ເວັບໄຊ ຂ່າວສົດ ອອນໄລນ໌ ແລະ ບີບີຊີລາຍງານຂ່າວວ່າ ເມື່ອວັນທີ 8 ພຶດສະພາ 2017 ທີ່ຜ່ານມາວ່າ ພັກຄອມມູນິດຫວຽດນາມປະກາດປົດຕຳແໜ່ງ ທ່ານ ດິງ ລາ ທາງ ໄວອາຍຸ 57 ປີ ເລຂາພັກຄອມມູນິດປະຈຳນະຄອນຫຼວງ ໂຮຈີມິນ ອອກຈາກການເປັນສະມາຊິກຄະນະກຳມະການກົມການເມືອງ ເນື່ອງຈາກບໍລິຫານງານຜິດພາດ ແລະ ລະເມີດລະບຽບຢ່າງຮ້າຍແຮງໃນຕຳແໜ່ງປະທານຄະນະກຳມາທິການບໍລິຫານ ເປໂຕຣຫວຽດນາມ ບໍລິສັດນ້ຳມັນ ແລະ ແກ໊ດ ເຊິ່ງມີລັດຖະບານເປັນເຈົ້າຂອງ.
ສື່ທ້ອງຖິ່ນຂອງຫວຽດນາມໄດ້ລາຍງານເພີ່ມເຕີມວ່າ ທາງຄະນະກຳມາທິການກວດສອບວິໄນສ່ວນກາງເປີດການສອບສວນໃນເດືອນເມສາ ທີ່ຜ່ານມາ ແລະ ພົບວ່າທ່ານ ດິງ ໄດ້ອະນຸມັດໃຫ້ທະນາຄານໂອຊ້ຽນກູ້ຢືມເງິນຈາກເປໂຕຣຫວຽດນາມເຊິ່ງນຳໄປສູ່ການຂາດທຶນຢ່າງມະຫາສານ ນອກຈາກນີ້ຍັງແນະນຳໃຫ້ນາຍົກລັດຖະມົນຕີອະນຸມັດໂຄງການສຳປະທານທີ່ບໍ່ຜ່ານຂັ້ນຕອນການພິຈາລະນາຕາມກົດໝາຍຫຼາຍເທື່ອ.
ເຊິ່ງການທີ່ປົດທ່ານ ດິງ ອອກຈາກການເປັນສະມາຊິກຄະນະກຳມະການກົມການເມືອງ ຖືເປັນການເຄື່ອນໄຫວທີ່ເກີດຂຶ້ນໄດ້ຍາກໃນຫວຽດນາມ ແຕ່ເຖິງຢ່າງໃດກໍ່ຕາມ ທ່ານ ຫວຽນ ຝູ ຈ່ອງ ເລຂາທິການພັກຄອມມູນິດຫວຽດນາມ ພາຍໃຕ້ລັດຖະບານຊຸດໃໝ່ປະກາດເດີນໜ້າປາບປາມການຄໍຣັບຊັ່ນຢ່າງຈິງຈັງ.
ແຫຼ່ງຂ່າວ: ມະຕິຊົນຂ່າວສົດ