Homeຂ່າວເຫດການປະຊາຊົນລາວຍັງສືບຕໍ່ຮັບເຄາະຈາກສານເຄມີ ທີ່ໃຊ້ໃນການຜະລິດກະສິກຳຢູ່ (ມີຄລິບ)

ປະຊາຊົນລາວຍັງສືບຕໍ່ຮັບເຄາະຈາກສານເຄມີ ທີ່ໃຊ້ໃນການຜະລິດກະສິກຳຢູ່ (ມີຄລິບ)

Published on

ເມື່ອບໍ່ດົນມານີ້, ຊ່ອງ Youtube ທີ່ຊື່ Lao Farmer Network ໄດ້ເຜີຍແພ່ວິດີໂອສາລະຄະດີ ຊຸດ Impact of pesticide lao version ທີ່ໄດ້ລາຍງານເຖິງການນຳໃຊ້ສານເຄມີເຂົ້າໃນການຜະລິດກະສິກຳ ແລະຜູ້ໄດ້ຮັບຜົນກະທົບເຖິງຂັ້ນລົ້ມປ່ວຍແລະເສຍຊີວິດຫຼາຍລາຍ ແຕ່ການນຳໃຊ້ສານເຄມີອັນຕະລາຍຍັງສືບຕໍ່ຢ່າງບໍ່ຫຼຸດລົງເລີຍ.

ສາລະຄະດີຊຸດດັ່ງກ່າວເປັນຂໍ້ມູນທີ່ເກີດຂຶ້ນຈິງ ເຊິ່ງໄດ້ຈາກການສຳພາດຊາວກະສິກອນ ແຂວງຈຳປາສັກ, ສະຫວັນນະເຂດ, ບໍລິຄຳໄຊ, ນະຄອນຫຼວງວຽງຈັນ, ວຽງຈັນ, ຊຽງຂວາງ ແລະອຸດົມໄຊ.

ສາລະຄະດີໄດ້ສະແດງໃຫ້ເຫັນເຖິງການນຳໃຊ້ສານເຄມີ ປາບສັດຕູພືດ ແລະຢາຂ້າຫຍ້າ ທີ່ອັນຕະລາຍແບບບໍ່ມີການປ້ອງກັນທີ່ຖືກວິທີຂອງປະຊາຊົນ ຍ້ອນຄວາມຮູ້ເທົ່າບໍ່ເຖິງການ ແລະຄວາມຈຳເປັນຂອງການຫາລ້ຽງຊີບ.

ທ່ານ ບົວໄລ ຊາວສວນກະຫຼໍ່າ ບ້ານໜອງສູງ ເມືອງປາກຊ່ອງກ່າວວ່າ ການນຳໃຊ້ຢາຂ້າແມງໄມ້ແມ່ນມີຄວາມຈຳເປັນ ເນື່ອງຈາກວ່າຊາວຄ້າຂາຍ ທີ່ຊື້ຜັກໄປຂາຍນັ້ນເລືອກຊື້ແຕ່ຜັກທີ່ງາມ ຫຼືບໍ່ມີຮອຍກັດຈາກສັດຕູພືດ. ຖ້າມີຮອຍກັດຈາກສັດຕູພືດແລ້ວເຂົາເຈົ້າຈະບໍ່ຊື້ ຫຼືຖ້າເປັນລະດູການທີ່ຂາດແຄນຜັກ ເຂົາເຈົ້າກໍຈະຊື້ດ້ວຍລາຄາທີ່ຕໍ່າຫຼາຍ.

