ອົງການກວດສອບແຫ່ງລັດ ໄດ້ກວດເຫັນການລະເມີດລະບຽບກົດໝາຍ ໃນຫລາຍແຂວງຢູ່ສູນກາງ ແລະ ທັງທ້ອງຖິ່ນ ເຊັ່ນ: ການຂຸດຄົ້ນໄມ້ເກີນໂກຕາຂອງລັດຖະບານອະນຸມັດ ຈາກເງິນຂາຍໄມ້, ຄ່າປັບໃໝ, ຄ່າເຊົ່າຊັບສິນຂອງລັດ, ຄ່າເຊົ່າ-ສໍາປະທານທີ່ດິນ ແລະ ຄ່າຊັບພະຍາກອນທໍາມະຊາດຈໍານວນ 427 ກວ່າຕື້ກີບ, ໃນນັ້ນຂັ້ນສູນກາງ 39 ກວ່າຕື້ກີບ ແລະ ທ້ອງຖິ່ນ 388 ກວ່າຕື້ກີບ.
ອິງຕາມບົດລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ໂດຍທ່ານ ນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ໄດ້ໃຫ້ຮູ້ວ່າ: ຂະແໜງຄຸ້ມຄອງຊັບສິນຂອງລັດ ໄດ້ກວດເຫັນໜີ້ຕ້ອງຮັບຈາກເງິນຂາຍໄມ້, ຄ່າປັບໃໝ, ຄ່າເຊົ່າຊັບສິນຂອງລັດ, ຄ່າເຊົ່າ-ສໍາປະທານທີ່ດິນ ແລະ ອື່ນໆ ຊຶ່ງຕ້ອງໄດ້ເລັ່ງທວງມອບເຂົ້າງົບປະມານ ຕາມລະບຽບກົດໝາຍ ຍັງບໍ່ຄົບຖ້ວນ ແລະ ຊັກຊ້າ ເຊັ່ນ: ຍັງມີການຂຸດຄົ້ນໄມ້ເກີນໂກຕາລັດຖະບານອະນຸມັດ ຢູ່ແຂວງຊຽງຂວາງ ແລະ ອັດຕະປື ຈໍານວນ 28.238 ກວ່າແມັດກ້ອນ ແລະ ການຂຸດຄົ້ນໄມ້ທີ່ບໍ່ໄດ້ຮັບອະນຸຍາດຈາກລັດຖະບານ ຂອງ ແຂວງບໍ່ແກ້ວ, ສາລະວັນ, ເຊກອງ ແລະ ແຂວງຈໍາປາສັກ ຈໍານວນ 11.788 ກວ່າແມັດກ້ອນ ແລະ 1.216 ກວ່າໂຕນ. ໃນນັ້ນ, ຍັງມີການຈັດຕັ້ງປະຕິບັດການຂາຍໄມ້ຂອງແຂວງສາລະວັນ, ເຊກອງ, ຈໍາປາສັກ ແລະ ແຂວງອັດຕະປື ບໍ່ໄດ້ດໍາເນີນຕາມລະບຽບການທີ່ກໍານົດໄວ້ ຈໍານວນ 25.771 ກວ່າແມັດກ້ອນ ແລະ 1.848 ກວ່າໂຕນ, ມູນຄ່າສັນຍາ 41 ກວ່າຕື້ກີບ. ພ້ອມນີ້, ຍັງກວດພົບ 3 ແຂວງ ຄື:ແຂວງຊຽງຂວາງ, ເຊກອງ ແລະ ແຂວງຈໍາປາສັກ ໄດ້ຂາຍໄມ້ຫລຸດລາຄາຕໍ່າສຸດ ທີ່ກະຊວງອຸດສະຫະກໍາ ແລະ ການຄ້າກໍານົດ 5 ຕື້ກວ່າກີບ, ຊຶ່ງບໍ່ສອດຄ່ອງກັບລາຄາພື້ນຖານນໍາໃຊ້ ໃນການປະມູນຕາມແຈ້ງການ.
ແຫຼ່ງຂ່າວ: ສຳນັກຂ່າວສານປະເທດລາວ