ສະຖານທູດຍີ່ປຸ່ນ ປະຈຳລາວ ໄດ້ຈັດງານ ເທດສະການຮູບເງົາຍີ່ປຸ່ນ ຄັ້ງທຳອິດ ໃນ ສປປ ລາວ ໂດຍໄດ້ນຳເອົາຮູບເງົາ ທີ່ມີສາລະ, ໃຫ້ຄວາມຮູ້, ຄວາມມ່ວນຊື່ນ ມາສາຍຢູ່ ສູນການຄ້າໄອເຕັກມໍ ຊັ້ນ 8 ນະຄອນຫລວງວຽງຈັນ ເຊິ່ງໄດ້ສາຍໄປ ຈຳນວນໜຶ່ງແລ້ວ ໃນວັນທີ 20-22 ແລະ ຈະສາຍຕໍ່ອີກ ໃນວັນທີ 28-29 ມັງກອນ 2017.
ພິທີເປີດງານ ເທດສະການດັ່ງກ່າວ ໄດ້ຈັດຂຶ້ນ ໃນວັນທີ 20 ມັງກອນ ຜ່ານມານີ້ ໂດຍມີທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທ່ານ ສັນຕິສຸກ ສິມມາລະວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ພ້ອມແຂກຖືກເຊີນ ເຂົ້າຮ່ວມ.
ໂອກາດດັ່ງກ່າວ, ທ່ານ ຮິກິຮາຣະ ເອກອັກຄະຣາຊະທູດ ຍີ່ປຸ່ນ ປະຈຳລາວ ກ່າວວ່າ: ການຈັດງານເທດສະການ ຮູບເງົາຍີ່ປຸ່ນ ຄັ້ງນີ້, ເປັນການເຜີຍແຜ່ ວັດທະນະທໍາ, ວິຖີດຳລົງຊີວິດ ຂອງປະຊາຊົນ ຍີ່ປຸ່ນ ທັງເປັນການຮັດແໜ້ນ ສາຍພົວພັນມິດຕະພາບ ແລະ ການຮ່ວມມື ອັນດີທີ່ມີມາ ແຕ່ດົນນານ ລະຫວ່າງ ປະຊາຊົນສອງປະເທດ ລາວ-ຍີ່ປຸ່ນ ໃຫ້ໄດ້ຮັບການພັດທະນາ ແລະ ແໜ້ນແຟ້ນ ຍິ່ງໆຂຶ້ນ. ຮູບເງົາທີ່ນຳມາສາຍຄັ້ງນີ້, ມີຮູບເງົາເລື່ອງ ກວນໝາກຖົ່ວແດງ, ເປັນຜົນງານ ຂອງທ່ານຜູ້ກຳກັບ ນາໂອມິ ຄະວາເຊະ, ຮູບເງົາ ເລື່ອງສິ່ງທີ່ງົດງາມທັງເກົ້າ ເຊິ່ງເປັນເລື່ອງທີ່ມີ ຕົວລະຄອນເອກເປັນນັກຫລິ້ນກິລາ ສະເກັດນ້ຳແຂງ ຊື່ວ່າຮາຢູ ທີ່ກຳລັງໂດ່ງດັງລະດັບໂລກ ໃນປັດຈຸບັນ ແລະ ເລື່ອງອື່ນໆ ທີ່ມີຄວາມມ່ວນຊື່ນ, ໃຫ້ສາລະ, ຄວາມຮູ້, ຄວາມບັນເທິງ.
ຂ່າວ: ສຳນັກຂ່າວສານປະເທດລາວ