spot_img
Homeຄົມຄິດຄົມຄົນຄຳສຸພາສິດໄປຢາມພະໃຫ້ມີແນວໄປຖວາຍ ໄປຢາມນາຍໃຫ້ມີແນວໄປຕ້ອນ

ໄປຢາມພະໃຫ້ມີແນວໄປຖວາຍ ໄປຢາມນາຍໃຫ້ມີແນວໄປຕ້ອນ

Published on

1504549_569398869794820_1567876427_n
ຮູບປະກອບ ເປັນພິທີເຖລາພິເສກ (ຫົດສົງເລື່ອນຍົດ)
ບົດຄວາມໂດຍ: ຊຽງກະເລັນ ບ້ານນາ

ວັດທະນະທຳລາວອັນໜຶ່ງແມ່ນຄວາມມີນ້ຳໃຈເອື້ອເຟື້ອເພື່ອແພ່ຍາດຕິພີ່ນ້ອງເພື່ອນຝຸງ ສະແດງອອກໃນເວລາຍາດພີ່ນ້ອງໄປຢື້ຢາມຖາມຂ່າວກໍມັກຈະມອບສິ່ງຂອງ, ອາຫານການກິນ ຫຼືໝາກໄມ້ຕ່າງໆ ເປັນຂອງຕ້ອນຂອງຝາກ ວັດທະນະທຳນີ້ມີຄຸນຄ່າສາມາດຮັດແໜ້ນຄວາມເປັນຍາດຕິພີ່ນ້ອງແລະຄົນຮູ້ຈັກຮັກແພງໄດ້ເປັນຢ່າງດີ. ໃນຂະນະດຽວກັນ ວັດທະນະທຳດັ່ງກ່າວນັ້ນກໍຖືກເອົາໄປໝູນໃຊ້ເຂົ້າໃນການພົວພັນທີ່ນອກເໜືອໄປຈາກຄວາມເປັນຍາດພີ່ນ້ອງຫຼືຄົນຮູ້ຈັກ ຮັກແພງ ນັ້ນຄືການເອົາວັດຖຸສິ່ງຂອງໄປເປັນຂອງຕ້ອນຂອງຝາກແກ່ບຸກຄົນທີ່ເປັນຜູ້ໃຫຍ່ໄມ້ສູງ ດັ່ງສະທ້ອນອອກໃນຄຳສຸພາສິດບົດໜຶ່ງວ່າ: “ໄປຢາມພະໃຫ້ມີແນວໄປຖວາຍ ໄປຢາມນາຍໃຫ້ມີແນວໄປຕ້ອນ”.

ການທີ່ຄົນເປັນຍາດຕິພີ່ນ້ອງ ຫຼືຄົນຮັກແພງກັນ ເອົາຂອງຕ້ອນຂອງຝາກໃຫ້ກັນນັ້ນ ເປັນເລື່ອງທີ່ດີຫຼາຍແລະກໍຄວນໄດ້ຮັບການສົ່ງເສີມສືບທອດຕໍ່ໆ ໄປໃຫ້ວັດທະນະທຳອັນນີ້ຢູ່ຄູ່ກັບສັງຄົມລາວຕະຫຼອດໄປ ເຖິງປານນັ້ນ ການປະຕິບັດຕໍ່ກັນນີ້ກໍບໍ່ໄດ້ຖືກຍົກຂຶ້ນມາເປັນຄຳສຸພາສິດໄວ້ໃຫ້ແກ່ລູກແກ່ຫຼານ. ໃນຂະນະທີ່ການເອົາຂອງຕ້ອນຂອງຝາກໄປໃຫ້ຜູ້ອື່ນທີ່ອາດຈະເປັນຄົນທີ່ບໍ່ຮູ້ຈັກກັນມາກ່ອນເຊັ່ນ ພະຫຼືຜູ້ເປັນເຈົ້າເປັນນາຍນັ້ນ ພັດຖືກຍົກເອົາມາເປັນສ່ວນໜຶ່ງຂອງຄຳສຸພາສິດ ເປັນຫຍັງມັນຈັ່ງເປັນແນວນັ້ນ.

