ອົງການກວດກາລັດຖະບານ ແລະ ອົງການກວດສອບແຫ່ງລັດ ໄດ້ເປັນເຈົ້າການຢ່າງຕັ້ງໜ້າເຂົ້າໃນການຈັດຕັ້ງປະຕິບັດ ວຽກງານວິຊາສະເພາະຂອງຕົນ ດ້ວຍຄວາມຮັບຜິດຊອບສູງ ແລະ ແນໃສ່ເຮັດໃຫ້ການປະຕິບັດວຽກງານກວດກາ-ກວດສອບ ມີຄວາມເຂັ້ມແຂງ ຖືກຕ້ອງ ແລະ ສອດຄ່ອງກັບການພັດທະນາເສດຖະກິດ-ສັງຄົມ ປັດຈຸບັນ ທັງສອງອົງການໄດ້ຮ່ວມກັນເພີ່ມທະວີ ການຮ່ວມມືສອງຝ່າຍຫຼາຍຂຶ້ນ ໂດຍສະເພາະແມ່ນການເພີ່ມຂີດຄວາມສາມາດທາງດ້ານວຽກງານ ການປະສານງານ ແນໃສ່ໃຫ້ຂັ້ນຕອນການປະຕິບັດວຽກງານຕົວຈິງມີຄວາມຖືກຕ້ອງ ວ່ອງໄວ ປອດໃສ ແລະ ຕອບສະໜອງໄດ້ຄວາມຮຽກຮ້ອງຕ້ອງການໄລຍະໃໝ່ຂອງພັກ-ລັດຖະບານວາງອອກເປັນກ້າວໆ.
ສົກປີ 2014-2015 ການຈັດຕັ້ງປະຕິບັດວຽກງານກວດກາຕາມຜົນການກວດສອບ ເຫັນວ່າມີຫຼາຍໂຄງການຫຼາຍໜ້າວຽກໄດ້ຮັບການກວດກາ-ກວດສອບຢ່າງຈິງຈັງ ເປັນຕົ້ນແມ່ນ ໂຄງການກໍ່ສ້າງສູນພັດທະນາສີມືແຮງງານ ຢູ່ແຂວງຈຳປາສັກ ມູນຄ່າ 19 ຕື້ກີບ ເປັນໂຄງການທີ່ປະມູນບໍ່ຖືກລະບຽບ ໂດຍເຈົ້າຂອງໂຄງການປະມູນຍ່ອຍຫຼາຍຄັ້ງ ແຕ່ບໍລິສັດດຽວເປັນຜູ້ຊະນະປະມູນ ໂຄງການນອກແຜນຢູ່ແຂວງອັດຕະປື ຈຳນວນ 62 ໂຄງການ ມູນຄ່າຕາມສັນຍາ 121,53 ຕື້ກີບ ຊຳລະແລ້ວ 91 ຕື້ກວ່າກີບ ຍັງຄ້າງຊຳລະ 30 ຕື້ກວ່າກີບ ການຂຶ້ນທະບຽນ ຫົວໜ່ວຍທຸລະກິດຂອງຂະແໜງສ່ວຍສາອາກອນ ແລະ ຂະແໜງການຄ້າທີ່ເຫັນວ່າ ສະຖິຕິຫົວໜ່ວຍທຸລະກິດບໍ່ກົງກັນ ເຊິ່ງປັດຈຸບັນ ໄດ້ປະສານສົມທົບກັບກະຊວງການເງິນ ແລະ ທ້ອງຖິ່ນ ກຳລັງດຳເນີນການເກັບກຳຂໍ້ມູນຄືນໃໝ່ໃນຂອບເຂດທົ່ວປະເທດ ກວດກາການຍົກເວັ້ນພາສີ-ອາກອນນຳເຂົ້າ-ສົ່ງອອກສິນຄ້າຂອງບັນດາດ່ານທົ່ວປະເທດ ຕົວເລກນຳເຂົ້າ-ສົ່ງອອກສິນຄ້າຍົກເວັ້ນພາສີ-ອາກອນຕົວຈິງນຳກົມອາກອນທັງໝົດ 2.698,49 ຕື້ກີບ ສົມທຽບໃສ່ຕົວເລກຜົນການກວດສອບສົ່ງໃຫ້ 2.407,28 ຕື້ກີບ ຜິດດ່ຽງເພີ່ມຂຶ້ນ 29,21 ຕື້ກີບ ສາເຫດເນື່ອງຈາກຍັງມີຕົວເລກການຍົກເວັ້ນພາສີ-ອາກອນ ບາງລາຍການທີ່ກົມພາສີສະຫຼຸບເຂົ້າບໍ່ທັນໝົດ ເຊັ່ນ: ການຍົກເວັ້ນພາສີ-ອາກອນ ສົ່ງອອກຝຸ່ນ ຖ່ານຫີນ ທາດລະເບີດ ແລະ ສານເຄມີ ເປັນຕົ້ນ ພ້ອມນັ້ນ ການຈັດຕັ້ງປະຕິບັດວຽກງານກວດກາ-ກວດສອບ ກ່ຽວກັບການນຳເຂົ້າພາຫະນະຂອງ 6 ກະຊວງ ຈຳນວນ 92 ຄັນ ຄ່າຍົກເວັ້ນພາສີ-ອາກອນ 28,16 ຕື້ກີບ ເຫັນວ່າພາຫະນະສ່ວນຫຼາຍ ຖືກນຳໃຊ້ເຂົ້າໃນການຈັດຕັ້ງປະຕິບັດວຽກງານຂອງພາກລັດ ແຕ່ຍັງມີພາຫະນະຈຳນວນ 4 ຄັນ ໄດ້ຖືກສວຍໂອກາດ ສວຍໃຊ້ຂຶ້ນທະບຽນເປັນຂອງບຸກຄົນ ເຊິ່ງກ່ຽວກັບບັນຫາດັ່ງກ່າວ ອົງການກວດກາ ແລະ ອົງການກວດສອບ ໄດ້ເອົາໃຈໃສ່ຄົ້ນຄວ້າ-ປັບປຸງຄືນການປະຕິບັດວຽກງານດັ່ງກ່າວຢ່າງເຂັ້ມງວດ ແລະ ສອດຄ່ອງ.
ແຫລ່ງຂ່າວ: ໜັງສືພິມວຽງຈັນໃໝ່