ກອງປະ­ຊຸມລັດ­ຖະ­ບານສະ­ໄໝສາ­ມັນປະ­ຈຳເດືອນກໍລະກົດ 2016 ໜຶ່ງໃນຫຼາຍບັນ­ຫາລັດ­ຖະ­ບານໄດ້ມີການປະເມີນຄືນສະ­ພາບການຄຸ້ມຄອງລັດ­ຖະ­ກອນປະ­ຈຳສົກປີ 2015-2016 ພ້ອມທັງຄົ້ນ­ຄວ້າແຜນຕ້ອງ­ການຕົວເລກລັດ­ຖະ­ກອນສຳ­ລັບປີ 2017 ເພື່ອໃຫ້ພຽງ­ພໍ ແລະສອດ­ຄ່ອງເໝາະສົມກັບຄວາມຕ້ອງ­ການຂອງວຽກງານຕົວຈິງ ຂະ­ນະທີ່ຕົວເລກຮັບລັດຖະ ກອນ ສົກປີ 2015-2016 ມີທັງໝົດ 5 ພັນຄົນ.

ກອງປະ­ຊຸມລັດ­ຖະ­ບານສະ­ໄໝສາ­ມັນປະ­ຈຳເດືອນກໍ­ລະ­ກົດ 2016 ໄດ້ດຳ­ເນີນຂຶ້ນຢ່າງເປັນທາງການໃນລະ­ຫວ່າງວັນທີ 21-22 ກໍ­ລະ­ກົດ 2016 ທີ່ສຳ­ນັກ­ງານນາ­ຍົກ­ລັດ­ຖະ­ມົນ­ຕີ ພາຍໃຕ້ການເປັນປະ­ທານຂອງທ່ານ ທອງລຸນ ສີສຸລິດ ນາ­ຍົກລັດ­ຖະ­ມົນ­ຕີ ໂດຍມີບັນ­ດາທ່ານຮອງນາ­ຍົກ­ລັດ­ຖະ­ມົນ­ຕີ ແລະ ສະ­ມາ­ຊິກລັດ­ຖະ­ບານເຂົ້າຮ່ວມ.

ຕາມແຫຼ່ງຂໍ້ມູນຈາກສຳ­ນັກ­ງານນາ­ຍົກ­ລັດ­ຖະ­ມົນ­ຕີໄດ້ຮູ້ວ່າ: ຕະ­ຫຼອດໄລ­ຍະ 2 ວັນຂອງການດຳ­ເນີນກອງປະ­ຊຸມຄັ້ງນີ້ ຜູ້ເຂົ້າຮ່ວມຈະໄດ້ພ້ອມກັນປຶກ­ສາຫາ­ລື, ຄົ້ນ­ຄວ້າ ແລະປະ­ກອບ ຄຳຄິດຄຳເຫັນໃສ່ບົດລາຍງານກ່ຽວກັບຮ່າງປະ­ມວນກົດ­ໝາຍ ອາ­ຍາ; ຮ່າງກົດ­ໝາຍວ່າດ້ວຍທະ­ນາຍ­ຄວາມ; ຮ່າງກົດ­ໝາຍ ວ່າດ້ວຍການລ້ຽງ­ສັດ ແລະການສັດ­ຕະ­ວະ­ແພດ; ຮ່າງກົດ­ໝາຍ ວ່າດ້ວຍການປ້ອງກັນ ແລະກັກກັນພືດ; ຮ່າງດຳ­ລັດ ວ່າດ້ວຍການຄຸ້ມຄອງສູນຂໍ້ມູນຂ່າວ­ສານ ແລະຮ່າງດຳ­ລັດ ວ່າດ້ວຍການສຶກສາ.

ພ້ອມດຽວກັນນັ້ນ ໃນກອງປະ­ຊຸມກໍມີການລາຍງານກ່ຽວກັບສະ­ພາບການຄຸ້ມຄອງລັດ­ຖະ­ກອນປະ­ຈຳສົກປີ 2015-2016 ແລະແຜນຄວາມຕ້ອງ­ການລັດ­ຖະ­ກອນໃນປີ 2017 ຈາກນັ້ນຈະໄດ້ຮັບຟັງການຊີ້ນຳຈາກທ່ານນາ­ຍົກ­ລັດ­ຖະ­ມົນ­ຕີ ແລະບັນ­ດາວຽກຈຸດສຸມຂອງເດືອນສິງ­ຫາ 2016 ຕື່ມອີກ.

ແນວ­ໃດກໍດີ ຕົວເລກຄວາມຕ້ອງ­ການລັດ­ຖະ­ກອນໃໝ່ສຳລັບປີ­ໜ້າ ແລະການໃຫ້ບູລິມະສິດຈະນອນຢູ່ໃນຂະ­ແໜງ­ການໃດຫຼາຍກວ່າໝູ່ນັ້ນຜ່ານກອງປະ­ຊຸມ 2 ວັນຄັ້ງນີ້ຄາດວ່າຈະໄດ້ຂໍ້ສະຫຼຸບຢ່າງແນ່­ນອນ ໂດຍໃນສົກປີ 2015-2016 ກອງປະ­ຊຸມລັດ­ຖະ­ບານສະ­ໄໝສາ­ມັນ ປະ­ຈຳເດືອນມິ­ຖຸ­ນາ 2015 ຜ່ານມາ ໄດ້ມີມະ­ຕິຕົກ­ລົງຮັບ­ຮອງເອົາໂຄຕ້າລັດຖະກອນໃໝ່ຈຳ­ນວນທັງໝົດ 5.000 ພັນ ຄົນ (ຕົວເລກລັດ­ຖະ­ກອນສົກປີ 2014-2015 ທົ່ວປະ­ເທດທີ່ມີທັງໝົດ 177.826 ຄົນ) ໃນນັ້ນບັນ­ຈຸເຂົ້າທົດແທນການອອກທຸກກໍ­ລະ­ນີ 3.000 ພັນ ແລະອີກ 2.000 ຄົນແມ່ນບັນ­ຈຸເຂົ້າໃໝ່ ໂດຍໃຫ້ບູລິມະສິດຂະ­ແໜງຄົ້ນ­ຄວ້າວິ­ທະ­ຍາ­ສາດ, ການສຶກສາ, ສາທາ ແລະຂັ້ນເມືອງ.

ຂະ­ນະດຽວກັນກໍເຫັນດີໃຫ້ລັດຖະກອນຈຳ­ນວນ 2.996 ຄົນ, ຍິງ 962 ຄົນ ໃນສົກນັ້ນອອກຈາກການເປັນລັດຖະກອນ.

ທີ່ມາ:​ ເສດຖະກິດ-ສັງຄົມ