ລັດຖະບານຍີ່ປຸ່ນໄດ້ຕົກລົງສືບຕໍ່ໃຫ້ທຶນຊ່ວຍເຫຼືອລ້າ ການບໍລິການສຸຂະພາບໂຜ້ງປາກໃນ ສປປ ລາວ ເປັນມູນຄ່າຫລາຍກວ່າ 3 ແສນໂດລາສະຫະລັດ. ເຊິ່ງພິທີເຊັນສັນຍາໂຄງການດັ່ງກ່າວ ໄດ້ມີຂຶ້ນໃນວັນທີ 18 ຕຸລານີ້ ທີ່ສະຖານທູດຍີ່ປຸ່ນປະຈໍາລາວ, ລະຫວ່າງ ທ່ານ ຄາຊູໂນຣິ ຄາວາດະ, ອຸປະທູດ ແຫ່ງ ສະຖານທູດຍີປຸ່ນ ປະຈໍາລາວ ແລະ ທ່ານ ໂຕະຊິມິຊຶ ໂມະຈິດະ, ຕາງໜ້າອົງການຊ່ວຍເຫຼືອສາກົນ ທາງດ້ານການສຶກສາທັນຕະກໍາ ແຫ່ງ ປະເທດຍີ່ປຸ່ນ (OISDE) ເຊິ່ງແມ່ນອົງການບໍ່ຫວັງຜົນກໍາໄລ ຈາກປະເທດຍີ່ປຸ່ນ, ໂດຍມີພາກສ່ວນກ່ຽວຂ້ອງຕ່າງໆເຂົ້າຮ່ວມນຳດ້ວຍ.
ໂຄງການດັ່ງກ່າວມີຊື່ວ່າ: “ໂຄງການຝຶກອົບຮົມ ການບໍລິການສຸຂະພາບຜົ້ງປາກ ໃຫ້ແກ່ນາງພະຍາບານ, ນັກຮຽນໂຮງຮຽນເຕັກນິກພະຍາບານ ແລະ ພະນັກງານພະແນກສາທາລະນະສຸກ ແຂວງຄໍາມ່ວນ ແລະ ສະຫວັນນະເຂດ”, ເຊິ່ງເປັນທຶນຊ່ວຍເຫຼືອປີທີ 2 ຂອງການຈັດຕັ້ງປະຕິບັດໃນ 3 ປີ. ຂອງອົງການ OISDE ທີ່ໄດ້ເຄື່ອນໄຫວກ່ຽວກັບວຽກງານດັ່ງກ່າວໃນລາວ ນັບແຕ່ປີ 2002 ຢູ່ ແຂວງວຽງຈັນ ເປັນຕົ້ນມາ.
ໂຄງການດັ່ງກ່າວ ແມ່ນການຊ່ວຍເຫຼືອຕ່າງໆທີ່ສໍາຄັນ ໃຫ້ແກ່ນາງພະຍາບານຢູ່ສຸກສາລາ ແລະ ນັກຮຽນຂອງໂຮງຮຽນເຕັກນິກພະຍາບານ, ນອກຈາກນີ້ຍັງມີການກວດສຸຂະພາບຜົ້ງປາກ ແລະ ການຈັດກິດຈະກໍາສິດສອນຕ່າງໆ ໃນທ້ອງຖິ່ນອີກດ້ວຍເພື່ອແນໃສ່ຊ່ວຍສົ່ງເສີມດູແລສຸຂະພາບຜົ້ງປາກ ອັນຈະຊ່ວຍຫລຸດຜ່ອນພະຍາດແຂ້ວ ແລະ ພະຍາດຜົ້ງປາກຂອງປະຊາຊົນທ້ອງຖິ່ນຕ່າງໆ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!