ເຟດບຸກ​ເປີດ​ເຜີຍ​ຜົນ​ປະກອບ​ການ​ໃນ​ວັນພຸດທີ່ຜ່ານມາ ມີ​ກຳ​ໄລ​ເພີ່ມ​ຂຶ້ນ​ຫຼ​າຍ​ເມື່ອ​ໄຕ​ມາດ​ທີ 2 ຢູ່​ທີ່ 186% ຈາກ​ປີກ່ອນ​ໜ້າ​ມາ​ຢູ່​ທີ່ 2,05 ຕື້​ໂດ​ລາ​ສະຫະລັດ.

ສຳນັກຂ່າວ​ຕ່າງປະ​ເທດ​ລາຍ​ງານ​ວ່າ ​ເຟດບຸກ​ເປີດ​ເຜີຍ​ຜົນ​ປະກອບ​ການ​ໃນ​ທ້າຍ​ອາທິດ​ທີ່​ຜ່ານ​ມາ​ວ່າ ມີ​ກຳ​ໄລ​ເພີ່ມ​ຂຶ້ນ​ຫຼາຍ​ໃນ​ໄຕ​ມາດທີ 2 ລະຫວ່າງ​ເດືອນ​ເມສາ-​ມິຖຸນາ​ທີ່​ຜ່ານ​ມາ ອັນ​ເປັນ​ຜົນ​ມາ​ຈາກ​ການ​ເຕີບ​ໂຕ​ຂອງ​ລາຍ​ຮັບ​ທີ່​ມາ​ຈາກຖານ​ຜູ້​ໃຊ້​ງານ​ທົ່ວ​ໂລກ​ທີ່​ເພີ່ມ​ຂຶ້ນ​ຫຼາຍ ສົ່ງ​ຜົນ​ເຮັດ​ໃຫ້​ລາຄາ​ຮຸ້ນ​ເຟດບຸກ​ເພີ່ມ​ຂຶ້ນ ​ໂດຍ​ເຟດບຸກມີ​ຜູ້​ໃຊ້​ງານ​ເປັນ​ປະຈຳ​ຕໍ່​ເດືອນ(​ແອກ​ທີ​ຟ ຢູສ​ເຊີ )​ເພີ່ມ​ຂຶ້ນ​ເປັນ 1,7 ລ້ານ​ຄົນ ຂະນະ​ທີ່​ກຳ​ໄລ​ສຸດທິ​ຂອງ​ເຟດບຸກ​ເພີ່ມ​ສູງ​ຂຶ້ນ 186% ຈາກ​ປີ​ກ່ອນ​ໜ້າ​ມາ​ຢູ່​ທີ່ 2,05 ຕື້​ໂດ​ລາ​ ​ແລະ ລາຍ​ໄດ້​ເພີ່ມ​ຂຶ້ນ 59% ມາ​ຢູ່​ທີ່ 6,4 ຕື້​ໂດ​ລາ ລາຍ​ໄດ້​ສ່ວນ​ໃຫຍ່​ມາ​ຈາກ​ໂຄສະນາ​ອອນ​ລາຍ.ຂະນະ​ທີ່​ລາຄາ​ຮຸ້ນ ​ເຟດບຸກ​ເພີ່ມ​ຂຶ້ນ 6,3% ​ໃນ​ໄລຍະ​ຊື້​ຂາຍ​ນອກ​ເວລາ ຫຼັງ​ຕະຫຼາດ​ປິດ ຈາກ​ຜົນ​ປະກອບ​ການ​ທີ່​ດີ​ເກີນ​ກວ່າ​ທີ່​ນັກວິ​ເຄາະ​ສ່ວນ​ໃຫຍ່​ຄາດ​ຄະ​ເນ​​ເອົາ​ໄວ້.

ມາກ ຊັກ​ເຄີ​ເບິ​ກ ປະທານ​ເຈົ້າ​ໜ້າ​ທີ່​ບໍລິຫານ ​ແລະ ຜູ້​ຮ່ວມ​ກໍ່​ຕັ້ງ​ເຟດບຸກ​ເປີດ​ເຜີຍ​ວ່າ ປັດ​ໃຈ​ສຳຄັນ​ໃນ​ຍຸດ​ທະ​ສາດ​ຂອງ​ເຟດບຸກຄື​ການ​ໃຊ້​ວີ​ດີ​ໂອ ທີ່​ເປັນ​ຫົວ​ໃຈ​ສຳຄັນ​ຂອງ​ການ​ໃຊ້​ເອັບ ​ແລະ ບໍລິການ​ທັງ​ໝົດ ​ໂດຍ​ກ່າວ​ວ່າ ຜົນ​ປະກອບ​ການສະ​ແດງ​ໃຫ້​ເຫັນ​ເຖິງ​ພັດທະນາ​ການ​ກ້າວ​ໄປ​ສູ່​ເປົ້າ​ໝາຍ​ທີ່​ຕ້ອງການ ​ເຮັດ​ໃຫ້​ໂລກ​ເປີດ​ກວ້າງ ​ແລະ ​ເຊື່ອມ​ຕໍ່​ກັນ​ຫຼາຍ​ຂຶ້ນ.