ຕາມແຫຼ່ງຂ່າວຫ້ອງວ່າການສຳນັກງານນາຍົກລັດຖະມົນຕີ ລາຍງານໃນວັນທີ 29 ມີນາ 2017 ຜ່ານມາ ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ Liqun JIN ປະທານທະນາຄານລົງທຶນໂຄງລ່າງພື້ນຖານອາຊີ (AIIB) ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະເຮັດວຽກ ຢູ່ ສປປ ລາວ ລະຫວ່າງວັນທີ 29-31 ມີນາ 2017.
ການພົບປະໃນຄັ້ງນີ້ ໄດ້ພ້ອມກັນປຶກສາຫາລືບັນດາ ນະໂຍບາຍ, ການບໍລິຫານ ແລະການສະໜັບສະໜູນ ການພັດທະນາ ດ້ານພື້ນຖານໂຄງລ່າງ, ເຊິ່ງທະນາຄານລົງທຶນໂຄງລ່າງພື້ນຖານອາຊີ (AIIB) ມີຖານະທຽບເທົ່າກັບສະຖາບັນການເງິນອື່ນ ເປັນຕົ້ນສະຖາບັນກອງທຶນສາກົນ (IMF), ທະນາຄານໂລກ (WB), ທະນາຄານພັດທະນາອາຊີ (ADB).
ໃນໂອກາດນີ້, ທ່ານນາຍົກ ໄດ້ກ່າວສະແດງຄວາມຍິນດີ ແລະຊົມເຊີຍ ຕໍ່ການເດີນທາງ ມາເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້, ພ້ອມທັງ ຕີລາຄາສູງຕໍ່ການ ປະກອບສ່ວນພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະທີ່ຜ່ານມາ ແລະຫວັງຢ່າງຍິ່ງວ່າ ໃນຕໍ່ໜ້າທະນາຄານລົງທຶນໂຄງລ່າງພື້ນຖານອາຊີ (AIIB) ຈະສືບຕໍ່ໃຫ້ການສະໜັບສະໜູນ ວຽກງານດ້ານຕ່າງໆ ທີ່ມີເງື່ອນໄຂແກ່ ສປປ ລາວ ຕື່ມອີກ.