ຄວາມເປັນຈິງໃນທາງພຸດທະສາດສະໜາແລ້ວ ພະສົງບໍ່ໄດ້ມຸ່ງຫວັງວ່າຈະໄດ້ຮັບອັນໃດຈາກອອກຕົນຍາດໂຍມໃນເວລາທີ່ອອກຕົນຍາດໂຍມໄປພົບປະຫຼືຢ້ຽມຢາມຖາມຂ່າວ, ເຖິງຈະເປັນຄົນທຸກຍາກປາກໝອງ, ຈະເປັນຊົນຊັ້ນວັນນະໃດໆ ຫຼືຊົນຊາດຊົນເຜົ່າໃດໆ ພະສົງກໍພ້ອມທີ່ຈະພົບປະໂອ້ລົມແລະຕ້ອນຮັບຕາມກາລະໂອກາດທີ່ເໝາະສົມ. ແຕ່ຖ້າໃຜມີຈິດສັດທາຢາກຖະນຸບຳລຸງພະພຸດທະສາດສະໜາຫຼືຢາກອຸທິດສ່ວນບຸນກຸສົນໄປຫາຍາດພີ່ນ້ອງທີ່ລ່ວງລັບໄປແລ້ວ ຫຼືຢາກສ້າງສົມບຸນຍະບາລະມີໃຫ້ໂຕເອງເອົາໄວ້ໃນພາຍພາກໜ້າກໍສາມາດເອົາວັດຖຸເຄື່ອງໃຊ້ຫຼືອາຫານການກິນ ໄປຖວາຍຕາມກາລະໂອກາດທີ່ເໝາະສົມ. ແລ້ວເປັນຫຍັງຈຶ່ງປາກົດມີຄຳວ່າ “ໄປຢາມພະໃຫ້ມີແນວໄປຖວາຍ” ໃນບົດສຸພາສິດນີ້?.

“ໄປຢາມພະໃຫ້ມີແນວໄປຖວາຍ ໄປຢາມນາຍໃຫ້ມີແນວໄປຕ້ອນ” ເປັນຄຳສຸພາສິດທີ່ຖືກແຕ່ງຂຶ້ນໂດຍຫວັງຜົນອັນໃດອັນໜຶ່ງ ຟັງແລ້ວຄ້າຍຄືວ່າເມື່ອໄປພົບຕ້ອງມີສິ່ງຕິດໄມ້ຕິດມືໄປມອບໃຫ້ ແນວຄວາມຄິດແບບນີ້ຈຶ່ງບໍ່ແມ່ນແນວຄວາມຄິດຂອງພະສົງຢ່າງແທ້ຈິງ. ແຕ່ອາດຈະເປັນແນວຄວາມຄິດຂອງເຈົ້າຂຸນມູນນາຍ, ເຈົ້າກົກເຈົ້າເຫຼົ່າ ຫຼືຜູ້ໃຫຍ່ໄມ້ສູງໃນສະໄໝອະດີດຕະການນານມາແລ້ວ ເຊິ່ງບົດຄຳສຸພາສິດນີ້ເບິ່ງເລິກໆ ແລ້ວສາມາດຕີຄວາມໝາຍໄດ້ສອງດ້ານຄື:

ດ້ານທຳອິດນັ້ນມີຄວາມໝາຍວ່າ ເວລາໄປພົບເຈົ້າພົບນາຍນັ້ນ ຄວນຈະມີຂອງຝາກຂອງຕ້ອນໄປຫາເພິ່ນ ຕາມສົມມາພາຄວນ ເພື່ອສະແດງຄວາມເຄົາລົບນັບຖືເພິ່ນ. ແຕ່ອີກດ້ານໜຶ່ງນັ້ນເບິ່ງຄືວ່າ ຜູ້ເປັນເຈົ້າເປັນນາຍເຫັນແກ່ໄດ້, ເຫັນແກ່ຜົນປະໂຫຍດ, ປະຊາລາສະດອນ ຫຼືພໍ່ແມ່ປະຊາຊົນຕ້ອງເປັນຜູ້ມອບສິ່ງຂອງເຫຼົ່ານັ້ນໃຫ້ເຈົ້ານາຍກ່ອນ ບໍ່ດັ່ງນັ້ນກໍຈະບໍ່ໄດ້ຮັບໂອກາດໃນການເຂົ້າຂໍຄຳປຶກສາຫາລືວຽກງານ ຫຼືບໍ່ໄດ້ຮັບຄວາມຮັກຄວາມເອັນດູຈາກຜູ້ໃຫຍ່ໄມ້ສູງ. ດັ່ງນັ້ນ, ຄຳສຸພາສິດນີ້ສະທ້ອນໃຫ້ຮູ້ວ່າ ຜູ້ແຕ່ງຄົງຈະເປັນຝ່າຍມີອຳນາດບາດໃຫຍ່ແລະມັກໄດ້ ຫຼືບໍ່ກໍເກີດຂຶ້ນຈາກຄວາມເບື່ອໜ່າຍຂອງຜູ້ແຕ່ງ ຕໍ່ພຶດຕິກຳຂອງຜູ້ເປັນເຈົ້າເປັນນາຍທີ່ຍາມໃດກໍຕ້ອງໃຫ້ຕົນເອງໄດ້ກ່ອນແລ້ວຈຶ່ງພົວພັນນຳ ຫຼືເວົ້າງ່າຍໆ ວ່າຖ້າບໍ່ໄດ້ປະໂຫຍດເຂົ້າໂຕເອງກໍຈະບໍ່ຍອມເຮັດຫຍັງເພື່ອສັງຄົມເລີຍ ຜູ້ແຕ່ງຈຶ່ງແຕ່ງຄຳສຸພາສິດນີ້ຂຶ້ນມາເພື່ອເປັນການສຽດສີ ຫຼືເປີດໜ້າກາກຂອງຜູ້ເປັນເຈົ້າເປັນນາຍວ່າເປັນຜູ້ເຫັນແກ່ໄດ້ເຫັນແກ່ຜົນປະໂຫຍດສ່ວນຕົນສູງກວ່າປະໂຫຍດສ່ວນລວມ.

