ສຳນັກຂ່າວຊິນຫົວຂອງຈີນລາຍງານ ເມື່ອວັນທີ 20 ມີນາ 2017 ຜ່ານມາວ່າ ໂຮງງານໄຟຟ້າຖ່ານຫີນ Huaneng Beijing Thermal Power Plant ຖືກທາງການສັ່ງປິດ ເຊິ່ງຖືເປັນໂຮງໄຟຟ້າຂະໜາດໃຫຍ່ສຸດທ້າຍ ທີ່ຖືກສັ່ງປິດ, ເຮັດໃຫ້ປາກກິ່ງ ເປັນເມືອງທໍາອິດຂອງຈີນ ທີ່ມີໂຮງໄຟຟ້າພະລັງງານສະອາດທົ່ວເມືອງ
ການສັ່ງປິດໂຮງໄຟຟ້າຖ່ານຫີນ ຈະຊ່ວຍຫຼຸດການໃຊ້ຖ່ານຫີນໄດ້ເຖິງ 1.7 ລ້ານໂຕນ, ຫຼຸດການປ່ອຍກ໊າສຊັນເຟີໄດອອກໄຊໄດ້ 91 ໂຕນ, ກ໊າສໄນໂຕຣເຈນອອກໄຊປະມານ 285 ໂຕນ ແລະຝຸ່ນລະອອງ 110 ໂຕນ ເຊິ່ງກ່ອນໜ້ານີ້ ໂຮງງານອີກ 3 ແຫ່ງ ທີ່ເຄີຍໃຊ້ຖ່ານຫີນ 6.8 ລ້ານກວ່າໂຕນ/ປີ ກໍຖືກສັ່ງປິດຕົວໄປແລ້ວໃນລະຫວ່າງປີ 2014-2015 ຜ່ານມາ
ສຳລັບໂຮງໄຟຟ້າຖ່ານຫີນ Huaneng Beijing ຕັ້ງຂຶ້ນໃນປີ 1999 ຕັ້ງຢູ່ບໍລິເວນ ຊານເມືອງທາງຕາເວັນອອກຂອງປາກກິ່ງ, ເດີນເຄື່ອງເຜົາໄໝ້ຖ່ານຫີນ 5 ເຄື່ອງ, ມີກຳລັງການຜະລິດທັງໝົດ 8.4 ແສນກິໂລວັດ ແລະບັນຈຸຄວາມຮ້ອນ 26 ລ້ານຕາລາງແມັດ
ປະຈຸບັນນະຄອນຫຼວງປາກກິ່ງ ມີໂຮງໄຟຟ້າ 27 ແຫ່ງ ທີ່ຜະລິດຈາກພະລັງງານສະອາດ ມີກຳລັງການຜະລິດ 11.3 ລ້ານກິໂລວັດ