ຜູ້ທີ່ເປັນພະຍາດຕັບອັກເສບ ທີ່ເກີດຈາກເຊື້ອໄວຣັດ ພື້ນຖານສຳຄັນທີ່ຈະຊ່ວຍໃຫ້ເຊວຂອງຕັບຟື້ນຕົວໄດ້ໄວຂຶ້ນ ຖ້າໃຫ້ອາຫານທີ່ພຽງພໍ ແລະເໝາະສົມດັ່ງນີ້: ການໃຫ້ພະລັງງານ ໃນໄລຍະນອນພັກຜ່ອນ ກໍຕ້ອງໃຫ້ພະລັງງານຫຼາຍພຽງພໍ ເຖິງແມ່ນລຸກຈາກຕຽງໄດ້ ແຕ່ບໍ່ໄດ້ອອກແຮງງານປົກກະຕິ ມັກຈະໃຫ້ພະລັງງານ 2,500-3,000 ກິໂລແຄລໍລີ່/ວັນ ໃຫ້ພຽງພໍກັບຄວາມຕ້ອງການພະລັງງານ ເພື່ອຊ່ອມແຊມ ເນື້ອເຍື່ອຊົດເຊີຍກັບການເຜົາຜານ ທີ່ສູງຂຶ້ນໃນໄລຍະເປັນໄຂ້ ບໍ່ສະບາຍ, ໃຫ້ຜູ້ປ່ວຍໄດ້ຟື້ນຕົວ ມີກຳລັງ ແລະສຸຂະພາບດີ
- ໂປຣຕີນ: ຕ້ອງໄດ້ຮັບພຽງພໍ ເພື່ອໃຫ້ຕັບໄດ້ມີໂອກາດຊ່ອມແຊມ ຟື້ນຟູເຊວທີ່ອັກເສບ, ຮ່າງກາຍຂອງຄົນເຈັບຈະມີການສະຫຼາຍຕົວຂອງໂປຣຕີນຫຼາຍ ຄວນໃຫ້ໂປຣຕີນຄຸນນະພາບດີເຊັ່ນ: ນົມ, ໄຂ່, ຄວນໄດ້ຮັບມື້ລະ 1.5-2 ກຣາມ/ນໍ້າໜັກຕົວຈິງ 1 ກິໂລກຣາມ/ວັນ ໃນໂປຣຕີນ ມີສານຈຳເປັນທີ່ປ່ຽນໄຂມັນໃຫ້ເປັນ ໄລໂປໂປຣຕີນ ແລະຖືກພາອອກຈາກຕັບ
- ຄາໂບໄຮເດດ: ຕ້ອງໄດ້ຮັບພຽງພໍ ເພື່ອໃຫ້ຮ່າງກາຍສ້າງ ແລະສະສົມ ໄກຣໂຄເຈນໃນຕັບ ແລະເພື່ອໃຫ້ໄດ້ພະລັງງານທີ່ພຽງພໍ ຈະຊ່ວຍປ້ອງກັນບໍ່ໃຫ້ຖືກເອົາມາສະຫຼາຍຕົວ ເພື່ອເຜົາຜານເປັນພະລັງງານແທນ ຈຶ່່ງຄວນມີຄາໂບໄຮເດດ 50-55% ຂອງພະລັງງານທີ່ໄດ້ຮັບ
- ໄຂມັນ: ໃຫ້ໄດ້ຮັບປານກາງ (ບໍ່ຫຼາຍເກີນໄປ) ຈະຊ່ວຍໃຫ້ອາຫານມີລັກສະນະ ລົດຊາດດີ, ຄວນໃຫ້ໄຂມັນ 25-40% ຂອງພະລັງງານທີ່ໄດ້ຮັບຈາກອາຫານ ຫຼືວັນລະປະມານ 80-100 ກຣາມ
- ວິຕາມິນ: ເສີມທັງວິຕາມິນທີ່ລະລາຍໃນໄຂມັນ ແລະລະລາຍໃນນໍ້າ ຫຼືປະລິມານນໍ້າ ຄວນໃຫ້ວັນລະ 3,000 ຊີຊີ ຈະເຮັດໃຫ້ຜູ້ປ່ວຍຮູ້ສຶກສົດຊື່ນ ບໍ່ຫິວນໍ້າ ແລະອາດມີຄວາມຢາກອາຫານຫຼາຍຂຶ້ນ
ສຳລັບຂໍ້ຄວນລະວັງ: ພະຍາດນີ້ ເປັນພະຍາດຕິດຕໍ່ ພາຊະນະ ແລະອຸປະກອນ ໃນການກິນຂອງຄົນປ່ວຍ ຕ້ອງແຍກຕ່າງຫາກ ເມື່ອປິ່ນປົວດີແລ້ວ ຕ້ອງຂ້າເຊື້ອ ເຄື່ອງໃຊ້ໃນການກິນທັງໝົດ ດ້ວຍການຕົ້ມໃນນໍ້າທີ່ຟົດ