ແຂວງຄໍາມ່ວນ ຢືນຢັນວ່າມີນັກສຶກສາ ຮຽນຈົບມາໄດ້ 2 ສົກຮຽນ ແຕ່ຍັງບໍ່ໄດ້ບັນຈຸເຂົ້າເປັນຄູອາຈານ ໃນໂຮງຮຽນແຕ່ລະແຫ່ງ ຍ້ອນເກີດສະພາບ ພະນັກງານເຫລືອບໍ່ພໍ ຂະນະທີ່ຕົວເລກ ຄູສອນພາກລັດ ທັງໝົດສົກປີ 2017-2018 ມີປະມານ 4.176 ຄົນ , ຍິງ 2.359 ຄົນ ສ່ວນຄູເອກະຊົນມີ 219 ຄົນ , ຍິງ 180 ຄົນ ໃນນັ້ນວຸດທິການສຶກສາ ປະລິນຍາໂທ 14 ຄົນ , ປະລິນຍາຕີ 821 ຄົນ , ຊັ້ນສູງ 2.148 ຄົນ , ຊັ້ນກາງ 1.518 ຄົນ ແລະ ຊັ້ນຕົ້ນ 168 ຄົນ .
ຫວ່າງບໍ່ດົນມານີ້ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ລົງມາເຄື່ອນໄຫວ ແລະ ເຮັດວຽກຢູ່ ແຂວງຄໍາມ່ວນ ເຊິ່ງໃຫ້ການຮັບຕ້ອນຂອງ ທ່ານ ສີໄຮ ແກ້ວໄກຖິ່ນ ຫົວໜ້າພະແນກ ສຶກສາທິການ ແລະ ກິລາແຂວງ
ໃນໂອກາດດັ່ງກ່າວນີ້ ທ່ານ ສີໄຮ ແກ້ວໄກຖິ່ນ ໄດ້ລາຍງານສະພາບການໂດຍຫຍໍ້ວ່າ: ແຂວງຄໍາມ່ວນ ມີ 10 ຕົວເມືອງ , ມີ 582 ບ້ານ , ມີ 75.276 ຄອບຄົວ , ມີ 57 ກຸ່ມບ້ານ , ມີ 3 ຈຸດສຸມພັດທະນາຂອງແຂວງຄື : ກໍ່ແມ່ນແຂວງໜຶ່ງ ທີ່ໄດ້ເອົາໃຈໃສ່ພັດທະນາ ວຽກງານການສຶກສາ ເຊິ່ງທົ່ວແຂວງໂຮງຮຽນລ້ຽງເດັກ – ອະນຸບານ ທັງໝົດ 182 ແຫ່ງ, ຈໍານວນໂຮງຮຽນປະຖົມມີທັງໝົດ 620 ແຫ່ງ, ຈໍານວນໂຮງຮຽນ ມັດທະຍົມສຶກສາທັງໝົດ 136 ແຫ່ງ ໃນນັ້ນ ຈໍານວນນັກຮຽນມັດທະຍົມສຶກສາ ທັງໝົດ 37.343 ຄົນ, ຍິງ 18.500 ຄົນ; ໂຮງຮຽນອາຊີວະສຶກສາທັງໝົດ 6 ແຫ່ງ (ພາກລັດ 2 ແຫ່ງ, ພາກເອກະຊົນ 4 ແຫ່ງ), ມີຈໍານວນນັກຮຽນທັງໝົດ 3.297 ຄົນ, ຍິງ 1.642 ຄົນ; ມີຄູສອນພາກລັດທັງໝົດ 4.176 ຄົນ.
ທ່ານ ສີໄຮ ແກ້ວໄກຖິ່ນ ໄດ້ກ່າວຕື່ມອີກວ່າ : ຄຽງຄູ່ກັບສິ່ງຕັ້ງໜ້າ ໃນສົກຮຽນຜ່ານມາ ຍັງມີຫລາຍຂໍ້ຫຍຸ້ງຍາກ ແລະ ບັນຫາທີ່ ຈະຕ້ອງແກ້ໄຂເຊັ່ນ : ບັນຫາຄຸນນະພາບ ການຮຽນ–ການສອນ ໃນຊັ້ນ ປະຖົມສຶກສາບາງເມືອງຍັງຕໍ່າ , ຈໍານວນນັກຮຽນປະລະ ແລະ ອອກໂຮງຮຽນກາງປີ ໂດຍສະເພາະໃນຂັ້ນປ 1, ຕິດຕາມ ແລະ ການບໍລິຫານຄຸ້ມຄອງ ໂຮງຮຽນຍັງບໍ່ເປັນລະບົບ ແລະ ຕໍ່ເນື່ອງ , ປຸກລະດົມ, ຊຸກຍູ້ການສ້າງເຮືອນພັກໃຫ້ ແລະ ນັກ ຮຽນໃນເຂດຫ່າງໄກສອກຫລີກ ຍັງບໍ່ທົ່ວເຖິງ ພ້ອມນີ້ແຕ່ໃນສົກຮຽນ 2016 – 2017 ໄດ້ຮັບ ອະນຸມັດຕົວເລກ ລັດຖະກອນທົ່ວແຂວງພຽງແຕ່ 108 ຄົນ ແລະ ໄດ້ສອບເສັງຄັດເລືອກ ເອົາສະເພາະແຕ່ຄູ ທີ່ເຮັດໜ້າທີ່ສອນຊ່ວຍ ເຊິ່ງມີຄູອະ ນຸບານ 23 ຄົນ, ຄູປະຖົມ 27 ຄົນ ແລະ ຄູມັດທະຍົມ 58 ຄົນ. ປະຈຸບັນນີ້ຄູສອນຊ່ວຍ ຍັງເຫລືອ 813 ຄົນ, ຍິງ 572 ຄົນ, ມີນັກສຶກສາທີ່ຮຽນຈົບມາ 2 ສົກຮຽນ ( ບໍ່ນັບຄູສອນຊ່ວຍ ) ທີ່ຍັງວ່າງງານຢູ່ປະມານ 1.000 ກວ່າຄົນ ເຊິ່ງຍັງບໍ່ໄດ້ບັນຈຸເຂົ້າ ເປັນພະນັກງານ ຫລື ຄູອາຈານເທື່ອ ຍ້ອນສະເພາະ ພະນັກງານເຫລືອບໍ່ພໍ, ສະພາບການບັນຈຸ ແລະ ນໍາໃຊ້ຄູຍັງບໍ່ທັນມີ ປະສິດທິພາບເຫັນໄດ້ວ່າຍັງມີສະພາບຄູເຫລືອບໍ່ພໍຢູ່ໃນລະບົບ, ບາງວິຊາມີຫລາຍ ແລະ ຂາດບາງວິຊາທີ່ຈໍາເປັນ.
ແຫລ່ງຂ່າວໂດຍ : ແດງສະຫວັດ ແສນພານິດ