ໃນຂະນະທີ່ ນາງໄມທອງ ຊາວສວນສາລີ ບ້ານໂພນທັນ ເມືອງຄຳ ແຂວງຊຽງຂວາງກ່າວວ່າ ຕົນເອງຕ້ອງໃຊ້ຢາຂ້າຫຍ້າ ເພາະເຮັດການຜະລິດຫຼາຍ ແລ້ວເສຍຫຍ້າບໍ່ທັນ ຫຍ້າກໍຈະຕຶບໜາຂຶ້ນປົກຫຸ້ມຕົ້ນສາລີ ຈຶ່ງຈຳເປັນຕ້ອງໃຊ້ຢາຂ້າຫຍ້າມາສີດ. ຖ້າຂ້າຫຍ້າດ້ວຍຢາຂ້າຫຍ້າ ໃຊ້ເວລາພຽງ 2-3 ມື້ກໍແລ້ວ ແຕ່ໃນກໍລະນີເສຍຫຍ້າດ້ວຍວິທີດັ້ງເດີມ ຈະຕ້ອງໃຊ້ເວລາເປັນ 2-3 ເດືອນ ເຊິ່ງບໍ່ທ່ວງທັນກັບຄວາມຮຽກຮ້ອງຕ້ອງການ.

ໂດຍສະຫຼຸບແລ້ວ ຄວາມຈຳເປັນຂອງການໃຊ້ສານເຄມີອັນຕະລາຍ ແມ່ນຍ້ອນຄ່າໃຊ້ຈ່າຍໜ້ອຍ, ແບ່ງເບົາແຮງງານ, ຜົນຜະລິດດີ ແລະທ່ວງທັນກັບຄວາມຮຽກຮ້ອງຕ້ອງການຂອງຕະຫຼາດ.

ແນວໃດກໍຕາມ, ການໃຊ້ສານເຄມີອັນຕະລາຍດັ່ງກ່າວນັ້ນ ພັດໄດ້ສົ່ງຜົນກະທົບຕໍ່ຮ່າງກາຍຂອງຜູ້ຜະລິດເອງ ແລະຜູ້ບໍລິໂພກຢ່າງຮ້າຍແຮງ ເຮັດໃຫ້ເກີດມີການລົ້ມປ່ວຍແລະເສຍຊີວິດໄປກໍມີ. ນອກຈາກນັ້ນ, ຍັງສົ່ງຜົນລົບຕໍ່ສິ່ງແວດລ້ອມ ເຮັດໃຫ້ທຳມະຊາດເປິເປື້ອນ, ສັດໃນດິນແລະນໍ້າຫຼຸດໜ້ອຍຖອຍລົງ ເຊັ່ນ ກົບ, ຂຽດ, ອື່ງ, ຂີ້ກະເດືອນ, ກຸ້ງ, ຫອຍ, ປູ, ປາ… ສົ່ງຜົນເສຍຕໍ່ການດຳລົງຊີວິດຂອງປະຊາຊົນຢ່າງຫຼີກລ້ຽງບໍ່ໄດ້.

ສຳລັບວິທີທາງແກ້ໄຂ ຊາວກະສິກອນໄດ້ຮຽກຮ້ອງໃຫ້ມີ ພາກສ່ວນໃດໜຶ່ງເຂົ້າໄປຊ່ວຍເຫຼືອດ້ວຍການ ຜະລິດຢາປາບສັດຕູພືດແລະຢາຂ້າຫຍ້າທີ່ເປັນຊີວະພາບ ບໍ່ເປັນອັນຕະລາຍຕໍ່ຄົນແລະສັດ. ໃນຂະນະທີ່ຊາວກຳມະກອນຜູ້ໃຊ້ສານເຄມີ ກໍບອກວ່າຕົນເອງບໍ່ມີທາງເລືອກອື່ນທີ່ດີກວ່າການຮັບຈ້າງສີດຢາ ແລະຖ້າມີອາຊີບອື່ນໃຫ້ເຮັດ ກໍຢາກເຊົາຢາກອາຊີບທີ່ອັນຕະລາຍດັ່ງກ່າວຢູ່.

ເມື່ອການຜະລິດຍັງມີຄວາມຈຳເປັນຕ້ອງໃຊ້ເຄມີອັນຕະລາຍ ຜູ້ປູກກໍຍັງຈະຕ້ອງຮັບເຄາະຕໍ່ໄປ ແລະຜູ້ບໍລິໂພກກໍຈະໄດ້ບໍລິໂພກຜະລິດຕະພັນທີ່ປົນເປື້ອນສານເຄມີອັນຕະຫຼາຍຢູ່ຕໍ່ໄປເຊັ່ນກັນ.

