spot_img
Homeຂ່າວເຫດການກອງປະຊຸມ ຄະນະກຳມາທິການ ຮ່ວມມືທະວິພາຄີ ລາວ-ຫວຽດນາມ ຄັ້ງທີ 39 ສຳເລັດລົງຢ່າງຈົບງາມ

ກອງປະຊຸມ ຄະນະກຳມາທິການ ຮ່ວມມືທະວິພາຄີ ລາວ-ຫວຽດນາມ ຄັ້ງທີ 39 ສຳເລັດລົງຢ່າງຈົບງາມ

Published on

ໃນວັນທີ 7-8 ກຸມພາ 2017, ຢູ່ນະຄອນຫລວງຮ່າໂນ້ຍ ແຫ່ງ ສສ ຫວຽດນາມ ໄດ້ຈັດກອງປະຊຸມ ຄະນະກຳມາທິການ ຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຄັ້ງທີ 39 ປະຈຳ​ປີ 2017, ພາຍໃຕ້ການ ເປັນປະທານຮ່ວມ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ແລະ ທ່ານ ຫງວຽນຊວນຟຸກ ນາຍົກລັດຖະມົນຕີແຫ່ງ ສສ ຫວຽດນາມ ໂດຍການເຂົ້າຮ່ວມ ຂອງບັນດາການນຳຈາກ 30 ກະຊວງ, ຂະແໜງການ ​ແລະ ທ້ອງຖິ່ນ ຂອງສອງປະເທດ.

ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ສະແດງ ຄວາມຊົມເຊີຍຕໍ່ທ່ານ ນາຍົກລັດຖະມົນຕີ ທອງລຸນ ສີສຸລິດ ແລະ ຄະນະຜູ້ແທນລາວ ທີ່ໄດ້ເຂົ້າຮ່ວມ ກອງປະຊຸມຄັ້ງນີ້ ພ້ອມກ່າວຢ້ຳວ່າ ຄວາມສຳພັນ ລະຫວ່າງ ຫວຽດນາມ-ລາວ ແມ່ນຄວາມສຳພັນແບບພິເສດ, ມີໜຶ່ງບໍ່ມີສອງໃນໂລກ. ຍາມໃດຫວຽດນາມ ກໍຈະເຮັດສຸດ ຄວາມສາມາດຂອງຕົນ ໃນການຮ່ວມມື ຊ່ວຍເຫລືອລາວ ໃນການພັດທະນາ ປະເທດຊາດ, ທັງ​ມີ​ການປະສານສົມທົບກັນ ຢ່າງໜັກແໜ້ນ ແລະ ມີປະສິດທິຜົນໃນເວທີສາກົນ. ເຊິ່ງທັງສອງຝ່າຍ ຈະຕ້ອງປະສານ ສົມທົບກັນໃຫ້ດີ ໃນການເຄື່ອນໄຫວ ເພື່ອສະເຫລີມສະຫລອງ 55 ປີ ວັນສ້າງສາຍພົວພັນການທູດ ລາວ-ຫວຽດນາມ (05/9/1962-05/9/2017) ແລະ 40 ປີ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ (18/7/1977-18/7/2017) ໃນປີ 2017​ ນີ້ໃຫ້ມີເນື້ອໃນ ເລິກເຊິ່ງ ແລະ ມີຄວາມໝາຍ. ພາຍຫລັງກອງປະຊຸມຄັ້ງນີ້, ລັດຖະບານຫວຽດນາມ ຈະຊີ້ນຳບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດ ​ແລະພາກສ່ວນທີ່ກ່ຽວຂ້ອງ ​ໃຫ້ປະສານສົມທົບ ກັບຝ່າຍລາວ ໃນການຜັນຂະຫຍາຍ ແລະປະຕິບັດ ບັນດາຂໍ້ຕົກລົງ ໃຫ້ມີຜົນສັກສິດ.

