ສຳນັກຂ່າວຕ່າງປະເທດ ລາຍງານໃນວັນທີ 12 ກໍລະກົດຜ່ານມານີ້ວ່າ ໂຄສົກກະຊວງບໍ່ແຮ່ ແລະ ພະລັງງານກຳປູເຈຍ ໄດ້ອອກມາເປີດເຜີຍ ລັດຖະບານກຳປູເຈຍໄດ້ຕົກລົງຫ້າມສົ່ງອອກດິນຊາຍທັງໝົດ ເນື່ອງຈາກຖືກກົດດັນຈາກກຸ່ມນັກສິ່ງແວດລ້ອມ ທີ່ຮຽກຮ້ອງໃຫ້ຢຸຕິການຂຸດບໍ່ຊາຍເພື່ອສົ່ງອອກ ເພາະສົ່ງຜົນກະທົບຕໍ່ລະບົບນິເວດຊາຍຝັ່ງ ແລະ ພື້ນທີ່ອ້ອມຮອບຢ່າງຮຸນແຮງ.

ການຕັດສິນໃຈດັ່ງກ່າວຂອງລັດຖະບານກຳປູເຈຍ ຖືເປັນການສິ້ນສຸດຢ່າງເປັນທາງການ ສຳລັບການຂາຍດິນຊາຍໃຫ້ແກ່ສິງກະໂປທີ່ດຳເນີນມາເປັນເວລາຫລາຍປີ, ທັງນີ້ ສິງກະໂປ ເປັນຕະຫລາດຊື້ດິນຊາຍລາຍໃຫຍ່ຂອງກຳປູເຈຍ ເພື່ອນຳໄປຖົມຂະຫຍາຍພື້ນທີ່ຊາຍຝັ່ງຂອງປະເທດ ໂດຍອີງຕາມຂໍ້ມູນຈາກລັດຖະບານກຳປູເຈຍ ສິງກະໂປໄດ້ນຳເຂົ້າດິນຊາຍແລ້ວທັງໝົດ ປະມານ 16 ລ້ານໂຕນ ນັບຕັ້ງແຕ່ປີ 2007 ເປັນຕົ້ນມາ, ໃນຂະນະທີ່ຕົວເລກຂອງ ອົງການສະຫະປະຊາຊາດ ໄດ້ລະບຸວ່າ ສິງກະໂປນຳເຂົ້າດິນຊາຍຈາກກຳປູເຈຍ ຫລາຍກວ່າ 72 ລ້ານໂຕນ ມູນຄ່າກວ່າ 740 ລ້ານໂດລາ ນັບຕັ້ງແຕ່ປີ 2007 ເປັນຕົ້ນມາ.