ໃນວັນທີ 7 ຕຸລາ 2016 ຜ່ານມານີ້ທີ່ກະຊວງໂຍທາທິການ ແລະ ຂົນສົ່ງໄດ້ມີພິທີປະກາດແຕ່ງຕັ້ງຮອງລັດຖະມົນຕີກະຊວງ ໂຍທາທິການ ແລະ ຂົນສົ່ງ ຄົນໃໝ່ ຈຳນວນ 2 ທ່ານ ຊຶ່ງປະກອບມີທ່ານ ວຽງສະຫວັດ ສີພັນດອນ ແລະ ທ່ານ ປອ ສັນຕິສຸກ ສີມມາລາວົງ, ໂດຍເປັນ ກຽດເຂົ້າ ຮ່ວມຂອງທ່ານ ປອ ບຸນຈັນ ສິນທະວົງ ກຳມະການສູນກາງພັກ, ລັດຖະມົນຕີກະຊວງ ໂຍທາທິການ ແລະ ຂົນສົ່ງ, ມີບັນດາທ່ານ ຮອງລັດຖະມົນຕີ, ບັນດາທ່ານ ຜູ້ຊ່ວຍລັດຖະມົນຕີ; ທີ່ປຶກສາລັດຖະມົນຕີ; ບັນດາຫົວໜ້າກົມ, ຫ້ອງການ, ສະຖາບັນ, ທ່ານຫົວໜ້າ ແລະ ຮອງໂຄງການທາງລົດໄຟລາວ-ຈີນ; ທ່ານຜູ້ອຳນວຍການ ພ້ອມດ້ວຍຄະນະອຳນວຍການລັດ ວິສາຫະກິດອ້ອມຂ້າງກະຊວງ; ບັນດາທ່ານ ປະທານ, ຮອງປະທານ ແລະ ເລຂາ, ຮອງເລຂາ ພ້ອມດ້ວຍຄະນະຂອງສາມອົງການຈັດຕັ້ງມະຫາຊົນຂັ້ນກະຊວງ; ບັນດາທ່ານ ຫົວໜ້າພະແນກ ຂອງກົມ, ກອງ, ຫ້ອງການ, ສະຖາບັນ ແລະ ບັນດາທ່ານ ຫົວໜ້າໂຄງການ ອ້ອມຂ້າງກະຊວງ ເຂົ້າຮ່ວມ.
ໂອກາດດັ່ງກ່າວທ່ານ ນາງ ບຸດສະດີ ທະນາເມືອງ ຫົວໜ້າກົມຄຸ້ມຄອງພະນັກງານ, ຄະນະຈັດ ຕັ້ງສູນກາງພັກກໍໄດ້ ຂຶ້ນຜ່ານດຳລັດຂອງນາຍົກລັດຖະມົນຕີວ່າດ້ວຍການແຕ່ງຕັ້ງ ຮອງລັດ ຖະມົນຕີກະຊວງ ໂຍທາທິການ ແລະ ຂົນສົ່ງ ໂດຍອີງໃສ່ຄວາມຮຽກຮ້ອງຕ້ອງການຂອງໜ້າທີ່ ວຽກງານຢູ່ກະຊວງໂຍທາທິການ ແລະ ຂົນສົ່ງ ເພື່ອຮັບປະກັນໃນການເຄື່ອນໄຫວປະຕິບັດຕາມ ພາລະບົດບາດ, ໜ້າທີ່ໆພັກ – ລັດມອບໝາຍໃຫ້ ໂດຍສະເພາະແມ່ນການປັບປຸງວຽກງານຂອງຂະແໜງ ຍທຂ ໃຫ້ມີແບບແຜນ ແລະ ທັນສະ ໄໝ ໃຫ້ສົມກັບຄຳຂັວນທີ່ວ່າ “ສ້າງບາດກ້າວບຸກທະລຸໃຫ້ແຂງແຮງ ຕື່ມອີກ ເພື່ອຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ X ຂອງພັກ ໃນການພັດທະນາພື້ນຖານໂຄງລ່າງ ແລະ ບໍລິການດ້ານໂຍທາທິການ ແລະ ຂົນສົ່ງ ຢ່າງເປັນລະບົບ ແລະ ມີປະສິດທິຜົນສູງທາງດ້ານເສດຖະກິດ”, ປະຕິບັດຕາມທິດຂະຫຍາຍ ແລະ ພັດທະນາ ຂະແໜງການ ໂຍທາທິການ ແລະ ຂົນສົ່ງ ຢ່າງມີຈຸດສຸມ, ມີປະສິດທິພາບ, ປອດໄພ, ໂປ່ງໃສ, ຍືນຍົງ, ມີການບໍລິການ ທີ່ເປັນລະບົບ, ເຊື່ອມໂຍງພາຍໃນ ແລະ ສາກົນ, ເພື່ອສືບຕໍ່ເຮັດໃຫ້ປະເທດຊາດພວກເຮົາເປັນໃຈກາງການບໍລິການຂົນສົ່ງສິນຄ້າ ແລະ ໂດຍສານຜ່ານອະນຸພາກພື້ນ.
ໃນໂອກາດນີ້, ທ່ານລັດຖະມົນຕີກະຊວງ ໂຍທາທິການ ແລະ ຂົນສົ່ງ ກໍໄດ້ເນັ້ນໜັກໃຫ້ບັນດາ ທ່ານ ຮອງລັດຖະມົນຕີຄົນໃໝ່ໃຫ້ ເອົາໃຈໃສ່ວຽກງານການເມືອງ – ແນວຄິດ, ຄົ້ນຄວ້າຮ່ຳຮຽນ ທິດສະດີມາກ – ເລນິນ, ແນວທາງນະໂຍບາຍຂອງພັກ ເປັນຕົ້ນແມ່ນເນື້ອໃນຈິດໃຈມະຕິກອງ ປະຊຸມໃຫຍ່ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງ ໂຍທາທິການ ແລະ ຂົນສົ່ງ ຫັນມາເປັນໂຄງການວຽກງານລະອຽດໃນຂອບເຂດຄວາມຮັບ ຜິດຊອບຂອງຕົນ, ຕັ້ງໜ້າຄົ້ນຄວ້າ ແລະ ຈັດຕັ້ງ ປະຕິບັດທິດຊີ້ນຳຍຸດທະສາດ ຂອງພັກໃນການ ປັບປຸຸງວຽກງານ ຂອງຂະແໜງ ໂຍທາທິການ ແລະ ຂົນສົ່ງ ເປັນຂະແໜງປາຍແຫຼມຂອງເສດຖະກິດແຫ່ງຊາດ, ໃຫ້ມີຄວາມໜັກແໜ້ນທາງ ດ້ານການເມືອງ – ແນວຄິດ ແລະ ເຂັ້ມແຂງທາງ ດ້ານການ ຈັດຕັ້ງ, ມີຄວາມຈົງຮັກພັກດີຕໍ່ພັກ – ຕໍ່ປະເທດຊາດ.
ຂ່າວຈາກ: ກະຊວງໂຍທາທິການ ແລະ ຂົນສົ່ງ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!