ໃນວັນທີ 24 ມີນາ 2017 ຜ່ານມາ ທີ່ບ້ານໂພນປາເປົ້າ ເມືອງສີສັດຕະນາກ ໄດ້ມີພິທີມອບ-ຮັບໂຄງການປັບປຸງພື້ນຖານໂຄງລ່າງໃນນະຄອນຫຼວງວຽງຈັນ (ນວ) ໂດຍມີທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ, ທ່ານນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ, ທ່ານນາງ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ, ທ່ານ ເນວິນ ສິນສິຣິ ຜູ້ອຳນວຍການສຳນັກງານການຮ່ວມມື ພັດທະນາເສດຖະກິດ ປະເທດເພື່ອນບ້ານ ແຫ່ງຣາຊະອານາຈັກໄທ ຜູ້ຕາງໜ້າສະຖານທູດໄທປະຈຳລາວ ແລະແຂກຖືກເຊີນເຂົ້າຮ່ວມ.
ໂຄງການດັ່ງກ່າວ ໄດ້ຮັບການສະໜັບສະໜູນເງິນກູ້ຢືມດອກເບ້ຍຕ່ຳ ຈາກສຳນັກງານການຮ່ວມມືພັດທະນາເສດຖະກິດປະເທດເພື່ອນບ້ານ ແຫ່ງຣາຊະອານາຈັກໄທ (NEDA) ມູນຄ່າ 313.370.000 ບາດ (ສະກຸນໄທ) ຫຼື ປະມານ 73,3 ຕື້ກີບ ເພື່ອນຳມາປັບປຸງ ແລະ ສ້ອມແປງເສັ້ນທາງສາຍຫຼັກຄື: ຖະໜົນກຳແພງເມືອງ ໄລຍະທີ I ແຕ່ສາມແຍກໄຟແດງທາດຫຼວງ ຫາສາມແຍກໂພນປາເປົ້າ ມີຄວາມຍາວ 3.200 ແມັດ ກວ້າງ 14,5 ແມັດ, ໄລຍະທີ II ແຕ່ສາມແຍກໄຟແດງໂພນປາເປົ້າ ຫາບ້ານໜອງໄຮ (ຮ້ານອາຫານມຸກມິວ) ມີຄວາມຍາວ 2.900 ແມັດ ກວ້າງ 14,5 ແມັດ, ເສັ້ນທາງແຕ່ສາມແຍກຖະໜົນ 23 ສິງຫາ (ຂ້າງກະຊວງການຕ່າງປະເທດ) ຜ່ານໄຟແດງນາໄຊ ຜ່ານສາມແຍກກົງສູນໄທ ຫາສາມແຍກໄຟແດງໂພນສີນວນ ມີຄວາມຍາວ 1.620 ແມັດ ກວ້າງ 11,4 ແມັດ ແລະເສັ້ນທາງແຕ່ວົງວຽນທາດຫຼວງ ຜ່ານສີ່ແຍກໄຟແດງທາດຫຼວງ ຫາສົ້ນຂວາບຶງທາດຫຼວງ ມີຄວາມຍາວ 1.830 ແມັດ ກວ້າງ 11,4 ແມັດ.
ໃນໂອກາດດຽວກັນນັ້ນ ທ່ານ ອຸ່ນເນື້ອ ສີລາວົງ ຮອງຫົວໜ້າພະແນກໂຍທາທິການ ແລະຂົນສົ່ງ ນວ ເວົ້າວ່າ: ໂຄງການປັບປຸງພື້ນຖານໂຄງລ່າງໃນ ນວ ເປັນໂຄງການບຸລິມະສິດໜຶ່ງ ທີ່ນອນຢູ່ໃນແຜນຍຸດທະສາດການພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຂອງ ນວ ເປັນໂຄງການທີ່ຖືກຈັດຕັ້ງປະຕິບັດ ເພື່ອຮັບໃຊ້ເນື່ອງໃນໂອກາດທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແນໃສ່ເພື່ອປັບປຸງສ້ອມແປງສະພາບເສັ້ນທາງທີ່ເປ່ເພ, ບູລະນະຮັກສາ ສະພາບເສັ້ນທາງ ທີ່ໄດ້ຮັບການກໍ່ສ້າງມາເປັນເວລາຫຼາຍປີ ໃຫ້ສາມາດຮັບໃຊ້ໄດ້ຍາວນານຂຶ້ນກວ່າເກົ່າ.
ແຫຼ່ງຂ່າວ: ໜັງສືພິມ ວຽງຈັນໃໝ່