ຊົມຄລິບ:

ບົດຄວາມຫຼ້າສຸດ

ນາຍົກລັດຖະມົນຕີລາວ ພົບປະກັບ ປະທານສະພາແຫ່ງຊາດຫວຽດນາມ ໃນໂອກາດເດີນທາງຢ້ຽມຢາມ ສສ ຫວຽດນາມ ແລະ ເຂົ້າຮ່ວມກອງປະຊຸມເວທີອະນາຄົດອາຊຽນ ຄັ້ງທີ 3

ໃນຕອນບ່າຍວັນທີ 8 ມິຖຸນາ 2026, ທີ່ ນະຄອນຫຼວງຮ່າໂນ້ຍ ສສ ຫວຽດນາມ, ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ...

ແຈ້ງການມອດໄຟຟ້າຊົ່ວຄາວ ລັດວິສາຫະກິດໄຟຟ້າລາວ ນວ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ ເລີ່ມແຕ່ວັນທີ 9-14 ມິຖຸນາ 2026

​ລັດວິສາຫະກິດໄຟຟ້າລາວ (EDL) ຝ່າຍຄຸ້ມຄອງລະບົບໄຟຟ້າພາກກາງ ສາຂານະຄອນຫຼວງວຽງຈັນ 2 ໄດ້ອອກແຈ້ງການງົດຈ່າຍກະແສໄຟຟ້າຊົ່ວຄາວ (ມອດໄຟ) ເພື່ອປັບປຸງ, ສ້ອມແປງລະບົບຕາໜ່າງໄຟຟ້າ ແລະ ຕິດຕັ້ງເສົາໄຟຟ້າໃໝ່ ໃຫ້ມີຄວາມປອດໄພ ແລະ ກຽມພ້ອມຮອງຮັບການຊົມໃຊ້ທີ່ດີຂຶ້ນ....

ກຽມໄປແຂ່ງຕໍ່ທີ່ຍີ່ປຸ່ນ MAZDA GB FC U12 ຄວ້າແຊ້ມ ບານເຕະເຍົາວະຊົນທີ່ອິນໂດເນເຊຍ ພ້ອມໄດ້ໄປແຂ່ງຕໍ່ຮອບສຸດທ້າຍທີ່ປະເທດຍີ່ປຸ່ນ

ເກັ່ງຫຼາຍ MAZDA GB FC ຢູ 12 ຄວ້າແຊ້ມບານເຕະເຍົາວະຊົນ ທີ່ອິນໂດເນເຊຍ ພ້ອມໄດ້ສິດບິນລັດຟ້າໄປແຂ່ງຂັນທີ່ປະເທດຍີ່ປຸ່ນ. ນ້ອງໆເຍົາວະຊົນຈາກສະໂມສອນ Mazda Laos GB FC ໂຊຊຟອງເກັ່ງຄວ້າແຊ້ມລາຍການແຂ່ງຂັນບານເຕະເຍົາວະຊົນລະດັບພາກພື້ນ...

ນາຍົກລັດຖະມົນຕີລາວ ສົ່ງຈົດໝາຍເຖິງນາຍົກລັດຖະມົນຕີໄທ ເພື່ອສະແດງຄວາມຂອບໃຈຕໍ່ການຊ່ວຍເຫຼືອຄົ້ນຫາ ແລະ ກອບກູ້ເອົາຊິວິດປະຊາຊົນທີ່ຕິດຄ້າງຢູ່ໃນຖໍ້າ

ວັນທີ 7 ມິຖຸນາ 2026 ທີ່ນະຄອນຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີລາວ ໄດ້ສົ່ງຈົດໝາຍຂອບໃຈເຖິງທ່ານ ອະນຸທິນ ຊານວີຣະກູນ, ນາຍົກລັດຖະມົນຕີ ແຫ່ງ...