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສະ​ແດງ​ຄວາມຂອບໃຈ ຕໍ່ການ ຕ້ອນຮັບ ຢ່າງສະໜິດສະໜົມ ຂອງທ່ານ ນາຍົກລັດຖະມົນຕີ ແລະ ລັດຖະບານ ຫວຽດນາມ ພ້ອມທັງ ເຊື່ອໝັ້ນວ່າ ກອງປະຊຸມຄັ້ງນີ້ ຈະເປັນພະລັງໃໝ່ ໃນການເຮັດໃຫ້ການຮ່ວມມື ລະຫວ່າງ ສອງປະເທດ ນັບມື້ ເຂົ້າສູ່ຕົວຈິງ ​ແລະ ມີປະສິດທິຜົນ, ເປັນການປະກອບສ່ວນສຳຄັນ ເຂົ້າໃນການ ເພີ່ມພູນຄູນສ້າງ ຄວາມສຳພັນ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ​ໃຫ້ແໜ້ນແຟ້ນຍິ່ງຂຶ້ນ. ປີ 2017 ເປັນປີທີ່ມີ ຄວາມໝາຍສຳຄັນທີ່ສຸດ ເພື່ອກະກຽມໃຫ້ແກ່ການ ສະເຫລີມສະຫລອງ ສອງວັນປະຫວັດສາດ ນັ້ນກໍ ຄື: 55 ປີ ວັນສ້າງສາຍພົວພັນການທູດ ລາວ-ຫວຽດນາມ (05/9/1962 -05/9/2017) ແລະ 40 ປີ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ (18/7/1977-18/7/2017) ໃນປີ 2017​ ນີ້ ໃຫ້ມີເນື້ອໃນເລິກເຊິ່ງ ແລະ ມີຄວາມໝາຍ. ຝ່າຍລາວເຫັນດີ ໃນການປະສານສົມທົບ ກັບຝ່າຍຫວຽດນາມ ໃນການຈັດຕັ້ງ ການສະເຫລີມສະຫລອງ ໃຫ້ມີບັນຍາກາດຄຶກຄື້ນ, ກວ້າງຂວາງ ​ແລະ ມີຄວາມໝາຍ, ທັງເປັນການປະກອບສ່ວນ ໂຄສະນາເຜີຍແຜ່ຢ່າງ ເລິກເຊິ່ງ ກ່ຽວກັບຄວາມ ສຳພັນແບບພິເສດ ລາວ-ຫວຽດນາມ ເປັນຕົ້ນແມ່ນ ໃນຄົນຮຸ່ນໜຸ່ມ ຂອງສອງປະເທດ.

ກອງປະຊຸມຄັ້ງນີ້ ສອງຝ່າຍໄດ້ຕີລາຄາສູງ ແລະ ເພິ່ງພໍໃຈ ຕໍ່ຜົນການຮ່ວມມືຮອບດ້ານ ລະຫວ່າງ ສອງປະເທດ. ໃນປີ 2016 ຜ່ານມາ, ສອງຝ່າຍໄດ້ຜັນຂະຫຍາຍ ຢ່າງມີປະສິດທິຜົນ ບັນດາຂໍ້ຕົກລົງ ລະຫວ່າງກະຊວງ, ຂະແໜງການ ​ແລະ ທ້ອງຖິ່ນ, ພິເສດແມ່ນການຮ່ວມມື ທາງດ້ານ ການເມືອງ, ການຕ່າງປະເທດ, ການປ້ອງກັນຊາດ-ປ້ອງກັນ ຄວາມສະຫງົບ, ການຮ່ວມມືດ້ານ ເສດຖະກິດ, ການຮ່ວມມືດ້ານ ຄົມມະນາຄົມຂົນສົ່ງ, ການຄ້າ-ການລົງທຶນ, ການຮ່ວມມື ດ້ານວັດທະ ນະທຳ-ສັງຄົມ ລະຫວ່າງ ປະຊາຊົນ ສອງປະເທດ ນັບມື້ເພີ່ມຂຶ້ນ ແລະ ເຂົ້າສູ່ລວງເລິກ, ເປັນຕົ້ນແມ່ນ ດ້ານການສຶກສາ ສ້າງຊັບພະຍາກອນມະນຸດ. ປັດຈຸບັນ ມີນັກຮຽນ, ນັກສຶກສາລາວ ທີ່ກຳລັງສຶກສາ ຄົ້ນຄວ້າ ຢູ່ ສສ ຫວຽດນາມ ປະມານ 14.000 ຄົນ. ບັນດາວິສາຫະກິດຫວຽດນາມ ລົງທຶນຢູ່ ສປປ ລາວ 408 ກວ່າໂຄງການ, ມູນຄ່າການລົງທຶນ 3,7 ຕື້ ໂດລາສະຫະລັດ, ຈັດຢູ່ອັນດັບ 3 ໃນຈຳນວນ ປະເທດ ແລະ ເຂດແຄ້ວນ ມາລົງທຶນຢູ່ລາວ.

ພາຍຫລັງ ສຳ​ເລັດກອງປະຊຸມ, ນາຍົກລັດຖະມົນຕີທັງສອງ ໄດ້ເປັນສັກຂີພິຍານ ​ໃນພິທີລົງນາມ ການຮ່ວມມື ສີ່ສະບັບ ປະກອບມີ: ບົດບັນທຶກກອງປະຊຸມ ຄັ້ງທີ 39, ຂໍ້ຕົກລົງວ່າດ້ວຍ ແຜນງານຮ່ວມມື ປະຈຳປີ 2017, ແຜນການຮ່ວມມື ປະຈຳປີ 2017 ລະຫວ່າງສອງກະຊວງ ສຶກສາທິການ ແລະກິລາ,  ບົດບັນທຶກສ້າງຕັ້ງ ບໍລິສັດຮ່ວມທຸລະກິດລົງທຶນ ໂຄງການສາຍສົ່ງໄຟຟ້າ 500 kv ຈາກ ລາວ-ຫວຽດນາມ ລະຫວ່າງ ກຸ່ມບໍລິສັດ ພົງຊັບທະວີ ແລະ ບໍລິສັດ ຮຸ້ນສ່ວນພັດທະນາໄຟຟ້າ ແລະ ພື້ນຖານໂຄງລ່າງ ຮ່າໂນ້ຍ-ວຽງຈັນ.

