ຂ່າເປັນສະໝຸນໄພທີ່ໃຊ້ເປັນເຄື່ອງເທດມາດົນນານແລ້ວ ສ່ວນທີ່ໃຊ້ຄື ຫົວອ່ອນແລະຫົວແກ່ ຫົວຂ່າມີລົດເຜັດໃຊ້ແຕ່ງກິ່ນລົດອາຫານ ເຊັ່ນ ໃຊ້ເປັນເຄື່ອງປຸງໃນເຄື່ອງແກງ, ຕົ້ມຂາໄກ່, ຜັດເຜັດ, ລາບ, ແກງສົ້ມ… ຂ່າມີປະໂຫຍດຊ່ວຍດັບກິ່ນຄາວຂອງຊີ້ນ ແລະປາ ໃນຫົວຂ່າມີນ້ຳມັນຫອມລະເຫີຍໃນປະລິມານສູງ ປະກອບດ້ວຍສານຫລາຍຊະນິດ ເຊັ່ນ ຊິນີອອນ (Cineol) ຢູຈີນອນ(eugenol) ເຄມເຟີຣອນ(kaempferol) ກາຣບູຣ(camphor) ແລະຊີນາມິກອັນດີຮາຍ (cinamic aldehyde) ເປັນຕົ້ນ.

ນ້ຳມັນຫອມລະເຫີຍ ມີລິດໃນການຊ່ວຍຂັບລົມ, ແກ້ອາການທ້ອງອືດ ທ້ອງເຟີ້, ຈຸກ, ສຽບ, ແໜ້ນ ແລະຍັງມີລິດຂ້າເຊື້ອແບັກທີເລຍ ແລະຢຸດຢັ້ງເຊື້ອລາທີ່ຜິວໜັງບາງຊະນິດໄດ້ອີກດ້ວຍ. ຫົວຄ່າ ເມື່ອໃຊ້ກັບພາຍນອກຂອງຮ່າງກາຍ ຈະສາມາດຮັກສາຂີ້ກາກ, ຂີ້ເກື້ອນໄດ້ ໂດຍໃຊ້ຫົວແກ່ໆ ສົດໆ ຝົນກັບເຫລົ້າ ຫລືນ້ຳສົ້ມສາຍຊູ ຫລືຕຳໃຫ້ແຫລກແລ້ວແຊ່ໃນນ້ຳເຫລົ້າ ໃຊ້ທາຜິວໜັງບໍລິເວນທີ່ເປັນ.