ຕອນສວາຍ ວັນທີ 25/12/2016 ມີຜູ້ພົບເຫັນເດັກແດງຖືກປະໄວ້ໃນປ່າ ເຂດເມືອງເຊໂນ ແຂວງສະຫວັນນະເຂດ ຜູ້ພົບເຫັນໃຈບຸນ ໄດ້ຮັບເອົາເດັກແດງດັ່ງກ່າວມາລ້ຽງດູເປັນລູກຕໍ່ໄປ ໂດຍບອກວ່າອາດຈະເປັນບຸນວາສະໜາທີ່ເຄີຍເຮັດຮ່ວມກັນມາແຕ່ຊາດກ່ອນ ຈຶ່ງໄດ້ມາພົບພໍ້ກັນແບບນີ້ ເປັນຄວາມໂຊກດີທີ່ເດັກແດງຈະມາຄ້ຳມາຄູນ.
ເຫດການພົບເດັກແດງດັ່ງກ່າວເກີດຂຶ້ນ ລະຫວ່າງການເດິນທາງຈາກເທສະບານແຂວງສະຫວັນນະເຂດ ຂອງ ນາງ ຜິວ ແລະ ທ້າວ ສົມສີ ເມື່ອແລ່ນລົດມາຮອດເຂດໂຮງງານນີຄອລ ເມືອງເຊໂນ ແຂວງສະຫວັນ ທັງສອງໄດ້ປວດເບົາ ຈຶ່ງໄດ້ຈອດລົດເພື່ອລົງຖ່າຍເບົາ ແຕ່ພໍແຕ່ຍ່າງເຂົ້າປ່າກໍປາກົດໄດ້ຍິນສຽງເດັກນ້ອຍຮ້ອງໄຫ້ຢ່າງແຮງ ຈຶ່ງໄດ້ເຂົ້າໄປເບິ່ງ ແລະພົບວ່າເປັນເດັກແດງຫາກໍເກີດ ເປັນເພດຊາຍ ຮູບຮ່າງໜ້າຕາຈົບງາມ ຖືກວາງໄວ້ກາງປ່າ ຈຶ່ງພາກັນຊ່ວຍເຫຼືອ ພ້ອມທັງຮ້ອງເອີ້ນຫາຜູ້ເປັນແມ່ ແຕ່ບໍ່ປາກົດມີໃຜມາສະແດງໂຕ ຈຶ່ງໄດ້ຮັບເອົາມາອຸປະກາລະ ກ່ອນຈະແລ່ນແຈ້ງເລື່ອງຕາມລະບຽບກົດໝາຍ.
