ສຳນັກຂ່າວ ເອເອຟພີລາຍງານ ເມື່ອວັນທີ 14 ມີນາ 2017 ນີ້ວ່າ ທ່ານ ໝ່າ ອິງ ຈິ່ວ ອະດີດປະທານາທິບໍດີໄຕ້ຫວັນ ຖືກສຳນັກງານ ໄອຍະການ ໄທເປ ຕັ່ງຂໍ້ຫາວ່າ ເຮັດໃຫ້ຂໍ້ມູນລັບຂອງທາງການຮົ່ວໄຫຼ
ຂ່າວລະບຸວ່າ ຂະນະທີ່ທ່ານ ໝ່າ ຍັງດຳລົງຕຳແໜ່ງປະທານາທິບໍດີ ໃນໄລຍະປີ 2008-2016 ບໍ່ສາມາດດຳເນີນຄະດີຕ່າງໆໄດ້ເນື່ອງຈາກມີກົດໝາຍຄຸ້ມຄອງຢູ່ ແຕ່ເມື່ອພົ້ນຈາກຕຳແໜ່ງເມື່ອເດືອນ ພະຈິກ 2016 ທ່ານ ໝ່າ ກໍ່ຖືກກ່າວຫາໃນຫຼາຍຂໍ້ຫາລວມທັງຂໍ້ຫາຮັບສິນບົນອີກດ້ວຍ.
ໂດຍຂໍ້ຫາຫຼ້າສຸດ ໄອຍະການ ໄທເປ ໃນຖານະຕົວແທນຂອງລັດຖະບານໄຕ້ຫວັນ ໄດ້ຕັ້ງຂໍ້ຫາໃຫ້ທ່ານ ໝ່າ ວ່າເປັນຜູ້ເປີດເຜີຍຂໍ້ມູນລັບໃນ ປີ 2013 ກ່ຽວກັບການສອບສວນຄະດີຂອງ ທ່ານ ຈຽງ ອີ໋ ຮົ່ວ ເຊິ່ງດຳລົງຕຳແໜ່ງ ນາຍົກລັດຖະມົນຕີໃນຕອນນັ້ນ ແລະ ບັນດາຜູ້ຊ່ວຍ ນອກຈາກນີ້ ທ່ານ ໝ່າ ຍັງຖືກກ່າວຫາວ່າ ເປັນຜູ້ສັ່ງໃຫ້ໄອຍະການສູງສຸດເປີດເຜີຍຂໍ້ມູນດັ່ງກ່າວແກ່ ທ່ານ ຈຽງ
ທ່ານ ໝ່າ ຍັງຖືກຕັ້ງຂໍ້ຫາລະເມີດກົດໝາຍຄວາມໝັ້ນຄົງ ແລະ ກວດກາການສື່ສານ ແລະ ກົດໝາຍຄຸ້ມຄອງຂ້ມູນສ່ວນບຸກຄົນ ເຊິ່ງໄດ້ເຊື່ອມໂຍງກັບການດັກຟັງໂທລະສັບ ເຊິ່ງໂທດດັ່ງກ່າວຕ້ອງຈຳໂທດສູງສຸດ 3 ປີ ທ່ານ ໝ່າ ຖືວ່າເປັນປະທານາທິບໍດີຄົນທີ 3 ຂອງໄຕ້ຫວັນທີ່ຖືກດຳເນີນຄະດີອາຍາ.