ຫລາຍຄົນຈະເຄີຍໄດ້ຍິນ ປະໂຫຍກທີ່ວ່າ ” ກິນໄວ ເຮັດໃຫ້ຕຸ້ຍ ” ຫລາຍຄົນສົງໄສວ່າ ການກິນໄວ ຫລື ຊ້າກ່ຽວຫຍັງກັບນ້ຳໜັກ ຫລື ຄວາມຕຸ້ຍ ເພາະເບິ່ງຈັ່ງໃດ ກໍບໍ່ໜ້າຈະກ່ຽວ ແຖມສຸດທ້າຍແລ້ວອາຫານກໍເຂົ້າໄປຢູ່ໃນກະເພາະຄືກັນ ຫາກຍັງສົງໄສກັນຢູ່ ມື້ນີ້ເຮົາມີຂໍ້ມູນມາໄຂຂໍ້ຂ້ອງໃຈໃຫ້ທຸກຄົນແລ້ວ
ມີງານວິໄຈຢູ່ເລື່ອງໜຶ່ງທີ່ຂ້ອນຂ້າງເປັນທີ່ໜ້າສົນໃຈ ໃຫ້ຂໍ້ມູນວ່າ “ຄົນ ກິນໄວ ຕຸ້ຍໄວ ຄົນກິນຊ້າຕຸ້ຍຊ້າ ” ເລື່ອງຂອງເລື່ອງຄື ມີຂໍ້ຄວາມຈິງຢູ່ບ່ອນວ່າ ຄົົນທີ່ກຳລັງຈະຕຸ້ຍຫລື ຕຸ້ຍຢູ່ແລ້ວ ສ່ວນໃຫຍ່ຈະເປັນຄົນ ກິນໄວ ກິນຫລາຍ ອາຫານໜັກໄປທາງໄຂມັນ ໜັກແປ້ງ
ອາຫານໄຂມັນສູງຈະຊ່ວຍໃຫ້ອາຫານແຊບຫລາຍຂຶ້ນ ເຮັດໃຫ້ກິນໄດ້ຫລາຍ ແຕ່ມີຄົນຈຳນວນບໍ່ນ້ອຍທີ່ກິນໄຂມັນແຕ່ບໍ່ຕຸ້ຍ ຂຶ້ນຢູ່ກັບວິທີການກິນນໍາອີກ ຄວາມຫິວຂອງຄົນເຮົາ ເກີດຂຶ້ນເມື່ອລະດັບນ້ຳຕານໃນເລືອດຕ່ຳລົງເຖິງລະດັບໜຶ່ງ ສະຫມອງຈະສັ່ງງານວ່າ“ຫິວ” ເມື່ອໄດ້ກິນອາຫານໄປໄລຍະໜຶ່ງ ນ້ຳຕານໃນເລືອດສູງຂຶ້ນເຖິງລະດັບໜຶ່ງ ສະຫມອງກໍສັ່ງງານອອກມາວ່າ“ອີ່ມ”
ບັນຫາຂອງຄວາມຕຸ້ຍຢູ່ບ່ອນວ່າ ສະຫມອງມັກຈະຕອບສະຫນອງຕໍ່ການສູງຂຶ້ນຂອງນ້ຳຕານຂ້ອນຂ້າງຊ້າ ນ້ຳຕານສູງຂຶ້ນປະມານ 15ນາທີ ແລ້ວສະຫມອງຫາກໍ່ຈະສັ່ງການ ແລະ ການທີ່ສະຫມອງສັ່ງການຊ້າແບບນີ້ ນີ້ເອງ ທີ່ເປັນສາເຫດໜຶ່ງທີ່ເຮັດໃຫ້ຄົນຈຳນວນບໍ່ໜ້ອຍກິນອາຫານເກີນກວ່າທີ່ຕົນເອງຕ້ອງການ ໂດຍສະເພາະຢ່າງຍິ່ງຄົົນທີ່ກິນອາຫານໄວ
ອາການ ກິນໄວ ຖືບ່ວງໄວ້ຕະຫລອດເວລາ ອາຫານຢູ່ໃກ້ປາກ ຕັກນັ້ນຕັກນີ້ກິນ ຫຍ້ຳໄວ ກືນໄວ ອາຫານເຂົ້າສູ່ທ້ອງໄປຫລາຍຈົນຍ່ອຍບໍ່ທັນ ນ້ຳຕານໃນເລືອດສູງຂຶ້ນ ຊ້າກວ່າຄວາມໄວທີ່ອາຫານລົງກະເພາະ ສະຫມອງທີ່ຕອບສະຫນອງຊ້າຢູ່ແລ້ວ ກວ່າສະຫມອງຈະສັ່ງການວ່າອິ່ມໄດ້ ພະລັງງານທີ່ຮ່າງກາຍໄດ້ຮັບ ກໍອາດເພີ່ມຂຶ້ນໄປຫລາຍສິບເປີເຊັນ ຫລາຍກວ່າທີ່ຮ່າງກາຍຕ້ອງການ ເຫດການຢ່າງນີ້ເກີດຂຶ້ນຫລາຍເທື່ອ ຄວາມຕຸ້ຍກໍບໍ່ໜີໄປໃສ