ສະຫຼຸບງ່າຍໆແລ້ວ ຄຳສຸພາສິດນີ້ ຈຶ່ງບໍ່ຖືວ່າເປັນຄຳສຸພາສິດຄຳສອນທີ່ຖືກຕ້ອງຕາມທຳນອງຄອງທຳເທົ່າທີ່ຄວນ ເພາະມັນມີລັກສະນະຂູດຮີດໂດຍທາງອ້ອມວ່າ ໄປຢາມພະຫຼືໄປຢາມນາຍຕ້ອງມີແນວໄປຕ້ອນໄປຝາກ, ມັນບໍ່ມີຄວາມເປັນທຳແກ່ຜູ້ບໍ່ມີຂອງຕ້ອນຂອງຝາກ, ເມື່ອບໍ່ມີຂອງຕ້ອນຂອງຝາກກໍບໍ່ລົງມືເຮັດຫຍັງໃຫ້ໃຜເລີຍ ນັ້ນຖືວ່າເປັນພຶດຕິກຳທີ່ບໍ່ເໝາະສົມຂອງບຸກຄົນທີ່ເປັນເຈົ້າເປັນນາຍເລີຍ.

ບົດຄວາມຫຼ້າສຸດ

ໄຂກອງປະຊຸມສະໄໝສາມັນຂອງລັດຖະບານ ປະຈຳເດືອນກັນຍາ 2025 ຢ່າງເປັນທາງການ

ໄຂກອງປະຊຸມສະໄໝສາມັນຂອງລັດຖະບານ ປະຈຳເດືອນກັນຍາ 2025. ກອງປະຊຸມສະໄໝສາມັນຂອງລັດຖະບານ ປະຈຳເດືອນກັນຍາ 2025 ໄດ້ໄຂຂຶ້ນໃນຕອນເຊົ້າ ວັນທີ 9 ຕຸລາ 2025 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ສອນໄຊ...

ລາວເສຍຫາຍໜັກ! ຜົນກະທົບຈາກພາຍຸບົວລອຍ ພັດຖະລົ່ມລາວ ເຮັດໃຫ້ມີຜູ້ເສຍຊີວິດທັງໝົດ 4 ຄົນ.

ພາຍຸບົວລອຍ ສົ່ງຜົນກະທົບຕໍ່ 34 ເມືອງໃນທົ່ວປະເທດ ມີຜູ້ເສຍຊີວິດ 4 ຄົນ ຮອງນາຍົກຊີ້ນຳໃຫ້ເລັ່ງໃຫ້ການຊ່ວຍເຫຼືອຜູ້ໄດ້ຮັບຜົນກະທົບໂດຍດ່ວນ. ໃນຕອນເຊົ້າວັນທີ 6 ຕຸລາ 2025, ທີ່ຫ້ອງວ່າການສໍານັກງານນາຍົກລັດຖະມົນຕີ ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ຈັດກອງປະຊຸມ...

ແລກເມຍກັບງົວ 1 ໂຕ ເມື່ອໜຸ່ມອິນໂດເນເຊຍຖືກເມຍຄົບຊູ້ ຈຶ່ງສະເໜີການແລກປ່ຽນເພື່ອຈົບບັນຫາ

ໃນວັນທີ 07/10/2025 ລາຍງານຈາກສຳນັກຂ່າວໃນປະເທດອິນໂດເນເຊຍ ມີຄລິບເຫດການທີ່ເປັນກະແສເນື່ອງຈາກມີຊາຍຄົນໜຶ່ງຍອມໃຫ້ເມຍຕົນເອງໄປຄົບກັບຊູ້ ພ້ອມຍອມແລກເມຍກັບງົວ 1 ໂຕ, ແລະເງິນອີກປະມານ 5,000,000 ລູເປຍອິນໂດເນເຊຍ (ປະມານ 6,800,000 ກີບ) ຜ່ານການຕົກລົງຈາກທັງ 2...

14 ຂໍ້ຫ້າມພາຍໃນບຸນອອກພັນສາ ແລະ ຊ່ວງເຮືອປະເພນີ້່ ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ຈັດຂຶ້ນໃນ ວັນທີ 04-08 ຕຸລາ 2025

ທ່ານ ແສງສາທິດ ພິມເມືອງ ຕາງໜ້າອົງການປົກຄອງເມືອງຈັນທະບູລີ ປະທານຄະນະກໍາມະການຈັດງານບຸນອອກພັນສາປະວໍລະນາ ແລະ ຊ່ວງເຮືອປະເພນີ ທີ່ທ່າວັດຈັນ ປະຈໍາປີ 2025 ໄດ້ຖະແຫຼງຂ່າວຕໍ່ສື່ມວນຊົນໃນການກະກຽມ ແລະ ຈັດງານບຸນ ລະຫວ່າງ...