ທ່ານ ສອນໄຊ ສີພັນ ດອນ ກຳມະການກົມການເມືອງ ສູນກາງພັກ ຮອງນາຍົກລັດຖະມົນຕີ ໄດ້ລົງຢ້ຽມຢາມເຮັດ ວຽກຢູ່ແຂວງສາລະວັນ ໂດຍໄດ້ໂອ້ລົມພະນັກງານ ການນຳຫຼັກແຫຼ່ງຂອງແຂວງ ເມື່ອບໍ່ດົນ ຜ່ານມານີ້.

ທ່ານ ສີສຸວັນ ວົງຈອມສີ ເຈົ້າແຂວງສາລະວັນ ໄດ້ລາຍງານ ຕໍ່ທ່ານຮອງນາຍົກວ່າ: ໃນໄລຍະ 1 ປີຜ່ານ ມາ, ຄະນະພັກ, ອຳນາດການ ປົກຄອງແຂວງສາລະວັນໄດ້ ຫັນເອົາມະຕິ X ຂອງພັກ ແລະ ມະຕິ VIII ຂອງອົງຄະນະພັກ ແຂວງມາເປັນແຜນງານໂຄງ ການລະອຽດ, ອັນສຳຄັນແມ່ນ ພວກເຮົາໄດ້ແບ່ງງານ, ແບ່ງຄວາມຮັບຜິດຊອບ ແລະ ປັບປຸງກົງຈັກ, ກົນໄກບໍລິຫານລັດ, ໃຫ້ຮັດກຸມ, ໂປ່ງໃສ, ວ່ອງໄວ ເຂັ້ມແຂງ, ມີຄຸນນະພາບ-ປະສິດທິຜົນສູງໃນການບໍລິຫານລັດ, ເອົາໃຈໃສ່ຢ່າງຈິງຈັງໃນການປະຕິບັດຄຳສັ່ງ ເລກທີ 15/ນຍ ດ້ວຍຄວາມ ເປັນເຈົ້າການ, ອັນສຳຄັນແມ່ນໄດ້ແຕ່ງ ຕັ້ງຄະນະສະເພາະກິດຕ່າງໆ ເພື່ອແກ້ໄຂປະກົດການຫຍໍ້ທໍ້ ໃນສັງຄົມ, ການແກ້ໄຂຄວາມ ທຸກຍາກ ແລະ ວຽກ 3 ສ້າງກໍ ໄດ້ປະຕິບັດ ຕາມກອງປະຊຸມ ຄົບຄະນະບໍລິຫານງານພັກ ແຂວງເປີດກວ້າງຄັ້ງທີ 3 ສະ ໄໝທີ VIII ໂດຍໄດ້ສຸມໃສ່ 3 ເມືອງຄື: ເມືອງສະໝ້ວຍ, ຕະ ໂອ້ຍ ແລະ ເມືອງຕຸ້ມລານ

ທ່ານຮອງນາຍົກ ສອນໄຊ ສີພັນດອນກໍໄດ້ຍ້ອງຍໍຊົມເຊີຍ ຕໍ່ຜົນງານການພັດທະນາເສດຖະກິດ-ສັງຄົມຂອງ ແຂວງສາລະວັນໄດ້ມີການພັດທະນາດີຂຶ້ນເລື້ອຍໆ. ຈາກນັ້ນ ທ່ານໄດ້ເນັ້ນໃຫ້ພະນັກງານ ການນຳຫຼັກແຫຼ່ງຂອງແຂວງ ສາລະວັນ ສືບຕໍ່ຮັກສາມູນເຊື້ອຄວາມມີ ສະຖຽນລະພາບທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໃນສັງຄົມ, ຄວາມຍຸຕິທຳ, ຄວາມສະເໝີພາບໃນສັງຄົມ ແລະ ມີຄວາມສາມັກຄີປອງດອງ, ສືບຕໍ່ແກ້ໄຂຄວາມທຸກ ຍາກຂອງ ປະຊາຊົນ ໂດຍຕິດພັນກັບວຽກ ງານ 3 ສ້າງໃຫ້ເຂົ້າສູ່ລວງເລິກ, ພັດທະນາຊັບພະຍາກອມມະນຸດໃຫ້ມີຄວາມຮູ້ຄວາມສາມາດ, ປັບປຸງຄຸນນະພາບການສຶກສາ, ສາທາລະນະສຸກ, ຍົກລະດັບສີ ມືແຮງງານ ເພື່ອຕອບສະໜອງ ຄວາມຕ້ອງການຂອງຕະຫຼາດ ແຮງງານ.

ການພັດທະນາພື້ນຖານໂຄງລ່າງທີ່ຈຳເປັນ ເພື່ອສ້າງເງື່ອນໄຂໃນ ການດຶງດູດນັກລົງທຶນໃຫ້ເຂົ້າມາລົງທຶນຢູ່ແຂວງ ສາລະວັນໃຫ້ຫຼາຍຂຶ້ນ, ຄຸ້ມຄອງເສດຖະກິດມະຫາພາກໃຫ້ໝັ້ນທ່ຽງ ແລະ ຂະຫຍາຍຕົວໃນລະດັບບໍ່ໃຫ້ຫຼຸຸດ 7%. ຄຸ້ມຄອງ ເງິນຕາໃຫ້ມີສະຖຽນລະພາບ ແລະ ມີຄວາມໝັ້ນທ່ຽງ. ເອົາໃຈໃສ່ຊຸກຍູ້ສົ່ງເສີມ ການຜະລິດ ແລະ ການບໍລິ ການ ໂດຍອາໄສທ່າແຮງຂອງທ້ອງຖິ່ນເປັນຫຼັກ. ຊຸກຍູ້ບັນດາໂຄງການ ຂອງລັດໃຫ້ມີປະສິດທິພາບ, ປະສິດທິຜົນສູງ, ຕ້ານ ແລະ ສະກັດກັ້ນການສໍ້ລາດບັງຫຼວງ ແລະ ພະຍາດອາດຍາສິດ ຊຶ່ງເປັນພະຍາດທີ່ຮ້າຍແຮງທີ່ສຸດ ໃຫ້ຕົກເຮ່ຍໄປ ແລະ ຈັດຕັ້ງ ປະຕິບັດຄຳສັ່ງ 15/ນຍ ໃຫ້ ເຂັ້ມງວດ.

ຂ່າວ: ໜັງສືພິມ ປະຊາຊົນ