ສຳນັກຂ່າວຕ່າງປະເທດ ລາຍງານໃນວັນທີ 24 ສິງຫາຜ່ານມານີ້ວ່າ ທ່ານ ເພີເຟກໂຕ ຢາເຊດ ລັດຖະມົນຕີການຕ່າງປະເທດຟິລິບປິນ ໄດ້ອອກມາລະບຸວ່າ ກໍລະນີຂໍ້ຂັດແຍ່ງເລື່ອງດິນແດນ ໃນທະເລຈີນໃຕ້ ລະຫວ່າງຟິລິບປິນກັບຈີນ ຈະບໍ່ເຮັດໃຫ້ເກີດຜົນກະທົບ ຄວາມສຳພັນທາງການທູດທັງກັບຈີນ ແລະ ສະຫະລັດອາເມຣິກາ ໂດຍທ່ານໄດ້ລະບຸວ່າ ພວກເຮົາຕ້ອງການເປັນເພື່ອນມິດໃກ້ຊິດກັບຈີນ ແຕ່ບໍ່ໄດ້ໝາຍເຖິງວ່າ ພວກເຮົາຈະຫລຸດລະດັບຄວາມເປັນມິດ ກັບສະຫະລັດອາເມຣິກາ, ເຖິງແມ່ນຈະມີຂໍ້ຂັດແຍ່ງກັບຈີນ ໃນເລື່ອງທະເລຈີນໃຕ້ ແຕ່ກໍຍັງມີດ້ານອື່ນໆໃນຄວາມສຳພັນຂອງເຮົາ ທີ່ຍັງສາມາດເດີນໜ້າຕໍ່ໄປໄດ້ ໂດຍທີ່ບໍ່ຈຳເປັນໄປແຕະຕ້ອງກັບ ບັນຫາຂໍ້ຂັດແຍ່ງທະເລຈີນໃຕ້.  ການອອກມາລະບຸດັ່ງກ່າວນີ້ ມີຂຶ້ນພາຍຫລັງທີ່ ທ່ານ ໂຣດຣິໂກ ດູເຕີເຕ ປະທານາທິບໍດີຟິລິບປິນ ກໍໄດ້ອອກມາລະບຸໃນວັນອັງຄານທີ 23 ສິງຫາຜ່ານມາເຊັ່ນກັນວ່າ ທ່ານມີຄວາມຫວັງໃຫ້ມີການເຈລະຈາກັບຈີນ ພາຍໃນ 1 ປີ ໃນເລື່ອງຂໍ້ຂັດແຍ່ງທາງທະເລນີ້.

ດ້ານທ່ານ ລູ່ ຄັງ ໂຄສົກກະຊວງການຕ່າງປະເທດຈີນ ກໍໄດ້ອອກມາຖະແຫລງວ່າ ພວກເຮົາເຊື່ອໝັ້ນທັງສອງຝ່າຍ ມີຄວາມສາມາດ ແລະ ມັນສະໝອງ ໃນການຫາລື ແລະ ແກ້ໄຂບັນຫາ ເພື່ອສົ່ງເສີມຄວາມສຳພັນ ໃຫ້ກັບມາສູ່ເສັ້ນທາງຂອງການພັດທະນາ ຢ່າງເຂັ້ມແຂງ ແລະ ນຳມາຊຶ່ງຜົນປະໂຫຍດຕໍ່ທັງສອງປະເທດ.

 
ຕິດຕາມເຮົາທາງFacebook ກົດຖືກໃຈເລີຍ!