 29 ທັນວາ 2017 ຫາ 2 ມັງກອນ 2018 ແມ່ນມີອຸບັດເຫດເກີດຂຶ້ນທັງໝົດ 179 ລາຍສົມທຽບປີຜ່ານມາ ເພີ່ມຂຶ້ນ 18 ລາຍ,ພາຫະນະເປ່ເພ 332 ຄັນ, ເພີ່ມຂຶ້ນ 27 ຄັນ, ຄົນຮັບບາດເຈັບ 280 ຄົນ ເພີ່ມຂຶ້ນ 12 ຄົນ ແລະຄົນເສຍຊີວິດ 27 ຄົນ ສົມທຽບປີຜ່ານມາ 18 ຄົນເພີ່ມຂຶ້ນ 9 ຄົນ.

ສຳລັບ 5 ແຂວງທີ່ເກີດອຸບັດເຫດຫຼາຍກ່່າວໝູ່ນະຄອນຫຼວງວຽງຈັນເກີດ 31 ຄັ້ງ, ສະຫວັນນະເຂດ 24 ຄັ້ງ, ອຸດົມໄຊ 20 ຄັ້ງ, ຈຳປາສັກ 20 ຄັ້ງ, ວຽງຈັນ 19 ຄັ້ງ ແລະໄຊຍະບູລີ 12 ຄັ້ງ ແລະ 5 ແຂວງທີ່ເສຍຊີວິດຫຼາຍແມ່ນອຸດົມໄຊ ເສຍຊີວິດ 5 ຄົນ, ໄຊຍະບູລີ 4 ຄົນ, ຈຳປາສັກ 4 ຄົນ, ວຽງຈັນ 3 ຄົນ, ນະຄອນຫຼວງວຽງຈັນ 2 ຄົນ ແລະບໍລິຄຳໄຊ 2 ຄົນ ແລະເຊກອງ 2 ຄົນ.

ແນວໃດກໍ່ຕາມສາເຫດທີ່ພາໃຫ້ເກີດ ອຸບັດເຫດຫຼັກໆແມ່ນ ບໍ່ປ່ອຍສິດ 62 ກໍລະນີ, ຂີ່ລົດຄວາມໄວ 54 ກໍລະນີ, ດື່ມສິ່ງມຶນເມົາ 36 ກໍລະນີ, ແຊງບໍ່ຮັບປະ ກັນ 22 ກໍລະນີ ແລະເຕັກນິກ 5 ກໍລະນີ.

ແຫລ່ງຂ່າວ: ໜັງສືພິມເສດຖະກິດ-ສັງຄົມ