ຄົນຕຸ້ຍ ຫລື ຄົົນທີ່ກຳລັງຈະຕຸ້ຍ ຈຶ່ງມັກຈະເປັນຄົົນທີ່ກິນອາຫານໄວ ໄດ້ຮັບອາຫານເກີນປົກກະຕິໂດຍທີ່ຕົນເອງບໍ່ຮູ້ໂຕ ນັ່ງກິນເຂົ້າຢູ່ກັບຄົນອື່ນ ຕົນເອງກິນຈານທີ່ສອງເຂົ້າໄປແລ້ວ ໝູ່ຮ່ວມໂຕະທີ່ບໍ່ຕຸ້ຍ ອາດຈະຍັງກິນຈານທໍາອິດບໍ່ຮຽບຮ້ອຍຊ້ຳ ຫາກເຫດການແບບນີ້ເກີດຂຶ້ນ ຕ້ອງຫາທາງຢຸດແລ້ວ ເພາະຫາກປ່ອຍໃຫ້ຕຸ້ຍ ການທີ່ຈະຫລຸດໃຫ້ລົງມາຄືເກົ່ານັ້ນ ເຮັດໄດ້ຂ້ອນຂ້າງຍາກ ໃຜທີ່ສັງເກດວ່າ ຕົນເອງກິນອາຫານໄວ ກຳລັງຈະຕຸ້ຍ ຫລື ຕຸ້ຍແລ້ວກໍຕາມ ຫາກຕ້ອງການຈະຫລຸດ ວິທີການທີ່ບໍ່ຍາກຈົນເກີນໄປຫລາຍຄື ຕ້ອງຫລຸດຄວາມໄວ ຂອງການກິນລົງໃຫ້ໄດ້ ຕ້ອງກິນຢ່າງມີສະຕິໃຫ້ຄວາມໄວຂອງການສັ່ງງານຂອງສະຫມອງສອດຄ່ອງກັບຄວາມໄວ ທີ່ອາຫານເດີນທາງລົງກະເພາະ
ການກິນຊ້າ ຈະເຮັດໃຫ້ຮ່າງກາຍໄດ້ຮັບພະລັງງານເໝາະສົມໄປໂດຍອັດໂນມັດ ໃຜທີ່ຕຸ້ຍຢູ່ແລ້ວ ຫລື ກຳລັງຈະຕຸ້ຍ ຕ້ອງເລີ່ມເຝີກການກິນຊ້າ ຄື ຄ່ອຍໆຫຍ້ຳ ຕົວຢ່າງ ມີການແນະນຳໃຫ້ຫຍ້ຳອາຫານແຕ່ລະຄຳພຽງ 50ເທື່ອ ແຕ່ໃນກໍລະນີນີ້ບໍ່ຈຳເປັນຕ້ອງນັບ
ຕັກອາຫານເຂົ້າປາກແລ້ວວາງບ່ວງໄວ້ຂ້າງຈານ ຂະນະຫຍ້ຳອາຫານທຸກເທື່ອ ຈະເຮັດໃຫ້ຄວາມໄວໃນການກິນຫລຸດລົງໄປໄດ້ເອງ ຄ່ອຍໆຫຍ້ຳ ບໍ່ຕ້ອງຮີບຮ້ອນ ຫາກມີໝູ່ຮ່ວມໂຕະກໍອາດຈະໂອ້ລົມກັບໝູ່ ເພື່ອເອົາສະມາທິອອກຈາກອາຫານ ຫາກກິນອາຫານໄດ້ໜຶ່ງຄຳ ກິນນ້ຳໄປໜ້ອຍໆ ຈະເຮັດໃຫ້ກະເພາະເຕັມໄວ ໃນຂະນະທີ່ນ້ຳຕານໃນເລືອດຄ່ອຍໆສູງຂຶ້ນ
ຢ່າກິນຈົນຮູ້ສຶກອິ່ມ ແຕ່ໃຫ້ກິນຈົນຮູ້ສຶກວ່າ ບໍ່ຢາກແລ້ວໃຫ້ຢຸດ ເພື່ອໃຫ້ກະເພາະມີຊ່ອງວ່າງສຳລັບການຍ່ອຍໄດ້ ລອງກິນອາຫານໜຶ່ງຈານໂດຍໃຊ້ເວລາພຽງ 20ນາທີເບິ່ງນຳ ກິນພຽງໃຫ້ເຊົາຢາກແລ້ວຢຸດ ຫາກເຮັດໄດ້ແບບນີ້ ພະລັງງານທີ່ໄດ້ຮັບຕໍ່ມື້ຈະຫລຸດລົງ ຄວາມຕຸ້ຍທີ່ເຄີຍສະສົມໄວ້ ຈະເລີ່ມຫລຸດລົງໄດ້ເອງຊ້າໆ