ຫຼາຍໆຄົນ ໂດຍສະເພາະພະນັກງານຫ້ອງການ ເມື່ອຮອດຕອນສວາຍໜັງກິນເຂົ້າສວາຍອື່ມໜັງຕາກໍ່ເລີ່ມໜັກ ເກີດອາການຢາກນອນຫຼັບພັກຜ່ອນສາຍຕາຂຶ້ນມາທັນທີ ໃນຄໍລຳ ສຸຂະພາບ ກັບ ລາວໂພສຕ໌ ມື້ນີ້ແອັດມິນຈະພາທຸກຄົນມາກວດເບິ່ງຮູ້ຈັກໄປພ້ອມໆກັນວ່າ ອາການຫາວນອນ, ເຫງົານອນທີ່ເຮົາເປັນກັນຢູ່ປະຈຳນີ້ມັນຈະສົ່ງຜົນໃຫ້ຮ່າງກາຍຂອງເຮົາສ່ຽງເປັນໂຣກໃດແນ່ ຖ້າຢາກຮູ້ເຮົາມາອ່ານພ້ອມກັນເລີຍ.
1. ໂຣກນອນບໍ່ຫຼັບ
ກໍ່ຍ້ອນນອນບໍ່ຫຼັບນອນບໍ່ພໍ ໂດຍສະເພາະຄົນທີ່ຄິດເລື່ອງວຽກຫຼາຍ, ຄົນມັກນອນເດິກ ຫຼື ຄົນທ່ຽວເດິກ ມັກຈະມີອາການນີ້.
2. ໂຣກຮ່າງກາຍອ່ອນເພຍ
ໂຣກນີ້ມີຜົນຕໍ່ເນື່ອງມາຈາກໂຣກນອນບໍ່ຫຼັບ ເມື່ອຄົນທີ່ມີອາການນອນບໍ່ຫຼັບຕິດຕໍ່ກັນຫຼາຍຄືນກໍ່ຈະເຮັດໃຫ້ຮ່າງກາຍອ່ອນເພຍ ແລະ ຕ້ອງການການພັກຜ່ອນ ນອກຈາກນີ້ຍັງອາດມີສາເຫດອື່ນເນື່ອງຈາກການທີ່ທ່ານກິນອາຫານປະເພດແປ້ງ ແລະ ນ້ຳຕານຫຼາຍຈົນເກີນ ຈົນສົ່ງຜົນໃຫ້ຮ່າງກາຍຂອງທ່ານເກີດມີອາການອ່ອນເພຍ, ເມື່ອຍ, ຄວາມຈຳບໍ່ດີປານໃດ, ປວດຫົວ ແລະ ນອນຫຼັບບໍ່ສະໜິດດີ.
3. ໂຣກເບົາຫວານ
ເນື່ອງຈາກເລືອກມີປະລິມານນ້ຳຕານສູງ ແລະ ອາການມັກເຫງົານອນນີ້ເປັນສັນຍານທຳອິດທີ່ສະແດງ ຫຼື ເຕືອນໃຫ້ທ່ານຮູ້ວ່າຮ່າງກາຍຂອງທ່ານນັ້ນຢູ່ໃນພາວະນ້ຳຕານໃນເລືອກສູງອາດນຳໄປສູ່ໂຣກເບົາຫວານໄດ້.
4. ໂຣກລົມຫຼັບ
ຄົນທີ່ເປັນໂຣກນີ້ຕອນກາງເວັນຈະຢາກນອນເອົາແທ້ເອົາວ່າ ແຕ່ພໍຕົກກາງຄືນມາພັດຕາແຈ້ງບໍ່ຢາກນອນ ນອນຈັ່ງໃດກໍ່ບໍ່ຫຼັບ ໂຣກນີ້ຫາກປ່ອຍໃຫ້ເປັນດົນໆບໍ່ໄດ້ຮັບການຮັກສາ ຈະສົ່ງຜົນເສຍໃຫ້ກັບສຸຂະພາບຈິດທີ່ອາດກາຍເປັນຄົນຫງຸດງິດງ່າຍ ສະໝອງຊ້າ.
5. ໂຣກເລືອດຈາງ
ແມ່ຍິງຈະມີໂອກາດເປັນໂຣກເລືອດຈາງໄດ້ງ່າຍ ເພາະສາເຫດອາດມາຈາກການໄດ້ຮັບສານອາຫານທີ່ມີປະໂຫຍດບໍ່ພຽງພໍ ນອກຈາກນີ້ຍັງສູນເສຍເລືອດເນື່ອງຈາກມີປະຈຳເດືອນ ສ່ວນສາເຫດອື່ນຍັງມາຈາກການພັກຜ່ອນບໍ່ພຽງພໍ ຈິ່ງເຮັດໃຫ້ຮູ້ສຶກເມື່ອຍງ່າຍ, ບໍ່ສົດຊື່ນ ແລະ ມັກເຫງົານອນຢູ່ຕະຫຼອດ
6. ເປັນໂຣກແຜໃນກະເພາະອາຫານ ຫຼື ອະໄວຍະວະສ່ວນອື່ນໆໃນຮ່າງກາຍ
ຜູ້ທີ່ມີບັນຫາເລື່ອງກະເພາະ ແລະ ມັກຈະເປັນໂຣກຣິດສີດວງທະວານໜັກເລື່ອຍໆ ອາດເປັນສາເຫດຂອງການອ່ອນເພຍ ໜ້າມືດ ເປັນລົມງ່າຍ ອ່ອນແຮງ ແລະ ມັກເຫງົານອນຕະຫຼອດໄດ້ຄືກັນ.
ແຫລ່ງຂໍ້ມູນຈາກ: health.sanook.com