ໃນວັນທີ 15 ມີນາ 2017 ຜ່ານມາ ກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ ໄດ້ດຳເນີນມາ ເປັນມື້ທີ 2 ສືບຕໍ່ຈັດກອງປະຊຸມປິ່ນອ້ອມຄື: ກອງປະຊຸມນະໂຍບາຍເພື່ອບັນລຸຕົວເມືອງທີ່ມີມົນລະພິດຕ່ຳ, ກອງປະຊຸມທົບທວນຄືນ ແລະ ຕີລາຄາປະເມີນຜົນຄວາມຄືບໜ້າ ແລະ ບົດຮຽນດີເລີດຂອງການຈັດຕັ້ງປະຕິບັດຖະແຫຼງການບາງກອກ 2020 ກອງປະຊຸມນະໂຍບາຍ ແລະ ສິ່ງທ້າທາຍ ກາລະໂອກາດໃນການຈັດຕັ້ງປະຕິບັດຂົນສົ່ງໃນຕົວເມືອງ ແລະ ພ້ອມນັ້ນ ໄດ້ມີພິທີເຊັນສັນຍາບົດບັນທຶກເພີ່ມເຕີມຖະແຫຼງຂ່າວກຽວໂຕ.
ທ່ານ ບຸນຕາ ອ່ອນນາວົງ ຮອງຫົວໜ້າກົມຂົນສົ່ງ ກະຊວງໂຍທາທິການ ແລະ ຂົນສົ່ງ ໄດ້ກ່າວວ່າ: ສຳລັບ ສປປ ລາວ ເຂົ້າຮ່ວມ ແລະ ເລີ່ມຮ່າງຍຸດທະສາດການຂົນສົ່ງແບບຍືນຍົງຕໍ່ສິ່ງແວດລ້ອມແຕ່ປີ 2006 ປັດຈຸບັນ ໄດ້ສຳເລັດຮ່າງສຸດທ້າຍ, ໄດ້ຜ່ານລັດຖະບານໃນເດືອນກຸມພາ 2017 ແລະ ຄາດວ່າຈະຖືກຮັບຮອງອັນໃກ້ນີ້ ຄຽງຄູ່ກັບຮ່າງຍຸດທະສາດດັ່ງກ່າວ, ລາວໄດ້ຮັບການຊ່ວຍເຫຼືອ ຈາກອົງການສາກົນຫຼາຍໂຄງການ ໃນຂອບການຮ່ວມມື ເຊັ່ນ: ອົງການໄຈກາຍີ່ປຸ່ນ ຊ່ວຍສ້າງແຜນແມ່ບົດການຂົນສົ່ງໃນຕົວເມືອງນະຄອນຫຼວງວຽງຈັນ ປີ 2008 ຊ່ວຍເຫຼືອລົດເມໃໝ່ 42 ຄັນ, ລົດໄຟຟ້າ 14 ຄັນ ໃຫ້ແຂວງຫຼວງພະບາງ ແລະ ປັດຈຸບັນ ສືບຕໍ່ໃຫ້ການຊ່ວຍເຫຼືອທາງວິຊາການຫຼາຍໂຄງການ. ນອກນີ້ ສ ເກົາຫຼີ ຊ່ວຍສຶກສາເບື້ອງຕົ້ນການຂົນສົ່ງໃນຕົວເມືອງແຂວງຈຳປາສັກ ໂດຍໄດ້ກຳລັງຂໍຄວາມຊ່ວຍເຫຼືອເພື່ອສຳຫຼວດອອກແບບລະອຽດ ທະນາຄານພັດທະນາອາຊີ ຮ່ວມກັບອົງການໃຫ້ທຶນອື່ນໆ ໄດ້ຕົກລົງໃຫ້ການຊ່ວຍເຫຼືອ ມູນຄ່າ 99,7 ລ້ານໂດລາ ຫຼື ປະມານ 800 ຕື້ກີບ ເພື່ອຈັດຕັ້ງປະຕິບັດໂຄງການຂົນສົ່ງແບບຍືນຍົງໃນຕົວເມືອງ ນວ ປັດຈຸບັນ ກຳລັງຈັດຕັ້ງປະຕິບັດ ນອກນີ້ຍັງມີຫຼາຍໂຄງການທີ່ກຳລັງສຶກສາ.
ແຫຼ່ງຂ່າວ: ໜັງສືພິມ ວຽງຈັນໃໝ່