ຂ່າວ: ສຳນັກຂ່າວສານປະເທດລາວ

ບົດຄວາມຫຼ້າສຸດ

ສົ່ງເສີມການທ່ອງທ່ຽວທາງທຳມະຊາດໃນລາວ ໂອກາດການທ່ອງທ່ຽວໃນເຂດປ່າໄມ້ຂອງລາວແບບເປີດກວ້າງ ພ້ອມກັບສ້າງວຽກເຮັດງານທຳໃຫ້ກັບແມ່ຍິງເຖິງ 75,000 ຄົນ

ກະຊວງ ກະສິກໍາ ແລະ ສິ່ງແວດລ້ອມ ໄດ້ອອກຂໍ້ຕົກລົງ ສະບັບ ເລກທີ 1926/ກປ,ລົງວັນທີ 03 ມິຖຸນາ 2025. ຊຶ່ງຂໍ້ຕົກສະບັບດັ່ງກ່າວນີ້ໄດ້ເປັນປັດໃຈພື້ນຖານໃນການຊຸກຍູ້ ແລະ ສົ່ງເສີມການທ່ອງທ່ຽວທຳມະຊາດ...

ສະຫາຍນາງ ວຽງທອງ ສີພັນດອນ ໄດ້ຮັບເລືອກເປັນເລຂາຄະນະບໍລິຫານງານພັກ ສປສສ

ຂໍສະແດງຄວາມຊົມເຊີຍ ສະຫາຍນາງ ວຽງທອງ ສີພັນດອນ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກສານປະຊາຊົນສູງສຸດ (ສປສສ) ກອງປະຊຸມໃຫຍ່ສະມາຊິກພັກ ຄັ້ງທີ V ອົງຄະນະພັກສານປະຊາຊົນສູງສຸດ ປິດລົງດ້ວຍຜົນສຳ ເລັດຢ່າງຈົບງາມໃນວັນທີ 11 ກັນຍານີ້ ທີ່ນະຄອນຫຼວງວຽງຈັນ...

ຖືກກັກໂຕແລ້ວ ຈາກກໍລະນີແພດທຳຮ້າຍຮ່າງກາຍຄົນເຈັບ ຢູ່ຫວຽດນາມ ພົບເຄື່ອງມືບໍ່ໄດ້ມາດຕະຖານ ແລະ ບໍ່ມີໃບອະນຸຍາດ

ໃນວັນທີ 11 ກັນຍາ 2025 ທີ່ຜ່ານມາ, ເຈົ້າໜ້າທີ່ຕຳຫຼວດນະຄອນໂຮຈິມິນ ປະເທດຫວຽດນາມ ໄດ້ຈັບກຸມ ນາງ ຫວຽນ ຖິ ຕ່ວນ ຈິງ (Nguyen...

ຮູ້ຈັກກັບ Nepo Kids ກະແສຈາກລູກຫຼານນັກການເມືອງເນປານ ໃຊ້ຊີວິດອວດລວຍທ່າມກາງຄວາມລຳບາກຂອງປະຊາຊົນ

ເມື່ອບໍ່ດົນມານີ້ໄດ້ມີເຫດການປະທ້ວງລັດທະບານໃນປະເທດເນປານ ໃນວັນທີ 09/09/2025, ເຊິ່ງສາເຫດແມ່ນເກີດຈາກການອອກມາດຕະການຫ້າມປະຊາຊົນນໍາໃຊ້ສື່ສັງຄົມອອນລາຍ ແລະ ອີກໜຶ່ງສາເຫດຄືລັດຖະບານ ມີການສໍ້ລາດບັງຫຼວງ ເຮັດໃຫ້ຄົນນລຸ້ນໃໝ່ເກີດຄວາມບໍ່ພໍໃຈ. Nepo Kids ຫຼື ລູກເຈົ້າຫຼານເພິ່ນ ເຊິ່ງປະຊາຊົນວິພາກວິຈານລູກຫຼານນັກງານເມືອງ ເພາະພວກເຂົານັ້ນໄດ້ໃຊ້ຊີວິດຫຼູຫຼາ ແລະ...