ວຽກງານຂະແໜງການເງິນ ເປັນວຽກງານທີ່ຫລໍ່ແຫລມ ຕິດພັນກັບເສດຖະກິດ, ປັດຈຸບັນພັກ-ລັດຖະບານ ກໍຄືກະຊວງການເງິນ ກຳລັງສຸມໃສ່ການຈັດຕັ້ງປະຕິບັດ ການຈັດເກັບ ລາຍຮັບເຂົ້າງົບປະມານ ໂດຍສະເພາະໃນສົກປີ 2017 ລັດຖະບານໄດ້ຕັ້ງເປົ້າເກັບລາຍຮັບ ໃຫ້ໄດ້ທັງໝົດປະມານ 23.941 ຕື້ກີບ, ໃນນີ້ລາຍຮັບພາຍໃນ 21.463 ຕື້ກີບ ແລະ ແຜນລາຍຈ່າຍ ງົບປະມານທັງໝົດ 32.402 ຕື້ກີບ, ຄາດຄະເນເງິນຂາດດຸນທັງໝົດ 8.461 ຕື້ກີບ. ສະນັ້ນ, ກະຊວງການເງິນ ຈຶ່ງໄດ້ອອກຂໍ້ຫ້າມ ແລະ ວິໄນຂອງພະນັກງານ-ລັດຖະກອນ ຂະແໜງການເງິນ ເພື່ອຄວາມເປັນແບບຢ່າງ ຂອງພະນັກງານ-ລັດຖະກອນ, ສະກັດກັ້ນຕ້ານພະຍາດອາດຍາສິດ ແລະປະກົດການຫຍໍ້ທໍ້ຕ່າງໆ ທີ່ເກີດຂຶ້ນທົ່ວຂະແໜງການເງິນ
ເພື່ອບັນລຸເປົ້າໝາຍ ການເກັບລາຍຮັບເຂົ້າງົບປະມານ ແຫ່ງຊາດ ທັງເປັນການສະກັດກັ້ນແລະ ຕ້ານການສໍ້ລາດບັງຫລວງ, ຫລີກລ້ຽງຈາກຫາງສຽງສັງຄົມ, ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ອອກຂໍ້ຕົກລົງສະບັບເລກທີ 1124/ກງ, ລົງວັນທີ 10 ເມສາ 2017 ວ່າດ້ວຍຂໍ້ຫ້າມ ແລະ ວິໄນ ຂອງພະນັກງານ-ລັດຖະກອນຂະແໜງການເງິນ ນັບແຕ່ສູນການຮອດທ້ອງຖິ່ນ ເຊິ່ງລວມມີ 10 ຂໍ້ມຫ້າມ ເຊັ່ນ:
- ຫ້າມສ້າງ ແລະ ລາຍງານຂໍ້ມູນທີ່ບໍ່ຖືກຕ້ອງ ແລະ ບໍ່ມີມູນຄວາມຈິງ, ສ້າງກຸ່ມກ້ອນ, ປັ່ນປ່ວນແບ່ງແຍກຄວາມສາມັກຄີພາຍໃນ ກໍ່ໃຫ້ເກີດຄວາມເສຍຫາຍ ຕໍ່ການຈັດຕັ້ງຫລືບຸກຄົນອື່ນ
- ຫ້າມສົມຮູ້ຮ່ວມຄິດ ເຊຶ່ອງອຳການກະທຳຜິດຂອງຜູ້ລະເມີດກົດໝາຍ ແລະ ລະບຽບການກ່ຽວກັບພາສີ, ສ່ວຍສາອາກອນ, ຊັບສິນຂອງລັດ, ທີ່ດິນ, ງົບປະມານຂອງລັດ ແລະ ກົດ ໝາຍລະບຽບການອື່ນ ຂອງຂະແໜງການເງິນ
- ຫ້າມສ້າງຄວາມຫຍຸ້ງຍາກ, ທ່ວງດຶງ, ແກ່ຍາວເວລາ ໃນການຄົ້ນຄວ້າແກ້ໄຂເອກະສານຕ່າງໆ ເພື່ອທວງເອົາ, ຂໍເອົາສ່ວນແບ່ງໂດຍທາງກົງ ຫລື ທາງອ້ອມ ເພື່ອຫາຜົນປະໂຫຍດສ່ວນຕົວ, ຄອບຄົວ, ຍາດພີ່ນ້ອງ, ຈຸ້ມເຈື້ອ, ພັກພວກ ຫລື ໝູ່ຄະນະ
- ຫ້າມເປັນນາຍໜ້າ, ເປັນທີ່ປຶກສາບັນຊີ, ຫົວໜ້າບັນຊີໃຫ້ແກ່ການເຄື່ອນໄຫວ ທຸລະກິດ, ການດຳເນີນຄະດີ, ສ້າງຄວາມເຄື່ອນໄຫວອຳນວຍຄວາມສະດວກ ໃຫ້ແກ່ບຸກຄົນ, ນິຕິບຸກຄົນເພື່ອເຄື່ອນໄຫວຄ້າຂາຍເຖຶ່ອນ, ຫລົບຫລີກເຊຶ່ອງອຳຄ່າພາສີ-ອາກອນ-ອາກອນ, ຊັບສິນຂອງລັດ ແລະ ອື່ນໆ ທີ່ຜິດກົດໝາຍ ແລະ ລະບຽບການ
