ສຳນັກຂ່າວຕ່າງປະເທດລາຍງານຈາກນະຄອນຫຼວງ ສະຕອກໂຮມ ປະເທດສະວີເດນ ເມື່ອວັນທີ 8 ເມສາ 2017 ກ່ຽວກັບຄວາມຄືບໜ້າຫຼັງເກີດເຫດຄົນຮ້າຍຂັບລົດບັນທຸກພຸ່ງຊົນຫ້າງສັບພະສິນຄ້າ “ອາເລນສ໌” ຕັ້ງຢູ່ທີ່ຖະໜົນຄວິນ ເຊິ່ງເປັນໜຶ່ງໃນເສັ້ນທາງສາຍຫຼັກໃນນະຄອນຫຼວງສະຕອກໂຮມ ເມື່ອວັນສຸກ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 4 ຄົນ ແລະ ໄດ້ຮັບບາດເຈັບ 15 ຄົນ ວ່າເຈົ້າໜ້າທີ່ສາມາດຈັບກຸມຕົວຜູ້ຕ້ອງສົງໃສໄດ້ຢ່າງໜ້ອຍ 1 ຄົນ ເປັນຊາຍຊາວອຸຊເບກິສຖານ ອາຍຸ 39 ປີ ແລະ ມີຄວາມເຊື່ອມໂຍງໃນຖານະຜູ້ສະໜັບສະໜູນກຸ່ມໄອເອສ ຂະນະທີ່ສື່ທ້ອງຖິ່ນຫຼາຍແຫ່ງລາຍງານວ່າມີການຈັບກຸມຕົວຜູ້ຕ້ອງສົງໃສຄົນທີ 2 ແລ້ວ ແຕ່ຕຳຫຼວດຍັງປະຕິເສດທີ່ຈະໃຫ້ຂໍ້ມູນເພີ່ມເຕີມໃນເລື່ອງນີ້
ຫຼັງເກີດເຫດນາຍົກລັດຖະມົນຕີ ສະເຕຟານ ເລີຟເວນ ສັ່ງຍົກລະດັບມາດຕະການຄວບຄຸມພົມແດນ ແລະ ປະນາມເຫດການທີ່ເກີດຂຶ້ນວ່າເປັນ “ການກໍ່ການຮ້າຍ” ເຊິ່ງຫາກໄດ້ຮັບການຢືນຢັນຈາກຝ່າຍສືບສວນ ຈະຖືວ່າເປັນການກໍ່ການຮ້າຍຄັ້ງທຳອິດໃນແຜ່ນດິນສະວິເດນທີ່ສົ່ງຜົນໃຫ້ມີຜູ້ເສຍຊີວິດ ແລະ ເປັນການກໍ່ການຮ້າຍໃນຄັ້ງທຳອິດໃນພາກພື້ນສະແກນດີເນເວຍ