ເວັບໄຊຂ່າວໂຕກຽວ ເດລີ່ ນິວສ໌ຂອງຍີ່ປຸ່ນລາຍງານເມື່ອວັນທີ 7 ມິຖຸນາ 2017 ວ່າ ນາຍົກລັດະມົນຕີ ຊິນໂຊ ອາເບະ ຂອງຍີ່ປຸ່ນ ແລະ ນາຍົກລັດຖະມົນຕີ ສປປ ລາວ ທ່ານ ທອງລຸນ ສີສຸລິດ ໄດ້ພົບປະຫາລືກັນກ່ຽວກັບແຜນພັດທະນາໃນລາວ ແລະ ຫົວຂໍ້ທີ່ສຳຄັນຫຼາຍດ້ານ.
ລະຫວ່າງການພົບປະກັນທີ່ນະຄອນຫຼວງວຽງຈັນ ເມື່ອເດືອນ ກັນຍາ 2016 ປີທີ່ຜ່ານມາ ທ່ານ ອາເບະ ແລະ ທ່ານ ທອງລຸນ ໄດ້ຕົກລົງການລົງທຶນດ້ານການຄົມມະນາຄົມຂົນສົ່ງ, ໂຮງງານຜະລິດກະແສໄຟຟ້າ, ຊັບພະຍາກອນມະນຸດ, ວຽກງານກະສິກຳ ແລະ ວຽກງານສາທາລະນະສຸກ ແລະ ຄາດວ່າການພົບປະຢຽມຢາມໃນເທື່ອນີ້ທີ່ນະຄອນ ຫຼວງໂຕກຽວ ຜູ່ນຳທັງສອງປະເທດຈະຫາລືກ່ຽວກັບການດຳເນີນຕາມແຜນການທີ່ວາງໄວ້ຢ່າງເປັນຮູບປະທຳ ເຊິ່ງຈະຮວມໄປເຖິງການສະໜັບສະໜູນຂອງລັດຖະບານຍີ່ປຸ່ນ ຕໍ່ຄວາມພະຍາຍາມໃນການສ້າງຄວາມໝັ້ນຄົງທາງດ້ານການເງິນຂອງລັດຖະບານລາວ ຮວມທັງການຂະຫຍາຍອາຄານທີ່ພັກຜູ່ໂດຍສານສະໜາມບິນສາກົນວັດໄຕ ແລະ ທຶນການສຶກສາທີ່ຍີ່ປຸ່ນໃຫ້ກັບພະນັກງານ ແລະ ນັກສຶກສາຂອງລາວ.
ແລະ ໃນຕອນເຊົ້າຂອງວັນພຸດ ທ່ານ ຟູມິໂອະ ຄິຊິດະ ລັດຖະມົນຕີກະຊວງການຕ່າງປະເທດຍີ່ປຸ່ນ ແລະ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວ ໄດ້ຫາລືກ່ຽວກັບແຜນລິເລີ່ມທີ່ກຳລັງດຳເນີນການລະຫວ່າງ 2 ປະເທດ.