ເຖິງວ່າລັດຖະບານຈະເອົາໃຈໃສ່ໃນການສະກັດກັ້ນ ແລະ ລົບລ້າງການປູກຝິ່ນຂອງປະຊາຊົນ ໂດຍສົ່ງເສີມໃຫ້ຫັນໄປປູກພືດທົດແທນທີ່ໄດ້ຮັບຜົນຜະລິດດີກວ່າ ແຕ່ກໍເຫັນວ່າຍັງມີປະຊາຊົນຈໍານວນໜຶ່ງ ຍັງສືບຕໍ່ລັກລອບເຄື່ອນໄຫວປູກຝິ່ນ ແລະ ຊື້ຂາຍໃຫ້ກັນ. ດັ່ງຄະດີນີ້ ໃນເວລາ 15:00 ໂມງ ຂອງວັນທີ 1 ພະຈິກ 2017, ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນໍ້າທາ ໄດ້ຈັບຕົວທ້າວ ເຄີແຊ ອາຍຸ 22 ປີ ປະຊາຊົນບ້ານນໍ້າສາ ເມືອງ ແລະ ແຂວງຫຼວງນໍ້າທາ ພ້ອມຢາຝິ່ນ 2 ກິໂລກຼາມ ໃນຂະນະທີ່ເອົາຢາຝິ່ນໄປສົ່ງໃຫ້ຜູ້ສັ່ງຊື້ ແລະ ເຂົ້າກວດຄົ້ນເຮືອນພົບຢາຝິ່ນຕື່ມອີກ 5,6 ກິໂລກຼາມ ລວມທັງໝົດ 7,6 ກິໂລກຼາມ.
ເຈົ້າໜ້າທີ່ສອບສວນພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນໍ້າທາ ໃຫ້ຮູ້ວ່າ: ພາຍ ຫຼັງໄດ້ຮັບແຈ້ງຄວາມຈາກປະຊາຊົນວ່າ: ທ້າວ ເຄີແຊ ກໍາລັງເອົາຢາເສບຕິດໄປສົ່ງໃຫ້ຜູ້ຮ່ວມຂະບວນການນໍາກັນຢູ່ເທດສະບານແຂວງ ໂດຍນໍາໃຊ້ລົດຈັກເປັນພາຫະນະ. ຈາກນັ້ນ, ຈຶ່ງໄດ້ຈັດກໍາລັງວິຊາສະເພາະອອກເຄື່ອນໄຫວຕິດຕາມເປົ້າໝາຍ. ຮອດເວລາ 16:00 ໂມງ ວັນດຽວກັນ ພົບເຫັນເປົ້າໝາຍຂັບຂີ່ລົດຈັກມາເຂດບ້ານວຽງຄຳ ເທດສະບານແຂວງຫຼວງນໍ້າທາ ເຈົ້າໜ້າທີ່ຈຶ່ງໄດ້ເຂົ້າກັກຕົວ ພ້ອມກວດກາພົບເຫັນຢາເສບຕິດປະເພດຢາຝິ່ນ ຈຳນວນ 2 ກິໂລກຼາມ. ຈາກນັ້ນ, ຈຶ່ງເຂົ້າກວດຄົ້ນເຮືອນຜູ້ກ່ຽວອີກ ພົບເຫັນຢາຝິ່ນຕື່ມອີກ 5,6 ກິໂລກຼາມ.
ຜ່ານການສືບສວນ-ສອບສວນ ທ້າວ ເຄີແຊ ໄດ້ຮັບສາລະພາບວ່າ: ຢາຝິ່ນຈຳນວນດັ່ງກ່າວ ແມ່ນຂອງຕົນແທ້; ເຊິ່ງຮັບມາຈາກທ້າວ ຢ່ຽວ ຢູ່ແຂວງຜົ້ງສາລີ ທີ່ມາຈ້າງປາດຢາງພາລາຢູ່ບ້ານສົບຕຸດ ເມືອງຫຼວງນໍ້າທາ ເພື່ອເອົາໄປຂາຍຕໍ່ໃຫ້ຜູ້ທີ່ຕ້ອງການເສບຝິ່ນພາຍໃນເມືອງ. ກ່ອນຖືກຈັບແມ່ນມີຜູ້ຮ່ວມຂະບວນການນໍາກັນສັ່ງຊື້ຢາຝິ່ນ 2 ກິໂລກຼາມ ໂດຍນັດຊື້-ຂາຍຢູ່ເຮືອນພັກແຫ່ງໜຶ່ງ ຢູ່ເທດສະບານແຂວງ. ຈາກນັ້ນ, ກໍເອົາຢາຝິ່ນຈໍານວນດັ່ງກ່າວໄປສົ່ງ ພໍໄປຮອດບ້ານວຽງຄຳ ເມືອງແຂວງຫຼວງນໍ້າ ກໍຖືກເຈົ້າໜ້າທີ່ຈັບຕົວກ່ອນ.
ແຫລ່ງຂ່າວ: ໜັງສືພິມ ປກສ.