- ຫ້າມປອມແປງເອກະສານ, ຖານຂໍ້ມູນ, ໃບຮັບ (ເກັບ) ເງິນອາກອນ, ພາສີ, ຊັບສິນ, ຄັງເງິນ ແລະ ອື່ນໆ, ນຳໃຊ້ເອກະສານປອມແປງ ເພື່ອຫາຜົນປະໂຫຍດສ່ວນຕົວ, ຄອບຄົວ, ຍາດພີ່ນ້ອງ, ຈຸ້ມເຈື້ອ ຫລື ໝູ່ຄະນະ
- ຫ້າມປົກປິດສົມຮູ້ຮ່ວມຄິດເຊຶ່ອງອຳຂໍ້ມູນ, ຫລັກຖານ ຫລື ບົດລາຍງານການເງິນ, ດ້ານຈຳນວນ, ປະເພດ, ຊະນິດ, ບໍລິມາດ, ຈັດເລກລະຫັດ, ແຫລ່ງກຳເນີດ, ມູນຄ່າແຈ້ງສິນຄ້າເຄື່ອງຂອງ, ເກັບລາຍຮັບແລ້ວບໍ່ມອບ, ມອບບໍ່ຄົບຖ້ວນ ຫລື ມອບບໍ່ທັນກຳນົດ ເວລາເພື່ອອຳນວຍໃຫ້ນັກທຸລະກິດ ແບ່ງຜົນປະໂຫຍດສ່ວນຕົວ, ບຸກຄົນ ຫລື ນິຕິບຸກຄົນ, ຄອບຄົວ, ຍາດພີ່ນ້ອງ, ຈຸ້ມເຈື້ອ, ພັກພວກໝູ່ຄະນະ
- ຫ້າມໃຫ້ສິນບົນຜູ້ອື່ນ, ຮັບສິນບົນ, ທວງເອົາ, ຂໍເອົາສ່ວນແບ່ງ (ເປີເຊັນ) ເປັນວັດຖຸ, ເງິນຄຳ ຕ່າງໆ ໃນທຸກຮູບແບບຈາກນັກທຸລະກິດ ແລະ ຜູ້ປະກອບການອື່ນໆ, ເພື່ອຜົນປະໂຫຍດສ່ວນຕົວ, ຄອບຄົວ, ຍາດພີ່ນ້ອງ, ຈຸ້ມເຈື້ອ, ພັກພວກ ຫລື ໝູ່ຄະນະ
- ຫ້າມຍັກຍອກ, ສໍ້ໂກງເອົາຊັບສິນ, ເງິນຄຳຂອງລັດ, ລວມໝູ່, ຂອງປະຊາຊົນ ແລະ ນຳໃຊ້ງົບປະມານຊັບ, ສິນຂອງລັດລວມໝູ່ ຫລື ປຸກລະດົມການອຸປະຖຳ ໃນຮູບແບບຕ່າງໆ ເພື່ອເອົາໄປເຮັດຂອງຂວັນຂອງຕ້ອນ ເພື່ອຮັບໃຊ້ຜົນປະໂຫບດສ່ວນຕົວ, ຄອບຄົວ, ຍາດພີ່ນ້ອງ, ຈຸ້ມເຈື້ອ, ພັກພວກ ຫລື ໝູ່ຄະນະ
- ຫ້າມສວຍໃຊ້ໜ້າທີ່ ໃນການຕົກລົງ, ປອມແປງມາດຖານເຕັກນິກ, ບໍລິມາດ, ລາຄາຫົວໜ່ວຍ, ການປະມູນ, ການຈັດຊື້-ຈັດຈ້າງ, ສັນຍາສໍາປະທານ, ສັນຍາຮ່ວມທຶນ, ສັນຍາປ່ອຍກູ້, ໜັງສືຄ້ຳປະກັນ, ສັນຍາເຊົ່າກິດຈະການ, ຊັບສິນ, ລົງລາຍເຊັນຢັ້ງຢືນເອກະສານ ທີ່ບໍ່ມີຕົວຕົນ ແລະ ເອກະສານທາງລັດຖະການອື່ນໆ ທີ່ບໍ່ຖືກຕ້ອງຕາມກົດໝາຍ, ລະບຽບການ ເພື່ອຜົນປະໂຫຍດສ່ວນຕົວ, ຄອບຄົວ, ຍາດພີ່ນ້ອງ, ຈຸ້ມເຈື້ອ, ພັກພວກ ຫລື ໝູ່ຄະນະ
- ຫ້າມປະຕິເສດຕໍ່ຂໍ້ຕົກລົງ ກ່ຽວກັບການມອບໝາຍໜ້າທີ່, ຊັບຊ້ອນວຽກງານ, ຫ້າມເລືອກວຽກ
ນອກຈາກບັນດາຂໍ້ຫ້າມທີ່ໄດ້ລະບຸໄວ້ຂ້າງເທິງນີ້ ຕ້ອງໄດ້ປະຕິບັດຕາມຂໍ້ຫ້າມທີ່ກໍານົດໄວ້ ໃນກົດໝາຍ ແລະ ລະບຽບການອື່ນໆ.
ແຫຼ່ງຂ່າວ: ສຳນັກຂ່າວສານປະເທດລາວ
ຮູບພາບ: ຈາກອິນເຕີເນັດ