ໃນການທີ່ຈະສ້າງຊີວິດໃຫ້ປະສົບຄວາມສຳເລັດນັ້ນ ສິ່ງທີ່ສຳຄັນກໍຄື ຈິດໃຈຕ້ອງຢູ່ສູງກວ່າຮ່າງກາຍ ໝາຍຄວາມວ່າ ຈິດໃຈສາມາດສັ່ງຮ່າງກາຍໃຫ້ທຳຕາມໄດ້ ເພາະໃນການເຮັດວຽກງານນັ້ນ ຖ້າຈິດໃຈອ່ອນແອແລ້ວ ຮ່າງກາຍຜູ້ປະຕິບັດຕາມກໍຈະອ່ອນເອນຕາມໄປດ້ວຍ. ປຽບທຽບໄປແລ້ວ ມັນກໍເໝືອນກັບຄອມພິວເຕີ ທີ່ມີສະໝອງແລະພະລັງງານນັ້ນກໍຄື ມີຮາດດິດ, ແຣມ ແລະຊີພູຢູ ຍູ້ໜູນປະມວນຜົນອອກມາ ໃຫ້ໄດ້ຕາມທີ່ຕ້ອງການ.
ແນວທາງໃນການສ້າງຈິດໃຈໃຫ້ຢູ່ເໜືອນັ້ນ ມີ :
– ພະຍາຍາມຢູ່ໃນສະຖານທີ່ສະຫງົບ, ສະອາດ ແລະບໍ່ອຶກກະທຶກຄຶກໂຄມ.
– ຫລີກເວັ້ນການຜິດຖຽງ, ການຂັດແຍ້ງ ແລະການແດກດ່າເຊິ່ງກັນແລະກັນ.
– ຮັບຟັງຄວາມຄິດເຫັນຂອງຄົນອື່ນ, ບໍ່ກີດກັ້ນຄົນອື່ນ.
– ຮູ້ຈັກເມດຕາກະລຸນາ, ເວົ້າໃນສິ່ງທີ່ຖືກຕ້ອງ ແລະຮູ້ຈັກໃຫ້ອະໄພຄົນອື່ນ.
– ເລືອກເອົາທັມມະດີໆໄປນຳໃຊ້ໃນຊີວິດປະຈຳວັນ.
– ເຝິກຝົນການໃຫ້ສິ່ງດີທ້ແກ່ຄົນອື່ນ ໂດຍບໍ່ຫວັງຜົນຕອບແທນ.
– ເຮັດວຽກງານດ້ວຍຄວາມສະໜຸກສະໜານ.
– ໃຊ້ເວລາຫວ່າງໃນການນັ່ງສະມາທິນຳດ້ວຍ.
– ສະແຫວງຫາຄວາມຮູ້ຈາກແຫລ່ງຕ່າງໆ ດ້ວຍການອ່ານ, ຟັງ ແລະສົນທະນາ.
– ສ້າງນິໄສໃຫ້ເປັນຄົນມັກສົມບູນແບບ ເພາະວ່າຈະເຮັດໃຫ້ສິ່ງທີ່ກຳລັງເຮັດນັ້ນ ມີຄວາມສົມບູນແບບ.